[mivi]

ماشاء الله على الوصفات الشهية

يسلموا ايديكم

[nehad]

السلام عليكم
انا جييييييييييييييييييييييييييييييييييييييييييييييييي ييييييييييييييييييييييييييتد
العزومه كانت هايله
تعالوا اقولكم عملت ايه
يا فرحتي

السبت بليل نقعت قمر الدين
قبلها بيوم عملت الباميه باللحم
1- سويت اللحم بالحبهان وورق اللوري و فلفل اسود و بصله كامله
و حطيت الملح في الاخر لانه بيأخر سوا اللحمه
2-عملت طريقه ام الطيب الجميله بس استبدلت السمن بشئ بيعملوه في المطاعم الاوروبيه بيخلطوا دايما دهن نباتي مع حيواني ذبده+زيت ذره
بس و استوت و كانت روعه بس ماتنسوش تحطوا الملح لان ام الطيب نست تقولهولي
في غلطه وقعت فيها
تنبيه
انا نقلتها تاني يوم في برام عشان كده المفروض ما كنتش تستوي علي الاخر
لانها كانت مظبوطه يوم الاحد و لما اديتها غلوه في البرام اتهرت+اني نسيتها علي النار كمان خلي بالكوا

يالا بقي علي يوم المعركه
الكاميرا بتدخل زووم ان عليا وانا في المطبخ ابنديت واتوكلت علي ربنا
استعنا علي الشقا بالله
سلقت الفراخ و كانت فكت من التلج غسلتها بماء مملح مع حبهان وورق للوري وحفنه ملح و بصله كامله وسيبتها
نصف ساعه و 5 دقايق علي العين الكبيره دايما بتطلع مظبوطه مش مهريه المهم
و سويت اللحمه بتاعه البرام يس لا تتخضوا سيبتها علي النار ساعتين و نصف
هههههههههه
كانت هايله مهريه خالص في البرام كانت بتدوب في البق في الاول كانت النار عليا وبعدين سيبتها علي نار هاديه بمزاج بس شوحي اللحم في الزيت قبل السلق
في اثناء السلق(اللحم+الفرخه) عملت السلطه وفي طبق التقديم عالاطول بالاش مواعين كتير بس محطتش عليها ملح ولاليمون
في الاخر حطي عليها التتبيله ريحان ونعناع و ليمون و ذره ملح
خرط الملوخيه الحبيبه و عملت الملوخيه بالطريقه الجهنميه الي كتبتها سابقا
ودي تخلي اي واحد تعمل ملوخيه مظبوطه تمام حتي لو اول مره تعملها
ولا تنسي رشه ملح ناعمه
وخليت الحله الي سلقت فيها الفراخ عشان الشوربه حمرت لسان العصفور في الطاسه التيفال مع زيت لحد ماابيض ثم اخد لون ذهبي خفيف مع تقليب مستمر متسيبيهاش
دي الطاسه الي عملت فيها التقليه بعد ما غسلتها
اصله مش كتر مواعين انا حاولت اقلل علي قد مااقدر
و تاخد غلوه ههههه بس لقيت لسان العصفور لسه مستواش فتحت الحله لقيته متطلعلي لسانه وانا مسكتش اديته غلوه تانيه و يبقي يوريني شطارته
هههههه اصلي عنيده
بس ريحت شويه و نجهزت المطبخ للمعركه القادمه
نقعت اللبن في ورق اللوري والحبهان و رشه فلفل اسود
والارز في الماء نصف ساعه
انا عارفه حتقولوا مافيش فايده فيا و دماغي ناشفه
هئ هئ هئ نصيبكوا بقي اعترضوا
و في الوقت ده
1 عملت سلطه الذبادي زي طريقه مدام ديدي السكره بس الخيار بشرته علي المبشره
كان صغير ويدوب في البق
بس عملت غلطه
المفروض كنت حطيت عليها التوم في الاخر قبل التقديم
بس و عملت شكل حلو عملت علي الوش خطين متوازين خط ريحان و خط نعناع
كان شكلها حلو
2جهزت تحمير الفراخ مليت الطبق بطاطس شيبسي جاهزه و حضرت صلصه طماطم و معلقتين زبده و زيت و ملح و فلفل
وجهزت ترابيزه كاسات و كوبايات و كله تمام
دخلت علي الطواجن المعركه الاخيره اكتشف ان الطواجن الصغيره دي حل سحري
لاني مبعرفش اعمل كميات رز كبييره و كمان لما يلاقي كل واحد طاجن قدامه يشعر بالرضا ههههههه كل واحد عنده وش محمر لوحده بقي
خلصت و قطعت ورق الفويل لتغليف الطواجن فور خروجها مع العلم اني استخدمت فرن كهربا لظروفي
و غسلت المواعين والمطبخ بيبرق يا فرحتي
و طلعت الباميه من النار عشان تهدي و نقلتها للبرام
قبل الفطار بتلت ساعه ولعت في البوتجاز
ههههههههه
فكرني بنيرون لما حرق روما ههههههههه
الملوخيه-الشوربه-الباميه-و بحمرفي الفراخ دهنتها بالخلطه و تحمير في الطاسه في رشه زيت لاتري
الملوخيه سخنت بس مش غلي زي ما ام الطيب قالتلي
والشوربه اخر حاجه غرفتها
وكله تمام حطيت ماء ساقعه و قمر الدين

