[undonelife]

بصي انا واحده عايشه في مصر اهو ومش مستريحه واللي انتي بتسميه غربه ده انا بتمناه وعلى فكره اختي في البحرين برضه ومبسوطه اوي
احمدي ربنا واشغلي وقتك بالعباده والاهتمام بزوجك وبيتك والتسليه برضه..واحنا روحنا فين واحنا موجودين برضه
مش احسن من لما تشتغلي وتلاقي نفسك اهملتي بيتك وجوزك وولادك عشان مفيش وقت كافي؟ وبعدين الوضع في مصر دلوقتي يصعب عالكافر
ياشيخه احمدي ربنا

[رونا]

ماجي2008

بجد فتحتى عنيا على شئ إنى سعادة الإنسان مش بالمكان بتيجى منه هو

هو إللى يقدر يسعد نفسه أو يتعسها

وده إللى حصل معايا قعدت أقول لنفسى أنا مش مرتاحه هنا أنا مش مبسوطه

ووصلت نفسى لتفكير سلبى ملهوش حل غير نهايه سلبيه وكلها تشاؤم

أشكرك كل الشكر على نصيحتك


om jna

ياريت نتعرف على بعض

راسلينى على الخاص وقوليلى هتيجى إمتى

وإنتى أول مره تيجى ولا إيه؟


undonelife

واللهى إنتى عسل

عندك حق المفروض أحمد ربنا على نعمه

اللهم لك الحمد والشكر

أشكركم كل الشكر على إهتمامكم

[ام جيهان]

اكيد هيوحشونى يا رونا بس نعمل ايه يعنى وعلى فكره مفيش حد فى مصر ألا ماما واخويا الضغير بس
بابا مات الله يرحمه واخويا الكبير هنا فى الامارات بس بعيد عنى ومش بنروح لبعض هو فى اماره وانا فى اماره
واخويا التانى فى الكويت وده اللى هموت واشوفه وحشنى اوى
واعتقد ان الانتر نت قرب الناس لبعض اوى ومش فى مشكله خلاص
ربنا يهديلك الحال يارب
وبعدين احنا هنا كلنا سوا اهل وعيله
واللى تتضايق تدخل واكيد هتلاقى راحتها هنا وسط اخواتها
وانا موجوده اهو نهون على بعض الغربه ويسعدنى نكون اصحاب

[zizi soliman]

اختى العزيزه مريت بنفس ظروفك وكنت احلم بالعوده الى مصر وانتظرت حتى وصل ابنائى الى سن المدرسه وكانت حجه للرجوع الى مصر لتعليم الاولاد بمدارس اللغات وفعلا اعدت فى مصر سنتين كنت اعتقد انى هروح واجى وعشت فى احلام ماقبل الزواج وحياتى قبلهااروح واجى وكل شىء تمام ولكنى ياحببتى عشت اسوء سنتين فى حياتى من الوحده و المشاكل ورجعت فى اول فرصه ودخلت ولادى مدارس بريطانيه ساعات الاحلام و الخيال شىء و الواقع شىء اخر وانا اعده وحرمت اقول اروح مصر تانى بقالى حوالى 3سنوات مرحتش مصر جالى عقده من هناك واجمالى السنوات التى قضيتها بالسعوديه حوالى 11 سنه وانشاء الله عندما تصل ابنتك لسن الدراسه الوضع هيختلف ويكون ربنا رزق بطفل تانى مش هيبقى عندك وقت واعتقد ان العيش بعيد عن الاهل فى بدايه الجواز نعمه ترحمك من التدخلات السخيفه وانا شيفه انك مثقفه تعرفى تستعملى الكمبيوتر والنت وده شىء جميل واعتقد ان ده مرحله وهتعدى والله واعرف ناس مروا بظروفك بس رجوا لبلادهم وكانوا نادمين اشد الندم واذا احسستى بالضيق اذهبى للصلاه وقراءه القران

[سادات]

مش عارفة أقوللك أية بعد الكلام اللي قالوه البنات قبلي .......ربنا يوفقك ويهون عليكي غربتك

[ساره مصطفي]

السلام عليكم ورحمه الله وبركاته
شوفي بقي انا في الغربه من 11 سنه قعدت هنا 6 سنين لوحدي شويه وبعدين مع اولادي دلوقتي عندي 3 زي العسل ربنا يدي كل الناس
اول زواجي كنت زيك ح افرقع ودلوقتي العيال دخلوا المدرسه في مصر بقيت 9 شهور في مصر و3 هنا الاجازه
والله انا باحب الاجازه
بيتي مملكتي
مفيش هنا قالوا وقلنا
مفيش زن كتير زي اللي موجود في مصر
احلي رمضان باقضيه هنا باعرف اصلي واتعبد صح في مصر باقضيها رد علي التليفونات وعزومات مفيش وراها غير الغيبه واحنا بشر
العيال هنا مبسوطين عشان ابوهم وانا باحس اني باتقطع لما بيكلمني يقول باغسل واللا باكوي الهدوم
واللا لما بعيد الشر بيتعب وانا مش معاه
بنبقي ح نتجنن
وبعدين الغربه وحشه جدا للراجل لوحده خصوصا بعد ما يتجوز ويجرب الاستقرار ويجرب وجود زوجه في البيت نصيحه ما تسيبيش جوزك لوحده
عشان الرجاله بيتعبطوا في الغربه والعرفي والمسيار علي راي جوزي الستات ارخص من البطاطس
حاولي تضيعي وقتك مع بنتك
فرصه عشان تتعود علي صداقتك انتي بس
خليها صاحبتك وبنتك وحبيبتك ربنا يرزقك غيرها ويكرمك فيها ويجعلها قره عين ليكي ولابوها

