["سيكا"]

هبدألكوا القصة من الاول
انا ولدت قيصري من حوال شهر ونصف وحصل نزيف في الولادة بسبب جرح في المشيمة كان مجمع دم وفترة النفاس كان نزول الدم معتدل ويقرب ان يكون خفيف خالص وقعدت فترة 23 يوم نفاس وبعدها خلص وقعدت اسبوع وبعدين بقيت كل معمل مجهود كنس ومسح وكدة ينزل دم وقعد حوال 4 ايام وبعدين وقف ومنزلش تاني ويوم 35 من النفاس رحت للدكتوره عشان اخد وسيلة منع حمل فادتني برشام اسمة exluton لان انا برضع ابني طبيعي ، وبدات اخدة يوم الثلاثاء ويوم الخميس لقيت بقعة دم والجمعة لقيت دم اكتر بس اسود فاتصلت بالدكتورة وقلتلي لو نزل دم كتير يبقي دي الدورة ولو منزلش يبقي من البرشام
وهنا بدات المعاناة
من يوم السبت وانا نازل علية دم بشكل فظيع زي ميكون نزيف واصفريت وبقيت مش قادرة اقف ولا ارضع الولد وبقيت دايخة وقعدت كدة لحد يوم الاتنين واتصلت بالدكتورة وقلتلي هي بس جامدة عشان بعد النفاس وقلتلي اخد برشام دافلون 500 او حقن هيموستوب واخدت الاتنين مع بعض ومفيش فايدة رحت رايحة لدكتورة تانية وقلتلي نفس الكلام وقلتل كملي الحقن لمدة 3ايام صبح وبليل والبرشام 2الصبح و2 بالليل لمدة 3 ايام برضة وعملت كدة ومفيش فايدة الدم نازل زي مهو لحد النهاردة 9ايام من امبارح بس بدا يقل شوية صغيرين جدا بس لسة برضة يعتبر كتير وانا اصلا الدورة بتيجي 8ايام واديني بقالي 9 ايام ولسة مخلصتش
مش عارفة اعمل اية مش عارفة من اية دة وياتري هتيجي كدة تاني انا كدة هتصفي خالص ولا دة من البرشام بتاع وسيلة منع الحمل بس الدكتورة قلتلي انة مش منة حد يا جماعة جرب البرشام دة او حصل معاة كدة يفدني لو سمحتوا ؟؟؟؟؟؟؟؟؟؟

[ايمان فريد]

اولآ الف مبارك المولود الجديد
ثانيآ روحى مستشفى حكومى احسن وشوفى
على فكره انا كنت مريضه شويه ودكتوره حولتنى
الى مستشفى حكومى مستشفى الزهراء
وبسم الله ما شاء الله
وابقى طمنانه عليكى ياقمر

[fairy princess]

الف سلامة عليكى ..والف مبروك على المولود
وان شاء الله نطمن عليكى

[hanotif]

انا كنت باشتغل في صيدلية وتقريبا البرشام ده بينزل دم في اول استعمال له عشان تغيير الهرمونات
بس بحالتك دي احسن ليكي تستشيري دكتورة تانية وتوريلها الادوية اللي انت ماشية عليها
وطمنينا

[mashmosha]

الف مبروك يا جميل والحمد لله انك قمتى بالسلامة . موضوع الدم الغزير ده كان بيحصلى بعد الولادة لدرجة انى كنت مسافة ما احط الالويز نصف ساعة وتلاقى الدنيا باظت وسالت الدكتورة وقالتلى ده علشان بعد الولادة بتقعد كده فترة وتنتهى فانشاء الله متقلقيش وبالنسبة لاقراص دافلون انا اخدتها بعد ما ركبت اللولب علشان تقلل النزيف لوكان كتير وعلشان تطمئنى اكتر روحى اكشفى لكن انا بقولك ان شاء الله مافيهاش حاجة وربنا يطمنا عليكى وياريت تطمنينا

[اريج ونور وندى الجنة]

انا ماعرفش الرشام ده بتاع منع الحمل بس طالما دكتورتين قالولك نفس الكلام يبقى اكيد ده من اثاره الجانبية وزى ما قالولك فعلا دافلون وهيموستوب دى ادوية لمنع النزيف بس انا اخدت برشام كويس اوى لمنع الحمل وهو جميل جدا مع الرضاعة لانه مابيجبش دورة طالما انتى بترضعى طبيعى وبيبقى جميل جدا لانك بتعوضى الدم اللى فقدتيه مع الولادة فاسالى الدكتورة عليى اسمه واساليها ان كان ينفعلا
واقرى حبيبتى النشرة الداخلية بتاعة البرشام ده اكيد هتلاقى اثاره الجانبية
وسلامتك الف سلامة وربنا يطمنا عليكى
وحمد الله على سلامتك

[حى على الجهاد]

الف مبروك على المولود
والف سلامه عليك ياحبيبة قلبى
ياريت تستشيرى دكتوره ثقه وطمنينا عليكى

[أم مريم]

انا الصراحة معرفش البرشام ده
انا الدكتورة بتاعتى كانت عطيانى برشام تانى اسمه microlut و ده مكنش بينزل الدورة اول 6 شهور بس بعد كده انتظمت عادى جداً
اسألى الدكتورة بتاعتك عليه و لو شايفه انه احسن تبقىتقولك تاخديه بدل اللى تاعبك ده
و ابقى طمنينى عملتى ايه
سلامتك

["سيكا"]

جزاكم الله خيرا
الحمد لله الدورة وقفت يوم السبت وان شاء الله اروح للدكتورة واشوف الموضوع اية لحسن انا من يومها وانا تعبانة خالص

[hanotif]

الف سلامة عليكي يا سيكا
كلي كويس
رمضان جاي
كل سنة وانتن طيبين

[hanotif]

وماشاء الله ابنك قمر ربنا يفرحك بيه

[أم مريم]

طمنينا عليكى

[sindraziad]

انا قرأت ان احسن وسائل منع الحمل هى الموجوده فى المستشفيات الحكوميه لانها مدعمه من الخارج و هما طبعا عايزين يدونا وسائل كويسه وملهاش اى اعراض جانبيه ومتسببش حمل اثناء استعمالها وده عشان يحدو من النسل وانا جربت البرشام بتاع المستشفى وكان كويس جدا والدوره جتلى بعد16شهرو انا لسه بستعمله لانى لسه برضع ابنى طبيعى

[amira82]

يا بنتى دكتوره تانيه بسرعه