|
رد: قصة"رغم كل شىء" .. صراع بين القلب و العقل و الجسد
استيقظت اميرة من نومها و كأنها لم تنم من قبل .. تشعر براحة داخلية غريبة و اطمئنان نظرت بجانبها ووجدت عمر نائم فاقتربت منه و احتضنته كما كانا قبل ان يناما فهى تريد ان تستمتع بكل ثانية من الامان فى حضنه
و فجأة استيقظ عمر على حركة جسمها بجانبه
حبيبتى .. صباح الخير ,, و طبع قبلة على جبينها
ابتسمت اميرة ..
صباح النور يا حبيبى و نظرت الى الساعة وجدتها الحادية عشر فانتفضت و قالت
عمر .. مروحناش ليحيى يلا قوم نروح نشوفه انا هتجنن على ابنى
اهدى بس .. قال عمر و هو يمسكها من يديها حتى يمنعها من النهوض
انا قلقت الصبح و قمت اتصلت بالمستشفى
و قالولك ايه .. قالت اميرة بقلق
قالولى انه بخير الحمد لله و الزيارة هتبقى الساعة 5
الحمد لله .. الحمد لله يا رب
طب تحبى نعمل ايه لحد الساعة الخامسة
مش عارفة
انا عندى فكرة ..
ايه هى يا ابو الافكار
الفكرة انى اخدك فى حضنى و نرجع ننام تانى
يا سلام .. قالت اميرة و هى تضحك و لكن هذا لم يمنعه ان يحتضنها
و ساد الصمت للحظة و قطعه عمر قائلا
اميرة .. مسامحانى
سكتت اميرة و لم ترد
انا عارف انى ظلمتك و ليكى حق متسامحنيش بس انا والله بحبك و لا عمر حبيت ولا هحب غيرك انا اسف و اللهى يا اميرة و ندمان.. بس انتى ليكى حق متسامحنيش
و هنا قاطعته اميرة ووضعت يدها على فمه و قالت
يا عمر انا مسامحاك من يوم ما شوفتك
و هنا تبسم عمر و امتلأت عيناه بالدموع و قبل يدها و جبينها
وحشتينى اوى يا اميرة .. و حشتنى ضحكتك دى يا اميرة
وانت وحشنى حضنك اوى يا عمر و هنا ارتمت فى حضنه و اخذت تبكى
بس يا اميرة .. بتعيطى ليه بس خلاص من هنا و رايح مفيش عياط ولا زعل مفيش الا كل حب و ضحك و هزار ,, هنعيش انا و انتى و يحيى اسعد اسرة فى الدنيا و مش هنزعل ولا نبعد تانى ابدا مش هضايقك تانى ابدا يا اميرة انا عرفت قيمتك لما بعدتى عنى .. انتى اجمل واحدة شفتها بعينى انتى حتة من روحى انا بحب اوى يا اميرة
و ضمها اليه و كأنه لا يريد ان يفلتها و لكنها ابتعدت و نظرت الى عينيه و قالت
بجد يا عمر .. يعنى هنعيش الحلم اللى كنا بنحلمه سوا زمان انا و انت و ايننا مبسوطين و مفيش حاجة تضايقنا و عمر ما هنبعد ابدااا
ايوا يا اميرة
يعنى مفيش جرح تانى يا عمر .. و لا دموع
دنا اموت قبل ما ازعلك يا اميرة
وعد يا عمر
وعد يا حبيبة قلب عمر .. يا روح عمر و اقترب منها و احتضنها و بدأ يقبلها
و هذه المرة لم تبعده و لم تقاومه كما اعتاد و لكنها استسلمت تماما له و بعد انا ابتعدت عنه قالت
يااه تصدق يا عمر طعم تانى خالص و انت جوزى .. احلى الف مرة من اللى عملناه زمان و عشانه ضيعنا من بعض .. مفيش احلى من ان ربنا يبقى راضى عننا يا عمر
اكيد طبعا يا اميرة .. قال و هو يضمها اليه
بس يا اميرة ..
