[رونا]

السلام عليكم ورحمة الله وبركاته

أخواتى الأعزاء

مش عارفه أبدأ منين

بس أنا دلوقت لسه راجعه من أجازه من بلدى ورجعت لغربتى تانى ووحدتى

بجد بجد مش قادره أستحمل ولا أتأقلم
لغاية دلوقت متعرفتش على حد لانى مش بشتغل ،، حتى الجيران مش عرب ومش قادره أتأقلم معاهم

حاسه نفسى هخرب بيتى بأيدى مش قادره أستحمل ومبقاش عندى طاقه ولا أى قوة تحمل

ليا 3 سنين بضغط على نفسى وخلاص داخله على مرحلة إنفجار

وخصوصاً عندى طفله وطول الوقت بتبقى زهقانه وعيزانى العبها على طول

دايما افتكر واقول لو انا بين اهلى كنت رحت لفلان وفلان وكانت العمليه هانت

حد يساعدنى من خلال تجربته يقولى أعمل إيه

وهل أنا غلطانه وببالغ لعدم تكيفى ده

أرجوكم أقفو جمبى مش عارفه أعمل إيه

دايما بدعى وبصلى ربنا ينهى غربتى يارب
ادعولى

الغربه صعبه مع انى فى ناس بتحسدنى عليها فاكرين اننا مرتاحين وعايشين حياه سهله

قولولى أعمل إيه

تعبانه جداً

اذا اعجبك الموضوع و اردت نشره في المنتديات الاخرى فاستخدمي هذا الرابط:
الغربه كربه فعلاً: ساعدونى أرجوكم
http://forums.fatakat.com/thread46651

[toty5858]

السلام عليكم ورحمه الله وبركاته

رونا حبيبتي انا زيك في الغربه وعندي طفله عندها سنتين برضه بتبقي عايزة تلاقي حد تلعب معاه

حولي حبيبتي تملي وقت فراغك ده بشيء مفيد ليكي مثل حفظ القرءان اعملي هوايه كان نفسك تعمليها في وقت الفراغ ومتنسيش بنتك لازم يكون ليها وقت من وقتك

وبعدين حولي تختلطي بالناس وبلاش نظرة التشاؤم ديه

[nahla mahmoud]

انا اختك في الله
وعيشه منذ 4 سنوات في السعودية ومعي اولاد محمد وعبد الرحمن
وبجد هقولك علي حاجة انا لما برجع من مصر بعد الاجازة برتاح عارفه ليه
هنا الهدوء والاستقرار هتقوليلي الهدوء القاتل
وانا هرد عليكي وقولك انتي عندك نعمة ناس كتير بدور عليها مش نعمة واحدة لا نعم كتير
فكري شوية
اولا نعمة الرزق والخير من السفر والغربة
ثانيا الاسرة والبيت والاولاد
ثالثا الاستقرار
رابعا وده الاهم وقت وفراغ وبركة في الوقت تقدرى تعملي فيها كل حاجة
انا زيك مش بشتغل بس مبسوطة اني بربي اولادي وبعمل معاهم كل جاجة في اللعب والمذاكرة
كمان وده الاهم انا مثلا بحب رمضان هنا عارفه ليه عشان بعرف اكرس وقتي كله في العبادة وممكن اشغل وقتي بحاجات كتيرةاعملي كده والله هتكوني مبسوطة
ابعدي الشيطان عنك اكيد ليه عامل في الموضوع
اعتبري اننا كلنا اخوات ليكي في الله
انضمي معنا في الخير
وشاركينا في وقتك وانا هضيفك عندي في الاصدقاء
وتفائلي نعم ربك تحيطك
فحمدي الله

[ام ركان]

حبيبتى انا مش هقولك حاولى تعملي علاقات او او لكن هاقولك والله حالك احسن من ناس كتير في ناسبتبقي عايشة مع اهلها وتحصل بينهم مشاكل وقطيعة ويلاقي نفسة اتوحد وبدل ماتفكرى لوكنت فمصر كنت هروح لدا ولدا فكرى لو انت فوسط اهلك وحصل خلاف ما لسبب من الاسباب <وما اكتر الخلافات بين الاهل وخصوصا لو طلبو منك مساعدة ما ومرضتيش>وبدأوا هم يبعدو عنك
هيبقي شكلك ايه يبقي لا اهل ولا سعة عيش
انا كنت باحسبها زيك لكن بعد ما شفت بعض ردود فعل من بعض الاهل والاصدقاء قررت اتحمل
قال علي بن ابي طالب الفقر في الوطن غربة /والغنى في الغربة وطن

