[nahla mahmoud]

كل عام وانتم جميعا بخير
رمضان باذن الله هيهل علينا بعد ايام
وطبعا كلنا بندعي يارب بلغنا رمضان
ويارب تقبل منا رمضان الماضي وانعم علينا بالقادم
وانا وانتم عاوزين نتفرغ في رمضان للعبادة
وليس للطعام
والحل ايه الاكل بياخد وقت وتحضير في نهار ومضان واحنا عاوزين نصلي او نسمع برنامج ديني او نقرا القران الكريم او عبادات اخري
انا عندي فكرة كل واحده منا تكتب ماذا تحضر من اطعمة او تموينات او تجهيزات تساعدها علي تحضير اكلاتها في رمضان من خلال خبراتها السابقة من رمضان الماضي

[nahla mahmoud]

انا هبدا بنفسي
وانا بعمل تجهيزات جميلة ساعدتني جدا في رمضان الماضي
اولا بعمل لسته بكل الاكلات التي استطيع عملها
وابدا في وضع خطة لها من خلال الكمية المطلوبة علي مدار الشهر
فمثلا الدجاج
احدد عدد مرات طبخه في الشهر حسب عدد افراد الاسرة وبناءا علي ذلك اشتري الكمية المطلوبة

[nahla mahmoud]

بعد احضار الدجاج ينظف جيدا بالماء والملح
وينقع بالدقيق لفترة حتي نتخلص من الزفارة والرائحة
واثناء نقعه نحضر التتبيله الخاصة به وبالطبع لكل واحدة منا تتبيلة وخلطة خاصة ونفس في الاكل
الا ان المتفق عليه ان مكونات الخلطة هي بصل مبشور وفص ثوم وطماطم مهروسة وملح وفلفل وبهارات وزعتر وكاري وحبتين قرنفل وعود صغير قرفة ونص معلقة زنجبيل مطحون

[alghamed]

وانا بجهز الصلصات والدجاج واللحوم واضعها فى الفريزر لحين الاستعمال وربنا يعينا ويتقبل منا آمين

[reham10]

كل عام وانتى بخير ورمضان كريم
القطايف تتحشى وتوضع فى الفريزر وعجينة البتيزا وعصير المانجو والفراخ البانية تتبل وتوضع فى الفريزر

[nahla mahmoud]

هايل ريهام وبجد فكرة البيتزا ديه انا معملتهاش قبل كده بس ان شاء الله هنفذها في رمضان القادم

[nahla mahmoud]

وممكن نضيف عصير الكركدية المركز المصنع في المنزل ووضعه باكياس بعد ان يبرد وعند استعماله نفكه في كوب ماء ويخفف حسب الرغبة

[reham10]

بعمل مهلبية كركدية مغذية ومفيدة للاطفال وممكن تتاكل فى السحور او بعد المغرب

[nahla mahmoud]

ازاي ياريت الطريقة بتاعتها ؟
المهلبية بالكركدية

[nahla mahmoud]

طبعا في اساسيات بنعملها في الايام العادية وبشكل خاص في رمضان
البصل المفروم والثوم المفروم بالفريزر
الطماطم المسبكة والكوفتة والعصاج واللحمة المتبلة الخاصة بكباب الحلة والسمك المتبل
وكمان التمر المفصص والمجهز لعمل لبن بالتمر
وعصير قمر الدين
وشربات الحلويات
والكسكس المعد في المنزل والمخزن لحين استعماله حلو او مملح

[reham10]

بعملة من غير مقادير بغسل الكركدية من الاتربة ويوضع مع الماء فى اناء على النار ويقلبا جيدا ويترك ليغلى ثم يبرد ويصفى ثم يوضع فى الاناء ويوضع معة سكر يقلب ويذوب ويترك مرة اخرى يغلى مرة واحدة ثم نضاف النشا المذوب فى نصف كوب ماء ويقلب حتى يصبح سميك مثل مهلبية اللبن ثم يبرد ويوضع فى الاطباق ويرش بجوز الهند ويدخل الثلاجة ويقدم وممكن تعملى الجيلى عادى ثم يضرب فى الخلاط مع زبادى ويوضع فى الاطباق وفى الثلاجة ثم يقدم وعندى طريقة بتيزا سهلة وجربة ان شاء اللة هكتبها وان شاء اللة الوصفة تعجبك

[nahla mahmoud]

ممتاز دي طريقة احسن من الجيلي
لان فيه مواد حافظة

[شرين عمر]

معلومات مفيدة وحلوة اوى

[مروة الدميري]

اولا كل سنةوانتم طيبيبن بصى يا ستى انا ح اقولك على اللى عملته السنة اللى فاتت
طبعا لازم الكنافة والجلاش فى رمضان انا بقى عملتهم من غير ما اسويهم وحططهم فى الفريزر وكان عملت الشربات بتاعهم وعنته وبالنسبة للاكل عملت الفراخ ال بانية البوفتيك تبلتهم وحطتهم فى الدقيق والبيض والبقسماط وبعدين عنتهم فى الفريزر حتى السمبوسة عملتها يعنى الاكل تقريبا كان كله جاهز عندى يا دوب باطلع احمر من الفريزر وخلاص

[nahla mahmoud]

ست بيت بصحيح يا مروة
وشكرا ليكي علي الافادة

[nahla mahmoud]

ياريت الكل يضيف خبرة او تجهيزه تانية

[موحده بالله]

#السلام عليكم: انا عندى اهم عصير فى رمضان عصير الليمون. بعصر ثمر ليمون على قد ما اقدر و اصفيه من التفل بتاعه و احطه فى مكعبات التلج و لما يجمد احط المكعبات فى كيس واستعملهم على الميه على طول ساعة الفطار.

#كمان بجهز بعض انواع الاسماك زى السويب. بنضفها و اقطعها صوابع و اتبلها بالكمون و الملح و التوم . و بعدين اطلعها من الفريزر على القلى على طول او اعملها طاجن.
و كمان الممبار بحشيه و اسلقة و لما يبرد ادخله فى الفريزر فى اكياس على قد الاكله. و بعدين اطلعه يفك شويه و بعدين احمره. و ده كمان ممكن يسرى على الحمام المحشى.
و حاجة تنيم مهمه انى بعمل كميه كبيره من كفتة الارز المصريه و اصبعها و احمرها و لما تبرد ادخلها الفريزر فى اكياس على قد الطبخه
و لو افتكرت حاجه تانيه هقول لكم.

[dada2002]

الف الف شكر

[nahla mahmoud]

شكرا اماني علي الاضافة والمشاركة وبجد استفدت منك

[Noonah]

مشروب قمر الدين: ممكن ندوب اللفة كلها أو أكتر من لفة مرة واحدة فى مية بتغلى و نتركها تبرد و نضعها فى التلاجة بتكون سهلة أوى فى الذوبان بعد كده، تاخدى قدر الحاجة كل يوم ، يعنى كام معلقة بتوفر الوقت

البشاميل (الصلصة البيضا) ممكن تعمليه وتشليه فى علبه فى الفريزر ولما تعوزيه تطلعيه يفك وتزوديه شوية لبن