[إحســ جديد ــاس]

أنا بلف السمبوسة و بعمل الكبيبة وبرصها في أطباق على قد الكمية المطلوبة وبغلفها وكمان بعمل المعجنات مثل الكروسان و خلية النحل و فطاير السبانخ فطاير الجبنة و الششبرك و بحشي القطايف وكمان بتبل الدجاج و الكفتة و بقسمها على قد مابحتاج في أكياس نايلون وبحطها في الفريزر ولما اعوزها بنزلها وبستعملها مباشرة
كدة بكون وفرت وقت كبير للعبادة

[جنة اثير]

بجد وصفات تحفة لان برجع من الشغل بدخل على المطبخ على طول مش بطلع الا على المغرب ونفسي رمضان السنه ديه يكون مختلف
طيب عندى سوال ممكن حد يجوابني عليه هو ؟؟؟؟؟؟؟
ممكن اتبل اللحم المفروم واشيله فى الفريزر

[nahla mahmoud]

اكيد ممكن
تعملي لحم مفرور عصاج
او تعملي لحم مفرور وتبليه وتعمليله خلطة بحيث يستعمل كوفتة مشوية

[ام سيف الدين]

انان عندى استفسار الفراخ البانيه لو عملتها و شيلتاه مش غلط كدة عشان البيض
و لا بتعملوها ازاى و تحفظوها

[كادبورى 81]

ايهىء ايهىء ايهىء بجد بجد كلها افكار حلوه بس مش هعرف اعمل منها حاجه لان جوزى بيحب كل حاجه طاااااااااااااااازه ما بياكولش اى حاجه مجمده جربت قبل كده الثوم والصلصه والفراخ بيقولى لالالالالالالالالالالالا طعمهم متغير جدا ... والبطاطس لالالالالالالالالالا كده بتشرب زيت كتير جدا ...والباميه ........اممممممممممم مش زى الطازه بردو.......جننى
ممكن بس اجمد اللحمه والبسله بتاعة الشهر كله لانها لا تتأثر بالتجميد كمان الفاكهه زى المانجه والجوافه وبجمدها صحيحه مش عصير لان الفاكهه لو عملتيها عصير فريش بتفقد نسبه كبيره من الفيتامينات اللى فيها بعد ساعتين من عصرها وعشان كده ما ينفعش اجمدها عصير ..وبحضر بقى خزين البيت العادى اللى بره الثلاجه هههههه وبكسر البلح
بس ممكن اجرب الكفته والسمبوسه والجلاش عجبتنى اوى الافكار دى بس ممكن عندى سؤال ......لو جمدت الكفته و الجلاش والسمبوسه والقطايف احمرهم من الفريزر علطول والا لازم يفكوا الاول؟بس اوعوا حد يقول لجوزى ههههههههه

[ام رحاب]

[إحســ جديد ــاس]

كادبوري آه ممكن الحجات إلي بدك تحطيها في الفريزر لازم تنزليها وتحمريها على طول و هي ثلج أولاً مبتسح عليك وثانياً مبتفقدش قيمتها الغذائية
و متخفيش محدش حيقول لجوزك حاجة توكلي على الله

[كادبورى 81]

احساس جديد ميرسى يا قمر على هتمامك

[nahla mahmoud]