[ام جيهان]

الحمد لله
انا كنت هموت عشان اجى هنا واضحى بكل اللى انتى بتتمنى ترجعيله
سعات بزهق وبضايق وسعات بخرج وبكون سعيده وفرحانه
لما بزهق واتخنق بقول احسن من غيرنا الحمدلله
كفايه انى مع جوزى واولادى هيتربو صح بعيد عن تدخل اى حد فى تربيتهم
هتصدقى لو قولت لك انى هنا بقالى سنه و3 شهور ومش بفكر انزل مصر دلوقتى خالص
السنه دى معرفناش ننزل عشان كنت ولده من شهرين والسنه الجايه ان شاء الله مش عاوزه انزل
لأنى مش حاسه انى ليا حد غير جوزى واولادى ربنا يخليهم ليا يارب
واللى اعرفهم هنا جيرانى وزوجات اصحاب جوزى
وناس قليله اوى
استعيذى بلله من الشيطان هو اللى مكبرها فى دماغك وعازك تخربى بيتك

[drnahla]

استفدت من كلامك قوى
الغربة صعبة
لكن اهون من العيش بين المشاكل
صدقينى العيش مع اهلك واهل زوجك
لازم يبقى فيها مشاحنات ومضايقات
لكن هنا الهدوء النفسى
والحمد لله ع نعمة الرزق الواسع

[ام سراج]

كلام الفتوكات كله صح
لا يمكن ازيد عليه حاجه احسن منه
لكن حاقولك انا بعمل ايه
جوزي اشترك لنا في مدرسه لتحفيظ القرآن بنروحها مره كل اسبوع
الجميل..إن المدرسه فيها نادي نسائي..وحمام سباحه
وبقابل ستات هناك مغتربين زيي..وبقينا نكلم بعض..ونتقابل في المدرسه
خلي جوزك يشترك لك في نادي عائلي تروحيه ترفهي عن نفسك..والله يعينك
وعموماً..اللي احنا فيه ارحم من غلاء المعيشه وقله الحيله وانك ماتعرفيش تسدي طلبات بيتك..يا اختي احنا في نعمه..اللهم لك الحمد حمداً كثيراً

[رونا]

toty5858

فعلا توتى عندى نظرة تشاؤم جامده

بس كلامك ريحينى وحسسنى إنى فى ناس زيى.. بس الجميل إنك قدرتى تتكيفى

والله المستعان

____________

nahla mahmoud

كلامك بجد جميل وخلانى أنظر للأمور بمنظور تانى

سبحان الله الواحد بيقى عنده نعم كتير ومش بيبقى حاسس بيها

إيش ضمنى فعلا إنى لو عشت بين أهلى هبقى مبسوطه

فعلا عسى أن تكرهو شيئاً وهو خير لكم

وعندك حق الشيطان ماسكى فعلا لأنى بتجيلى أفكار غريبه

بشكرك على غهتمامك بجد ريحتينى

_______________


ام ركان

كلامك به الكثير من الحكمه

وفعلاً لا أحد يعلم ماذا سيحدث غداً

ربنا يعينا جميعا

وياليتنا ندرك مدى نعمه

_____________________
ام جيهان

أعوذ بالله من الشيطان الرجيم

عندك حق يا ام جيهان الشيطان متملكنى اليويمن دول

بس هتغلب عليه إن شاء الله

بس إنتى بتقولى مش عايزه تنزلى السنه الجايه كمان.. مش بيوحشوكى أهلك

__________________

drnahla

الحمد لله على نعمة الرزق

فعلا كلمه جميله

بس المشكله إننا كان دخلنا كويس فى مصر وأهالينا كانو مرتاحين وبيساعدونا

بس بردو الواحد ميرعفش الخير فين

وربنا كريم ورحيم بعباده


______________________

ام سراج

انا اشتكرت فى مركز تحفيظ للقرآن بس مكملتش علشان بنتى صغيره وبتعمل إزعاج

حتى حاولت أتركها مع زوجى بردو كانت بتعيط وكان بيتصل بيا أجى

إن شاء الله هعمل بفكرتك لما تكبر شويه

________________


بجد مش عارفه أقول إيه على إهتمامكم وردودكم إللى ريحتنى

حتى زوجى إمبارح قعد معايا قاعده طويله وريحنى بكلامه وقالى كلام كتير مشابه لكلامكم