[رشا محمود]

يا رونا يا حبيبتي ، قريت كلامك والله حاسة بيك. انا كمان متضايقة من الغربة ، لكن بصراحة لما الواحد بيفكر بعقله ، هيلاقي ان فيه حوالينا بدائل كتيرة ممكن تهون الغربة دي ، وان شاء الله تكون غربة مؤقتة ، تحسنو مستواكو وترجعو بلدكو ان شاء الله بس في الفترة اللي انتي عايشاها هنا ماينفعش تعيشيها في حزن وكآبة وتنكدي على بيتك وعيالك. والله انا حاسة بيك لاني كمان بامر بالحالة دي كتير ، وبتعدي وبازعل من نفسي اني ضيعت ولو ثانية واحدة نكد على بيتي ، وباتمنى أني اعوضها لهم سعادة وبهجة. بس الوقت اللي بيفوت مابيرجعش. كفاية مشاكل الدنيا والحياة اليومية، وزي ما احنا كلنا حاسين الحياة هنا عملية وجامدة ، ويمكن بقت كده في مصر كمان، يبقى البيت والزوجة يكون عندها الراحة والسكينة والسعادة ، علشان جوزك يقدر يستمر ، شجعيه في شغله ، وبنتك ربنا يخليهالك. تخيلي انا اول ما اتجوزت قعدت 3 سنين من غير خلفة ولا شغل وجوزي عنده دوامين ، كنت هاتجنن وكل يوم انكد عليه وهو مالوش ذنب. احمدي ربنا ان بنتك معاك، خديها واتمشوا في الشارع كده من غير هدف ، هاتليها شوية حلويات وشيكولاته من سوبر ماركت واقعدي على كورنيش او جنينة ، اشتركي في نادي ، روحي مول كبير واتفرجي على المحلات كده من غير هدف. رمضان جاي ماشاء الله بيتهيألي مش هتفضي، انا جاراتي من باكستان ، ومابيعرفوش غير اردو ، يعني مافيش عربي ولا انجليزي والله باكلمهم بالاشارة ، واتفقت معاهم نصلي التراويح مع بعض والله انا مستنية رمضان علشان الواحد يرطب قلبه ولسانه بذكر الله على طول ، ويخف شوية من قسوة القلب اللي بقينا فيها دي. هتقري قرآن ، وتصلي صلواتك كلها بالسنن، والتراويح ودروس بعد التراويح، يا سلام ! ياريت الوقت يكفي
استعيذي من الشيطان وربنا يباركلك في جوزك وبنتك. والحمد لله انك معاه مش سايبك لوحدك في مصر والله ساعتها كنت تعرفي الغربة اللي على حق. يابنتي انا مابقتش اعرف ابات عند بيت ماما لاني باحس اني غريبة! واكيد ستات كتير زي. الواحدة لما بتتجوز خلاص بيتها وجوزها هو كل حاجة . طبعا غربتنا لها تمن ، لكن مش المفروض نستسلم للأفكار السودا والكآبة.
ربنا يزيح همك ويفرج كربك آمين

[رونا]

ام جيهان

ربنا يوفقك ويجعلك دايماً قويه كده ومتكيفه على ظروفك

ربنا ييسر لك كل خير إن شاء الله




zizi soliman

بجد كل واحده واحده بتقولى موقف بتعلم منه وبيساعدنى كتير إنى أخرج من حالتى دى

وزوجى قالها ليا إيش ضمنك لما تبقى وسط أهلك تبقى سعيده

لأنى الواحد ميعرفش القدر مخبيله إيه

أشكرك كل الشكر على كلامك ونصيحتك


سادات

مشكوره على ردك وشعورك بيا


ساره مصطفي

فعلاً إنتى فتحتى عنيا على شئ ،إنى دى فرصتى إنى بنتى تبقى صحبتى وقريبه منى إن شاء الله

هحاول أعمل كل شئ ممكن أقدر أعمله

مشكوره على إهتمامك


رشا محمود

كلامك جميل ونصيحتك أجمل

فعلاً اليوم إللى بيعدى مش بيرجع،، وهستفاد إيه لما أنكد على بيتى ما فى النهايه هما منى

فعلا بيتاثرو كتير بحالتى النفسيه حتى بنتى بتعيط لما تلاقينى بعيط مع إنى سنها سنه ونص

خلاص من هنا ورايح مفيش إستسلام وهعمل كل شئ ممكن أقدر أعمله

أشكرك على الإهتمام والنصيحه

بجد بشكركم من كل قلبى

وجزاكم الله كل خير على وقفتكم معايا