ايه يا حبيبى .. قالت و هى تطبع قبلة على يديه
هو احنا مش هنجيب اخ ولا اخت ل يحيى ولا ايه
ضحكت اميرة و بدأ هو يقبلها مرة ثانية و لم تقاومه اميرة فهو زوجها حبيبها .. و سكتت شهرزاد عن الكلام المباح
فتحت اميرة عيناها وجدت عمر ينظر اليه و هو يحتضنها
ايه ده انا نمت .. قالت اميرة و هى تبتسم
ايوا يا حبيبى .. ملاك نايم جنبى .. ايه ده دنتى قمر حتى و انتى نايمة و طبع قبلة على يديها
و قطع ذلك تليفون عمر و هو يرن
مدت اميرة يدها و ردت
الووو مين معايا
ايوا .. اميرة .. انا طارق
ايوا يا طارق ازيك يا جميل .. قالت و الفرح ظاهر عليها
تمام يا اميرة .. امال عمر فين
عمر جبنى اهه .. عايزه
اه لو سمحتى
طب تدفع كام ونا اديهولك
ايه ده ايه ده دنتى مزاجك رايق اوى .. اللى يشوفك كدة ميقولش ان ابنك فى المستشفى
يحيى الحمد لله بقى كويس يا طارق هنروح نشوفه الساعة خامسة
طب انا عايز اجى اشوفه معاكم
اكيد ..تعالى معانا عادى
طب بقولك ايه ما تيجوا نتغدا سوا بعدين نطلع على المستشفى كلنا
ماشى فكرة حلوة ..ثانية واحدة يا طارق
ايه رأيك يا عمر نروح نتغدا برا مع طارق
فكرة حلوة اوى .. قال عمر
ايوا يا طارق خلاص ماشى انا هكلم سارة و اقولها تجيلنا على المطعم على طول
لا متتعبيش نفسك سارة معايا هنا اهه
خلاص احنا هنجى دلوقتى
ماشى و احنا مستنينكوا
مع السلامة
يلا يا حبيبى نقوم نلبس عشان نتغدا معاهم و نروح نجيب يحيى من المستشفى
ماشى يلا
و ارتدى عمر و اميرة ملابسهما و توجها الى سيارتهما و الفرح يملأ عيناهما و الحب ظاهر عليهما كأنهما عريس و عروسته فى شهر العسل
و بالفعل رغم ان عمر و اميرة تزوجا من مدة الا ان هذه اول مرة يتعاملا سويا ك زوجان طبيعيان دون اى لوم او شجار
و وصلا الى المطعم و دخلا المطعم سويا يداها فى يده و هم يتهامسان من الحين و الاخر و يضحكا سويا
و ما ان رأهما طارق و سارة حتى سقطت افواههما من الدهشة
ايه مالك يا عم طارق تنحت كدة ليه .. قال عمر و هو يضحك
اصلى مش مصدق اللى انا شايفه
صحيح يا اميرة ايه اللى انا شايفاه ده .. لو معرفكوش اقول انكوا اتصالحتوا
ايوا يا سارة انا و عمر اتصالحنا و نظرت اليه و عيناها مليئة بالحب و بادلها هو نفس النظرة
اتصالحتوا ازاى !!! انتى مش قولتى عمرك ما هتسامحيه يا اميرة .. قالت سارة
صحيح ازاى بعد كل اللى حصل ما بينكم ده تتصالحوا .. انا قلت انكوا اتجوزتوا عشان ابنكوا بس عمرى ما كنت اصدق ان الحب اللى بينكوا يرجع تانى .. ده مستحيييييييييل .. قال طارق و الضيق واضح عليه
فيه ايه يا عم طارق مالك متعصب كدة ليه المهم اننا اتصالحنا الحمد لله .. قال عمر
ايوا يا جماعة ايه انتوا مش فرحانين لينا ولا ايه .. انا و عمر مبسوطين اوى الحمد لله و بقينا مبسوطين اكتر من الاول .. قالت اميرة و الفرحة ظاهرة عليها دون ان تتحدث