فى اللحظه دى فكرت وقلت مش دى نعمه أحمد ربنا عليها إنى معايا زوج بيحبنى وبيقدر زعلى وأنا فى الغربه

لدرجة إنه قالى إنتى عارفه بكره فى إيه ؟ يمكن أموت وترتاحى وترجعى لأهلك

شوف وصلته لأيه زوجى من شدة إنهيار وشايف حالتى السيئه

أنا فعلا الشيطان متملكنى وبتجيلى أفكر وحشه

زى قال إيه إنى خايفه أموت هنا بعيد عن أهلى

بالرغم إنى لو كنت عايشه طول العمر بينهم وجيت بس سافرت بلد تانى لمجرد فسحه ممكن أموت.. لا تعلم النفس بأى أرض تموت

وهاجس إن أولادى تبعد عنى لما تكبر

مش عارفه بتجيلى أفكر جنونيه

الشيطان إتملكنى واضح إنى إيمانى قل


أرجوكم أخواتى خليكم معايا الفتره دى يمكن علشان لسه راجعه من وسط لمه

بس إنتو كمان مش بيحصلكم إكتئاب لما تكونو لسه راجعين من وسط أهلكم

بس أكيد مش زى كده وبجنانى ده

فعلا أنا بصيت حواليا لقيت فى نعم كتير غفلانه عنها

اللهم لك الحمد والشكر كما ينبغى لجلال وجهك وعظيم سلطانك

خليكم معايا ومتسبونيش

[مصراويه]

أسأل الله العلى القدير أن يفرج عنك كربتك وهمك .

[حبيبة.]

رونا انا حاسه بيكي والله لاني في نفس خنقتك دي
ويا سلام لما تقعدي تفتكري اهلك واخواتك ولما تكوني مدايقه ومش لقيه حد تفضفضي معاه وقعدتك وسط ناس مش تعرفيهم واكترهم مش مصريين كل دا صعبببببببببب لدرجه كتبت موضوع من فتره اخر ما زهقت قلت اني مخنوقه والبنات هنا كلهم بصراحه مش سابوني قعدوا يفهموني
وانا دلوئت الي بقولك اصبري واحمد ي ربنا كل لحظه ان معاكي بنوته تسليكي وتاخد ديما بحسك وزوجك في شغله اوقات فراغك صلي اقعدي نت واقري حجات تفيدك وتعال هنا هزري واتسلي معانا واوعي تخلي الشيطان والتفكير يتملك منك وربنا يسعدك يا رب ويزيل همك

[مريمه]

ااااااااااااااه يا رونا
اكيد الغربه صعبه انتي اتعودتي على كل حاجه ببلدك والان عايشه ببلدمختلف تماما وبعيد عن كل اهلك بس انا حقول لك على حاجه انا في بلدي اللي احبه واهلي كلهم جنبي يعني مشواربسيط واكون عندهم وعندي بنتن حلوين وهديييين يعني اعرف اخرج باي وقت انافيه زهقانه واخذهم معايا او اخليهم عند اهلي لانهم بيحبوهم بس مع كل ده انا حسه بالغربه دي لان جوزي مسافر ومش معايا
انتي تحمدي ربك ان جوزك معاكي ومسبكيش وسافر لوحده ده مع جوزك السكن والراحه اللي مش حتحسيها مع حدتاني من اهلك انا بتمنى اسافرمعاه واترك كل اهلي واصحابي
ثم تعرفي المقوله ابعد عن اهلك يحبوووووك اكيد انتي محبوبه جدا من اهلك غير خواتك صح وده يكفي
واخيرا الحاله الماديه الصعبه بتجيب مشاكل بين الجوزين وده اكيد حتى لوكنتو ببلدكم مرتاحين ولاباس بس لازم توسعو على اولادكم وتعملو مستقبل جيد ليهم وليكو انت وجوزك وحتحسي بالراحه لما تشوفي نتيجة الغربه دي
وعلى فكره احناحالتنا الماديه حلوه اوي كانت وجوزي هنا في اليمن بس لازم نحسنها اكتر وقريب ان شاء الله حسافر عنده واترك كل اللي انتي بتحبيه لانه هو اهم من كل حااااااجه
ادعو الله ان يسعدك ويسعدني امييييييين
وانصحك بكثره الاستغفار لانها بتجعل لك من كل هم فرج ولاتنسي تشغلي وقت فراااغك بالمفيدمثل قراءة القران دهانتي حتحسي معاه انكاسعد امراه بالعااااااااااااالم

