[ayat]

صباح الخير يافتوكات عشان خيرة كل يوم في الاكل عملت جدول اسبوعي ومن ساعتها وفرت كتير وكمان نوعت بصوا بقي
هنحتاج في الاسبوع الواحد عدد 1 فرخة او 1/2 كيلو لحمة للطبخ و1/2 كيلو لحمة مفرومة و1/2 كيلو بانية يلا نبتدي دة لفردين بس
السبت / نصف كيلو خضار اي نوع ( فاصوليا - بامية - بسلة - قلقاس- كوسة -لوبيا ) مراعاة التغير في النوع كل اسبوع +ارز+سلطة+شوربة لسان عصفور+1/2 الفرخة او نصف اللحمة
الاحد / اجازة لان اكيد هيتبقي من الخضار بتاع اليوم اللي قبلة نصف كيلو لفردين كتير وعشان التغيير بحمر جنب الخضار قطعتين بانية +سلطة+ ارز ابيض
الاثنين / اي نوع مكرونة باشاميل اوو مكرونة بولونيز او ( حوواوشي او كفتة ) تنوعي بردة علي حسب الاسبوع +سلطة+ بطاطس شيبسي
الثلاثاء / محشي اي نوع ( باذنجان - ورق عنب- كرنب-كوسة-فلفل -بطاطس ) كل اسبوع نوع+ا/2 الفرخة المتبقي +ملوخية+شوربة+طورشي بلدي
الاربعاء / انا باعمل يوم التلات حلتين محشي صغيرين اسوي واحدة ناكلها واخلي التانية للاربعاء يعني النهاردة محشي بردة وعشان التغيير بحمر جنبة قطعتين فراخ بانية+سلطة
الخميس / كشري اووو عدس اصفر اووو مسقعة اووو عجة بالبيض+بطاطس محمرة اووو بصارة اي حاجة سهلة ومتوفرة عندك
الجمعة / اليوم العالمي للسمك بجيب كيلو ونصف سمك بيكفي وحلوو اووووي + ارز بني+ سلطة طحينة + سلطة خضراء التنويع بيبقي اما سمك مقلي والاسبوع اللي بعدة مشوي اوو فيلية او صينية

طبعا انتي حسب ذوقك الجدول دة محتتش فية لحمة خالص للخضار لاني انا وجوزي بنحب الفراخ اكتر افكار تانية ممكن تعمليها
ممكن في اسبوع تستبدلي نصف كيلو اللحمة المفرومة بنصف كيلو كفتة ارز ودية تكون يوم الاتنين
وممكن تستبدلي الفراخ البانية ببفتيك او كوبيبةاو سبرنج رولز جاهزة وصدقيني الجدول منوع وكل يوم فية لحمة او فراخ ماعدا الخميس اجاااااااااازة

عايزاكم تقولولي رايكم واي استفسار انا مستنية
يا ريت تدعولي بالذرية الصالحة

[ayat]

محدش رد لية الجدول مش عاجبكم اللي عندة افكار تانية ياريت يقولهالنا

[فيحاء]

ازاى بقى محدش يرد
دا موضوع جميل وجدولك جميل
علشان فيه تقريبا كل حاجة اللحمة والفراخ والسمك والأكل الخفيف كمان
انا بعمل تقريبا زى ما بتعملى مع اختلاف الأيام
جزاكى الله كل خير

[موءه]

لا الجدول جميل تسلم ايديكي وافكار حلوه وتنويع طول الاسبوع

[اميويو]

تسلم اديك يا جميل
واهلا بيني ف المنتدي
نورتينا
انا كمان ايات

[العائلة السعيدة]

والله برافو عليكي

ممتازة

انا زيك الخضارالباقي لازم اعمل جنبه اي نوع لحمة تاني يوم
عشان يتاكل

[ميرامية]

انا بس مستغربه الملوخيه مع المحشى دى
المحشى كفايه قوى لوحده وانتى عالمه معاه فراخ يبقى ليه الملوخيه
كمان كيلو ونص سمك ده ليكوا يوم الجمعه واللى بتقسميه على ايام تانيه
لان برضه كتيييييييييييير قوى السمك ده على فردين

بس عموماً الجدول منوع و جميل قوى

[asao]

السلام عليكم لسة مخلصة شغل البيت الموضوع جميل ومهم من حيث التنوع و التوفير بس المحشى مش بعمل معاه حاجه شكرا

[ام سوشي]

جدول حلو ومفيد
جزاكي الله خيرا

[رحيل@@@]

ربنا يباركلك
جزاك الله خيرا