لأ فرحانين طبعا .. و نظر طارق و سارة الى بعضهما و تصنعا الضحكة
و طوال الغداء اخذت اميرة و عمر يتبادلان نظرات الحب و يهمس فى اذنها كل الحين و الاخر و هى تضحك من قلبها
و طارق و سارة لم ينطقا بأى كلمة الا حين يتحدث اليهما عمر او اميرة و يكتفيان فقط بمشاهدة عمر و اميرة
مسلسل الحب ذاك الذى لم يرياه منذ 6 سنوات المسلسل الرومانسى الذى حين يراه اى احد يتمنى ان يكون هوالبطل من حلاوته
يلا بقى يا جماعة نقوم عشان احنا كدة اتأخرنا على يحيى .. قالت اميرة
ايوا يلا عشان نقوم نجيبه بسرعة .. ثم همس عمر فى اذن اميرة قائلا عشان نلحق نجيبله اخ
و ضحكت اميرة و قالتله : اسكت بقى
و ركبت اميرة مع عمر و رفضت سارة ان تركب معهم و ركبت مع طارق
و فى اثناء الطريق قالت سارة و هى تفتح شنطتها بعصبية
ازاى رجعوا يعنى !! اميرة دى مجنونة ولا ايه ازاى تأمنله بعد اللى عمله فيها تلاقيه ضحك عليها بكلمتين حب ولا ببوستين ماهى طول عمرها ضعيفة قدامه
و اخرجت علية سجائر من حقيبتها و اشعلت سيجارة
ايه ده يا سارة انتى بدخنى
اه يا طارق .. من غلبى اهى حاجة الواحد يطلع فيها خنقته .. تاخد
لا انا مبدخنش عشان صدرى و الكورة
مالو صدرك يا طارق
اصل انا عندى ربو ف ياريت تبعدى الدخان عنى بس
اه سلامتك .. و القت بالسيجارة من الشباك
و انتى يا سارة متجوزتيش ليه لحد دلوقتى
و اتجوز ليه يا طارق .. كله محصل بعضه ادى الواحد مقضيها عايشة بمزاجى اخرج وقت منا عايزة اشرب سجاير اشرب اى حاجة براحتى محدش بتحكم فيا
بس الجواز مش وحش اوى كدة .. اديكى شايفة عمر .. و اميرة فرحانين ازاى
يادى عمر و و اميرة .. انت لسة كل ده يا طارق منستش
انسى ازاى يا سارة .. دى فى عز ما كان عمر ضيع حياتها و مستقبلها عرضت عليها اتجوزها عشان متتفضحش تخيلى قبلت اتجوز واحدة غلطت لأن حبى ليها اكبر من غلطتها بكتيير و هى اللى رفضت قال ايه عشان هى رغم ان هو جرحها هى ليه و بتاعته هو و متقدرش حد يلمسها غيره
و هو اصلا ميستاهلهاش .. اميرة دى حبيبتى انا.. انا اللى اقدر اخليها مبسوطة انا اللى عمرى مزعلتها ولا عمرى رفضتلها طلب .. طول عمرى واقف من بعيد بتفرج عليه و هو بياخدها منى و عشان سعادتها اهم من سعادتى كنت دايما بصالح بينهم و اشوف الحب ما بينهم يرجع و انا بتقطع من جوايا و كل ده و هى مش حاسة !!
عارفة يا سارة احساس يموت لما تبقى بتحبى حد قوى قوى و هو حتى مش شايفك ولا حاسس بيكى
لأ صدقنى عارفة يا طارق .. و صدقت سارة فيما قالت بقد كانت تشعر بكل كلمة يقولها طارق ,, فما يعانيه هو من حب اميرة ل عمر تعانيه هو من حبه لأميرة فقد كانت تعشقه لكنها كانت تعلم تماما ان لا يرى ولا يحب سوى اميرة ف ملت من ان تظهر هذا الحب له و هو لا يشعر.