[اوتيليا]

السلام عليكم ورحمة الله وبركاته

أخواتى الأعزاء

مش عارفه أبدأ منين

بس أنا دلوقت لسه راجعه من أجازه من بلدى ورجعت لغربتى تانى ووحدتى

بجد بجد مش قادره أستحمل ولا أتأقلم
لغاية دلوقت متعرفتش على حد لانى مش بشتغل ،، حتى الجيران مش عرب ومش قادره أتأقلم معاهم

حاسه نفسى هخرب بيتى بأيدى مش قادره أستحمل ومبقاش عندى طاقه ولا أى قوة تحمل

ليا 3 سنين بضغط على نفسى وخلاص داخله على مرحلة إنفجار

وخصوصاً عندى طفله وطول الوقت بتبقى زهقانه وعيزانى العبها على طول

دايما افتكر واقول لو انا بين اهلى كنت رحت لفلان وفلان وكانت العمليه هانت

حد يساعدنى من خلال تجربته يقولى أعمل إيه

وهل أنا غلطانه وببالغ لعدم تكيفى ده

أرجوكم أقفو جمبى مش عارفه أعمل إيه

دايما بدعى وبصلى ربنا ينهى غربتى يارب
ادعولى

الغربه صعبه مع انى فى ناس بتحسدنى عليها فاكرين اننا مرتاحين وعايشين حياه سهله

قولولى أعمل إيه

تعبانه جداً

صباحك فل حبيبتي ومين سمعك انا كمان ببلد لحالي وما بعرف حد وما بشتغل وانشالله الله يرزئني بالخلف الصالح شو رايك بما انو نحنا متل بعض نسير اصحاب وكل وحدة تخفف عن التانية شوي شوي

[zola002]

السلام عليكم
أكيد العربة صعبة و الوحدة أكثر اظن إن المشكلة هي الوحدة القاتلة بتفتح مجال الشك و أبواب الشيطان حاولي يا أختي تجعلي من عائلتك عالمك عندك زوجك و أولادك و الأهم لازم تتكلمي مع زوجك عن مشاكلك يمكن هو مش مقدر حجم الإحساس لانو هو مشغول بعملو و ليه أصدقاء في الشغل و بما أنو هو يطلع دايما أكيد بيعرف أماكن و ناس يمكن تعملي معاهم صداقات لأني عندي أختي في كندا و هي تاني ما كانتش تعرف حد بس زوجها ساعدها و هي تقول لولا تفهم زوجها و مساعدتو ليها ما كانتش تقدر تتحمل و هي في بلد أجنبي بس دلوقتي تأقلمت و ليها معارف و أصدقاء بيتساعدو و إنتي الحمد لله في بلد عربي و مسلم يعني بتقضو رمضان و الأعياد مش زي اللي في بلدان أجنبية يعني إذا صاقت بيك الدنيا يمكن تروحي للمسجد و دا مش صعب عشان افتكرت جملة تقولها أختي لما أكون متصايقة و أشكيلها " كفاية إنكم تسمعو الأذان في كل و قت " مش زي اللي في الغربة لا نفس الدين و لا نفس العادات

[رونا]

مصراويه

أشكر لك حسن دعاؤك

وتقبل الله منا ومنك خير الدعاء

_______

حبيبه

آه يا حبيبه أكيد إنتى حاسه بيا علشان بتمرى بنفس ظروفى

بس إتضح لازم نبقى أقوياء ونخلى إيمانا بربنا كبير وثقه فيه أكتر من كده إنه مش هيضيعنا بإذن الله

ربنا معانا

________________

[monee_2020]

السلام عليكم الله يهديكى يا رونا خليتى جوزك يقول لك ايه بلاش الله يخليكى الافكار الجنونيه دى
ربنا عز وجل بيقول( ولا تعلم نفس ماذا تكسب غدا وما تدرى نفس باى ارض تموت)
طيب يا ستى ترضى تكونى مكانى رغم انى معايا ناس سعوديين لكن اللى فى العماره كله هنا لحاله وبقالى اسبوعين ما طلعتش وما باكلمش حد ولا ليا حد بقضيها شغل ونت واهتمام بجوزى واولادى واللى مهون عليا باكلم بابا وماما واخواتى عليه الحمد لله انا فعلا لما جيت واتخنقت زليت جوزى شويه عايزه انزل بس فكرت انا اللى حاتبهدل فى كل حاجه من الطلبات وغيره غير انه هنا حايتبهدل لوحده ربنا يهونها علينا
وبعدين انتى عملتى شات كده للمغتربات خلينا نكمل بقى