وقطعت العيش اربع عشان مفيش حاجه تترمي
ولاتنسي طبق لوضع عظام الفراخ-طبق فاكهه حلو-طبق شيبسي تاني احتياطي- خله السنان- مناديل معطره
مقدرش اقولكم الي حصل بعد الفطار لان الارسال قطع
بس كل الي عملته شربت 3 كوبايات مايه ساقعه و مكاتش حاجه غير الشوربه
و يقوليلي الاكل حلو قوي بس انا محستش بطعم حاجه من التعب

[ميرفت ام احمد]

تسلم ايدك يانهودة شكلها طلع تحفة
انتى كدة ورطينى وهتخلينى اكتب عزومتى انا كمان بالتفصيل الجميل اللى انتى عملتيه بس انا تعبانه جدا النهاردة والشحن قاطع عندى بقاللى يومين شغالة
فى العزومة بس الحمد لله طلعت تشرف وجوزى بقى مبسوط وساعدنى فى غسيل المواعين
انشاء الله لما ارجع فى الفورمة حقوللكو انا عملت اية وازاى
ماشى

[nehad]

ماشي يا سكره احنا مستنين

[dr_mishmisha]

السلام عليكم ورحمة الله و بركاته
و كل سنة وانتم طيبين
انا لسة مشتركة في المنتدى بتاعكم دة من شوية
و تقريبا هي الصفحة دي اللي قعدت اقرا فيها
ايه يا جماعة
الصفحة دي موسوعة تجنن
و اشكر كل اللي كتب وصفات للعرايس
بس معلش عندي كام تعليق
مع احترامي الشديد للأمهات الكبار اللي اكيد استفدنا منهم
ارجو منكم كتابة الوصفات للأكلات تكفي شخصين فقط لأن التجربة تكون احسن في كمية صغيرة توفيرا لما قد يفشل و خصوصا العرائس الجديدات العهد بالمطبخ
بصراحة كنت باطبخ قبل ما اتزوج لكن كان للعيلة كلها و العزومات
و اول ما تزوجت كنت باعمل نفس الكمية ففاضت مني وللأسف لم أكن موفرة في ذلك
و لما حاولت تقليل الكمية كانت مشكلة التوابل و الملح و المقادير و طبعا دة كله حسب ما اتعودت

و كمان مش عايزة افكر الكل بعدم الاسراف في عمل الاكلات في شهر رمضان كما تعودنا لأن حرام الاكل اللي بنعمله مش هيتاكل و مآله الى صفيحة القمامة و مش لازم يكون فيه كذا صنف يكفي صنف واحد مع النشويات المناسبة (رز او مكرونة او خبز..... الخ) حسب الصنف المطبوخ و الشوربة و السلطة و كمية صغيرة من الحلويات لتجنب السمنة و الاحسن الاكثار من العصائر و المشروبات لتفادي مشاكل الجفاف مع الصيف

ارجوكم ما حدش يزعل من كلامي و لو قلت حاجة غلط حد ينبهني

و صوم مقبول ان شاء الله..
د. مشمشة

[nehad]

يا حبيبي لا زعل ولا حاجه
بس انا الي فاض من العزومه
يكفيني لمده يومين المهم الحفظ الكويس
و بطلع واسخن مفيش مشكله
و معنديش حاجه اترمت
انا بقي لما اتجوزت مش بعرف غير اني اطبخ لاتنين
ودي اول مره اقوم بعزومه
و شوفي لو محتلجه اي حاجه احنا معاكي

[dr_mishmisha]

تسلمي يا قمر
على فكرة حطيت طريقة الكبدة الاسكندراني ياريت تدوقوا و تقولوا رأيكم
http://forums.fatakat.com/thread53131

[shimoo_2008]

علي فكرة الكبدة جميلة
بس انا عندي سؤال
انا حسب معلوماتي الكبدة الاسكندراني بتبقي من غير طماطم
وكمان بتتعمل بالزيت
ولازم يتحط عليها ليمون
انا مش عارفة معلوماتي دي صح ولا غلط؟

[لؤلؤة الجنة]