وصلا المستشفى و جرت اميرة على حجرة ابنها و احتضنته و اطمئنت انه بخير
و جلست سارة و طارق يلعبان معه و هم عقلهم فى عالم اخر .. وذهبت اميرة و عمر معها ليسألا الدكتور على صحة يحيى و متى يستطيعان ان يأخذانه
هناخده امتى يا دكتور .. ؟ قالت اميرة
سيبوه معانا يوم تانى نخليه تحت الملاحظة و ممكن تخدوه بكرة زى دلوقتى ان شاء الله
يعنى هو بخير و مفيش اى قلق .. لو محتاجين احنا ممكن ننقله مستشفى تانية .. قال عمر
مستشفى تانية ليه بس احنا هنا عملنا كل اللى يتعمل و هو بخير الحمد لله هو بس عشان اول طفل ليكوا ف انتوا خايفين زيادة عن اللزوم بكرة ان شاء الله تعالوا خدوه
ماشى يا دكتور الف شكر ..
ثم ذهب عمر و هو يمسك اميرة بيداه الى غرفة يحيى و جلسا يلعبا مع ابنهما و طارق و سارة يشاهدان هذه الاسرة السعيدة دون ان ينطقا بكلمة
ثم انتهى معاد الزيارة و ركبت سارة مع طارق و رفضا الاثنان دعوة اميرة و عمر للعشاء و قالا لهما انهما مشغولان و لكن الحقيقة هى ان طارق لا يحتمل رؤية اميرة بحضن غيره و سارة لا تحتمل رؤية طارق و هو ينظر ل اميرة بكل هذا الحب ولا يراها هى .. فتركهما عمر و سارة على راحتهم و توجها لمنزلهم
طارق .. انا مخنوقة
و انا اكتر يا سارة
طب شوفلنا اى night club نسهر فيه لحسن انا على اخرى
حاضر
و بالفعل توجها الى احدى الديسكوهات و جلسا سويا
و لكنهما لم يتحدثا الا قليلا فطارق سرحان يفكر بحبيبته التى لا يقدر ان يتزوج غيرها و لم يدق القلب الا لها
و سارة تفكر بحبيبها الذى بجانبها و باله مشغول بأخرى
و طلبت سارة خمور و اخذت تشرب و تدخن بشراهة حتى ثملت
يااه يا سارة دنتى شكلك سكرتى خالص هتروحى ازاى كدة
و اروح ليه يا طارق .. عشان اتفرج على اميرة و عمر و هما نازلين حب فى بعض و انا لوحدى مليش حد
ازاى ملكيش حد يا سارة .. امال انا روحت فين
بجد يا طارق .. يعنى انتى حاسس بيا .. قالت و الثمالة ظاهرة عليها
اكيد طبعا يا سارة انا جنبك دايما
و هنا اقتربت منه و بدأت تقبله و لكنها ابعدها
سارة انتى بتعملى ايه .. انتى اتجننتى
بعمل ايه يا طارق .. ايه معجبتكش البوسة
اللى انتى عملتيه يا سارة ده غلط
غلط ليه دنا استنيت الوقت ده من زمان .. طول الوقت اللى انا كنت فى امريكا فى و انا مستنية ارجع و اشوفك مرة كمان كل واحد عرفته كنت بدور عليك فى
بس دى احلى بوسة فى حياتى .. و اقتربت منه لتقبله مرة اخرى و لكنه ابتعد ايضا
سارة انتى يظهر انك سكرتى و لازم تروحى بقى
ليه بس يا طارق
عشان اللى انتى بتعمليه ده غلط .. انتى اختى يا سارة و انا خايف عليكى
اختك .. قالت سارة بحسرة
خلاص روح انت يا طارق و سبنى انا عايزة اعد لوحدى
و بالفعل تركها طارق و روح و هو يتعجب من هذا الكلام العجيب الذى تقوله
و جلست سارة تكمل سكرها و تدخن كما كانت و تراه يبتعد عن ناظرها خطوة بخطوة و هى تعلم ان تلك القبلة لن تتكرر و قالت .. كل بسببك يا اميرة !!
و فى هذه الاثناء كان عمر و اميرة قد انهيا عشائهما و جلسا سويا يجددان وعود الحب بينهما و عادا مرة اخرى الى حياتهما القديمة المليئة بالحب و العشق .. فأميرة لعمر و عمر لأميرة رغم كل شىء .
|