[bebsa]

بصى يا رونا كلامك فكرنى بنفسى لانى انا زيك بالظبط ليا هنا فى دبى سنه ونص ومفيش حاجه ف حياتى غير جوزى وبنتى نزلت مصر اجازة لمدة شهر وكان نفسى اوى اطول الاجازة كنت مبسوطه وانا ف بلدى ووسط اهلى وبنتى كمان كنت بشوف فرحتها لما تشوف حد من اخواتى واهلى لانها هنا مش بتشوف حد خالص بسبب انى مشتغلتش وبالتالى مفيش صداقات وجوزى معندوش مانع انى اشتغل بس المشكله ف البلد اللى عاوزة المدرسه صاحبه الخبرة ف البلد متقلش عن سنتين المهم سعيت ومحصلش نصيب ف الشغل بص اكتفيت واقنعت نفسى بحاااجه مهمه جداااااااااا البعد احيانا ليه فوايد اهمها انك تعيشى ما جوزك بعيد عن مشاكل انتو ف غنا عنها من ناحيه ومن ناحيه تانيه الوضع المادى هنا مستور نوعا ما عن بلدك ومستوى الدخل وزى ما قلتى اللى ف مصر فاكرين اللى ف الغربه بيغرفو من بحر ملوش اخر لو فكرتى كدة ممكن ترتاحى ووقتك مع بنتك استمتعى بيه واهللك واخواتك فى اختراع اسمه النت والكمبيوتر مخلينى كانى عايشه معاهم بشغل المايك بيبقو معايا وببقى معاهم وربنا ينهى غربتنا دى على خير

[جنة القلب]

ربنا يعينك على الغربه يا رونا وبجد زي مأغلب الاعضاء قالولك أقتربي من الله في الوقت ده وكمان دي فرصه كويسه جداً أنك تهتمي ببنتك وتراعيها وتربيها كويس جداً
وكمان كويس أنك بتعرفي تلاقي مجال للكلام مع ناس زي المنتدى هنا وكلنا معاكي وحاولي تعرفي حجات أكتر وتتعلمي برامج تفيدك هتلاقي الوقت يمر وانتي بتنمى عقلك وايمانك بالله اكتر

[رونا]

مريمه

اوتيليا

zola002

monee_2020

bebsa


جنة القلب


بجد مش عارفه أشكركم إزاى أخواتى

جزاكم الله كل خير على وقفتكم معايا

بجد هونتو عليا كتير

وأنا دلوقت بطمنكو بقيت أفضل بفضل الله وبمساعدتكم

ولقيت إنى عندى نعم الله تحيطنى وكنت غفلانه عنها

اللهم لك الحمد والشكر

ربنا يخليكو ليا

[ماجي2008]

ربنا يهون عليكى غربتك وترجعى لاهلك بالسلامة ربنا سبحانه وتعال هيسلنا عن العمر والصحة والمال عملنا فيهم اية حاولى زي ما قالت الاخت تستغلى وقتك فى طاعة وعبادة
طاعة زوجك هيرضى عنك ربك ، حفظ القرآن ، تشوفى يوم اجازة زوجك تخرجي انت والاولاد وتقعدوا فى مكان عام
حاولى تبسطي نفسك والناس زمان كانت مفيش فسح ولا مجال لخروج الوحدة من بيتها بس كانت بتعرف تبسط نفسها ازاي كنت سمعت فى برنامج وكان المتحدث بلال فضل الكاتب السينمائى بيقول للمذيعة جدتى زمان كانت بتعرف ازاي تبسط نفسها عارفى كوبية الشاى اللى بتقعد بيها فى البلكونة ده فى حد ذاته كانت متعتها
انتى يا رونا يا حبيبتى اعتبريها مرحلة وهتعدي وربنا معاكي لما تلاقى نفسك مضايقك ومخنوقة استغفري ربك وانا هدعيلك ربنا يفرج همك وهموم المسلمين امين يارب