كادبوري
اولا كل سنة وانتي بخير وصحة وسعادة
ثانيا انا نفس حالك زوجي بيحب الفريش والطازة
بس ياستي في حاجات لما يتعمليها وتشيليها صدقيني انتي نفسك لن تلاحظي تغيرها بل بالعكس هتكون افضل
اهم حاجة انك بتحفظيها ازاي
مثلا
الثوم بتفروميه مع شويه ملح عشان ينعم معاكي اثناء الفرم لو هتفرميه في الكبه
وتخزنيه اما في اكياس صغيرة علي كميات قليلة عشان الكمية الكبيرة المخزونة في علبة كبيرة معرضة للفك ولقط رائحة او معلقة السحب منها
ممكن تعملي كميات صغيرة في علب صغيرة مسموح بدخولها الفريزر ةتسحبي وقت الحاجة
وممكن تعملي البصل بنفس الطريقة بس اثناء فرمه بتحطي ملح وفلفل اسود عشان لا تتغير رائحته
وتحفظيه في اكياس صغيرة بكميات تتسحب علي دفعتين مش اكتر
الصلصة
بتغسل الطماطم المراد عمل صلصتها
وممكن تعصريها او
تضعيها مع شوية ميه حوال ربع الحلة بس بتحطيها سليمة الطماطم بحاله من غير عصرها
ويتولعي عليها النار وهتلاحظي انها بعد فترة استوت ودبلت
بتطفي النار وترفعي الغطا لحين ماتهدي الطماطم
وتقشري القشرة بتاعتها
وبعدين تفريميها في الكبة
وتعملي البصلة المتحمرة في الزيت او السمن
وتضيفي عليها الطماطم المعسورة في الكبة وتسبكيها مش هتلاحظي انها محتاجة وقت كبير في التسبيك لانها سبق لها التسوية لما كانت بحالها
وممكن تضيفي عليها علبة طمام المعباء الجاهزة علبة واحدة بس بتديها قوام ولون
وخزني بنفس الوضع اكياس صغيرة نكفي طبختين بمعني ان الكيس الواحد بتطبخيه علي مرتين
بس ممكن تخزنيها بكميات كبيرة لفترة كبيرة
وصدقيني لن يتغير فيها شئ
فيه حاجات ممكن يتغير طعمها لما يتتخزن بس فترة كبيرة من الوقت زي الجلاش مع العلم اني لا احبذه في حالة ان زوجك بيحب الطازه
بس ممكن تكوني مجهزه اللحم المفروم والمعصج بالخضرة لاستعماله في الحشوة
السمبوسة لو حشوتها جاهزة عندك برده مش هتاخد وقت في حشوها اثنا ء قليها
بس تخرجيها من الفريزر قبل الوقت عشان تفك
بالنسبة للكورنة الباشميل ممكن تعملي الباشميل في الفريزر
والحم المفروم المصج الخاص بها
لكن المكرونة هتسلقيها في وقتها ومش هتاخد وقت
وهتطلعي الباشميل والعصاج يفكوا
وبعدين ترصي الصنية
وتسويها ومش هتاخد وقت منك
الملوخية ممكن تعملها علي الاخر خالص وتشيليها وبرده مش هتتغير نهائي
الكوفتة جهزيها بس كتلة ولما هتعمليها طلعيها وتركيها تفك وصبعيها وحطيها الفرن او سويها علي النار من فوق

[اموله المنفله]

موضوع هايل يانهله جزاكى الله خير عليه وفعلا فيه افكار مفيده جدا تنفع فى رمضان

وانشاءالله بنستفيد منها كلنا تسلم ايدك ياعسل

[nahla mahmoud]

موضوع هايل يانهله جزاكى الله خير عليه وفعلا فيه افكار مفيده جدا تنفع فى رمضان

وانشاءالله بنستفيد منها كلنا تسلم ايدك ياعسل

تسلميلي انتي يا سكر
وربنا يصلح احولنا ويعنا علي رمضان صيام وقيام وعمل وعبادة

[مرفت على]

ما شاء الله

[nehad]

جزاك الله خيرا علي الموضوع الهايل

[كادبورى 81]

ميرسى يا نهله على الرد الوافى الشامل وان شاء الله اجرب الوصفات اللى قلتى عليها وبجد موضوع رائع يا نهله وننتظر منك المزيد

[الزوجة الاولى]

بارك الله فيكم
بس يانهله انا سمعت ان غلط البصل يتقطع ويتعان فى الفريزر بيعمل مادة سامه

[ام وليد2008]

شكرا ياجماعه على كل هذه الافكالر الجميله
وكل سنه وانتم طيبين ...........

[عاشقة أمل بوشوشة]

معليش حبيباتي اخذ الخبرة منكم عشان انا اول سنة جواز
يعني اول رمضان ليا
مشكورة على الموضوع الجميل

[alghamed]

شكرا ليكو على اضافة الافكار الجديده زى الباشميل عمرى ماعنته فى الفريزر اول مره هخزنه ان شاء الله وبجد فيه افكار جديده نفعتنى كتير بشكركم وكل عام وانتم بخير

[fairy princess]

افكار جميلة
كل سنة وانتم طيبين

[جنة اثير]

انا عايزه اعرف طريقة الكبه بتعمل اذاي لاني بحبها حد يقولي