السلام عليكم ورحمة الله وبركاته

ازيكم حبيباتى

انا عضوه جديده ودى اول مشاركه ليا فى المنتدى

بس شكلها كده مش هتكون الأخيره

لان المنتدى شكله جميل جدا وهيفدنى كتير

طبعا بشكر اختى مدام ديدى على الموضوع دا

كأنى كنت غرقانه وأنقذتينى

أصل انا فجاه لقتنى اتخطبت من اسبوع كده (عقبالكوا يابنات )

وفجاه برضوا لقتنى هتزوج بعد 6 شهور

ومن ساعتها وأنا حاسه انى محتاس خالص ومش عارفه هشيل المسئوليه ازاى

وهطبخ لزوجى بعد كده ازاى ؟؟

بس الحمد لله لما شوفت الموضوع دا اطمئن قلبى شويه

جزاكم الله خيرا واستمرى وأنا متابعه

[nehad]

خليكي معانا يا سكر و انقلي وصفات و جربيها في ماما و بابا حتبقي تمام

[ميرفت ام احمد]

شوفى يانهودة انا قدمت الخشاف والنمبوسة ساعة الادان فطرو عليهم ونزلو يصلو
انا ساعتها كنت بجهز فى السفرة لان انا مبظهرش هنا خالص ولاحتى بيسمعو صوتى رجعو لقيو كله الصته
السفرة كانت كالتالى
فرشت تلات مفارش سفرة على الارض لان العدد كبير جدا
بس كانت المفارش لصقه فى بعض يعنى مش منفصلين
حطيت صينية المكرونة بالبشاميل فى الوسط بالظبط
وجنبها الشياله اللى هيرفعو بيها المكرونة من الصينية
مجنبها من كل ناحية سيفيسين ورق عنب وسيرفيسين محشى كرنب
وصينيتين خضار معمول فى الفرن والفراخ المشوية فى اربع اطباق واللحمة المحمرة فى طبقين كبار
وعملت بامية وقدمتها فى طبق واحد لانى عارفة مش هاتتاكل بس كانت تحفة
وكنت ناسية قمر الدين فعملت فيمتو بسرعة
وطبعا جنب كل واحدالطبق الفاضى والمناديل بتاعت السفرة وسلطانية الشوربة
والمعالق بتاعته
وبعد الفطار محدش رضى ياكل حلويات لانهم اتنفخو من الميه شربو كولمانين ميه ساقعة بالهنا والشفا
التفاصيل هوافيكى بيها فيما بعد لانى لسة بعانى من اثار العزومة
محدثتكم ميرفت ام احمد من امام الكومبيوتر
السعودية

[nehad]

تسلمي يا سكر
شكلها عزووووووووووووووووووووومه تجنن
و شكللك هايله في الطبيخ
مستنينك بعد زوال اثار المعركه
بس احب اسألك اكلتي ايه تاني يوم العزومه و يوم العزومه؟

[ميرفت ام احمد]

انا يوم العومة كان حر جدا والوقفة فى المطبخ طبعا انتى عارفة الواحدة بتبقى تتعصر من المية انا اول مادن الادان كنت مهبولة عالمية شربت مية بالهبل وجيت ادوق السنبوسة مالقيلهاش مكان فى بطنى وزوجى شرحه كان واقف بيسقى الناس مية ومفطرش بدانانجوع الساعة 11 حطيت من اللى فاض وانا بقدم فى سرافيس يعنى كل واحد هيحط قدامه اللى هياكله وبس ومفيش اكل اترمى وعلى فكرة فكرة التقديم تحطى لكل واحد فى طبقة دى فاشله لان كل ده مصيرةالباسكيت ومفيش حد بياكل مكن حد اما النهاردة وبكرة ففى فايض كتير يكفى ومش هرمى حاجة خالص

[nehad]

تسلمي يا سكر و يديكي الصحه
انا بس خليت لكل واحد برام رز باللحم و طبق الشوربه بتاعه
لكن الباميه في برام كبير و الملوخيه في صنيه التقديم بتاعتها
و الفراخ في السرفيس
بس و فاض اكل كتير والله بس ينفع بعدين في مرحله الهدنه
ههههههه
اومال فين مدام ديدي مختفيه؟

[ام بسنت]

تسلم ايديكى مدام مرفت
ونهاد تسلمى
مدام ديدى الماوس بتاع الكمبيوتر بايظ مش بتعرف تدخل المنتدى خالص ربنا يسهل ويتصلح وتنورنا

[ميمي ميمي]

مشكوره اختي الكريمه وفقكم الله

[nehad]

انتوا فين يا فتكوات
وحشتوني
انا ناويه علي نيه مش كويسه
و شكلي حعمل كنافه
مممممممممممممممممممممممممممممممممم
و حبقي اقولكم الاخبار
بس الي عنده نصيحه يقولي ضروري

[اميرة المملكة]

الموضوع جيد جدا بفيد كل عروسة كل امهة