أنا ولا يهمني اللي يقولي كلمة اقوله عشرررررة ( كلمة مهمة قبل نصف شعبان)
السلام عليكم ورحمة الله وبركاته
صحيح انا فتوكة جديدة ولسة مكسوفة منكم
عاملة ضيفة
ههههه بس حبيت اتكلم في موضوع مهم بالنسبالي معاكم
كتير من الناس بيفتكر ان قوة اللسان في سلاطته وان قوة شخصيته في جبروته وقهره للآخرين وتيجي تقعدي مع ناس تقول انا اللي يقولي كلمة اقوله عشرة وانا كلمتها ورصيتهملها ومسحت بيها الارض وكلام كتير يوجع طب سبحان الله ليه الغل؟
وتلاقي الموضوع والله ياجماعة ابسط مما يمكن بس الدنيا تقوم وتولع على حاجات بسيطة
وممكن والله ارحام تتقطع واخوات يتقاطعوا وصديقات عمر يخسروا بعض للابد عشان شوية كلام ومواقف مش مستاهلة
وكلها ممكن تكون بسبب العصبية ومن مبدأ اللي يقولي كلمة اقوله عشرة مع ان ربنا قال ادفع بالتي هي احسن فإذا الذي بينك وبينه عداوة كأنه و لي حميم
شفتي يعني يبقى عدو؟؟ بس من كلمة طيبة يبقى ولي حميم
بصراحة القوة مش في سلاطة الاسلوب عارفين ليه؟؟ لان كل الناس بتعرف تتخانق وتزعق وتهزأ لكن قليل جدا اللي يحافظ على هدوء اعصابه ويرد الغلط بادب واحترام ويوجه اللي قدامه لو غلط بطريقة لطيفة من غير قفش ولا خناق ونمشي على مبدأ "
لا تباغضوا ، و لا تحاسدوا ، و لا تدابروا ، و كونوا عباد الله ! إخوانا " صحيح الأدب المفرد
وكمان...
ليس الشديد بالصرعة ولكن الشديد من يملك نفسه عند الغضب او كما قال عليه الصلاة والسلام
فالقوة الرسول عليه افضل الصلاة والتسليم وصف صاحبها بانه من يملك نفسه عند الغضب وما يخليش الغضب يتحكم في اعصابه وتصرفاته,
قوة الإنسان جواه بإيمانه وبقربه من الله سبحانه وتعالى
والقوة في كظم الغيظ وان الواحد يجاهد نفسه ويحاول يحسن الظن في الناس ولو حد بقى خلاص عمل مشكلة وزودها قوي خلاص ممكن يبعد شوية بس يسيب الباب موارب حبتين عشان مايبقاش فيه قطيعة على الأقل نلقي السلام على بعض عشان ما ندخلش في الحديث "
لا يحل لمسلم أن يهجر أخاه فوق ثلاث ، فمن هجر فوق ثلاث فمات ، دخل النار"
او يحصل شحناء خصوصا لما تعدي علينا مواسم خير زي مثلا نص شعبان اللي جاي بعد يومين والمشكلة بقى لو في اتنين متخانقين على دنيا ممكن خناقهم دا يمنع عنهم الخير لان في نص شعبان يغفر الله لكل الناس إلا مشرك أو مشاحن كما جاء في الحديث "
يطلع الله إلى جميع خلقه ليلة النصف من شعبان فيغفر لجميع خلقه إلا لمشرك أو مشاحن "(صحيح الترغيب والترهيب) وأيضا "
قال يطلع الله إلى عباده ليلة النصف من شعبان فيغفر للمؤمنين ويمهل الكافرين ويدع أهل الحقد بحقدهم حتى يدعوه "
فلعلها تبقى وقفة لينا كلنا وراجع نفسنا نشوف احنا علاقاتنا مع الناس ترضي ربنا ولا لاء و يابخت من بات مظلوم ولا باتش ظالم
وربنا يوفقنا جميعا للخير ويرزقنا وإياكم الجنة قولوا امييييييين
اذا اعجبك الموضوع و اردت نشره في المنتديات الاخرى فاستخدمي هذا الرابط:
أنا ولا يهمني اللي يقولي كلمة اقوله عشرررررة ( كلمة مهمة قبل نصف شعبان)
http://forums.fatakat.com/thread46577
