[مريهان1984]

بسم الله الرحمن الرحيم
قبل ما ادخل فى الموضوع دى قصة واحدة من اعز اصدقائى
وهى الان تعيش فى حزن والم عرضت على مشكلتها
قولتلها مفيش غير فتكات عشان ناخد راى كل الفتوكات فى موضوعك
وانا عن نفسى هقول لكم وجهة نظرى فى الموضوع بس بعد لما احكيلكم
صديقتى دى متجوزة وقاعدة فى نفس بيت حماتها بس كل وحدة فيهم فى شقة
كانوا الاول عيشين مع بعض فى عيشة واحدة وطبعا فاهمين مامعنى عيشة واحدة
ومن بعد 3 شهولر من الزواج بدات تظهر الخلافات كانت فى الاول عادية
بعد كدة كبرت المشاكل(على حد قول صديقتى انا مسمعتش من الطرف الاخر)ولم يعدوا يحتملوا ان يعيشوا مع بعض (مع العلم ان المشاكل كلها بينها وبين حماتها لكن الحياة بينها وبين زوجها مستقرةالى حد ما وهو اللى مظلوم فى النص)بعد اراء الاقارب انفصلوا وكل واحدة تعيش حياتها حسب ما هى شيفاها وزوجها على طول عند والدتة مسبهاش يعنى
بعض الاوقات ياكل معاها وبيقعد معاها على طول ومشى الحال كدة هادى لحد ماهو جه اليومين دول وبيجبرها انها تنزل تفطر فى رمضان عند حماتها معاه لانه هيفطر معاها كل ايام رمضان ولو معملتش كدة بيقولها روحى اقعدى فى رمضان عند اقاريبك-مع العلم ان صديقتى دى مدمرة نفسيا وغير مهياة لاى نوع من المعاملة مع حماتها-وهى بتقولى انه عايز يحط النار جنب البنزين تانى وهى لما صدقت تعيش فى هدوء الى حد ما لان نزولها يمثل لها ولاى اى حد يعرف الظروف اللى بتمر بيها مشاكل لا حصر لها
انا مش عارفة بصراحة اعملها اية ياريت كل اخواتى الفتوكات يدوها نصيحة لانها نفسيا وصحيا تعبانة اليومين دول قوى معلش انا طولت عليكم بس فعلا الموضوع مهم

انا قولتلها حلا لهذا الموضوع انه ياكل يوم مع والدته ويوم معاها بحيث لا يظلمها ولا يظلم والدته ايه رايكم فى الحل الوسط دة مستنية ردودكم قبل دخول رمضان علشان تطلع من حيرتها دى وتستريح

اذا اعجبك الموضوع و اردت نشره في المنتديات الاخرى فاستخدمي هذا الرابط:
ضرورى تدخلوا يافتوكات كلكم وتقولوا رايكم
http://forums.fatakat.com/thread51231

[monee_2020]

السلام عليكم ازيك يا مريهان
اولا حبيبتى فيه ناس مش بتريح ولا بتستريح والله عندى بس هو حمايا وطبعا مرات ابو جوزى ربنا يهدهم
المشكله انه لما تكونى طيبه مع الناس وبعدين محدش يغصب عليها هو رمضان جى وهى هتتغم وبعدين هيا مش عيزه تفطر معاهم حرام كده حد يغصب عليها
ولا يكون هما اصلا عارفين انها ماحاتنزلشى تفطر معاهم يودوها تفطر عند قرايبها هو ده كلام جوزها يفطر فى اى حته هو عايزاها ومحدش فى الدنيا يجبرها انه تفطر او تطلع بره بيتها هما حيتحكموا فى اللقمه اللى داخله بقها كمان وهما مالهم
ولا يمكن عايزين يطفشوها من الشقه وندموا انهم حطوها فيها
زى ما كانت مرات ابو جوزى الخبيثه حاتعمل كان جوزى بيشتغل بعيد ولما كنت عايزه ابقى جنبه فرحوا اوى انى حاروح معاه وكانوا حياكلوا الشقه علينا لولا انه بابا قالى استحملى لو طلعتى مش حتيجى تلاقى لك حاجه

وبعدين حلك ليها حلو بس هى حره تاكل فى الحته اللى تعجبها حتى لو ما كلتش خالص هما حيستنهزوها فرصه يدايقوها تانى ولا ايه حسبى الله ونعم الوكيل فى كل من يظلم الناس

[mashmosha]

انا شايفة يا مريهان انها مادام مش راضية ولا قادرة نفسيا انها تروح بلاش علشان الدنيا ما تزيدش سوء واقتراحك حلو بس هو ممكن ما يوافقش ويصر انه يفطر مع مامته كل يوم فى الحالة دى انا شايفاها تروح عند حد من اهلها تفطر معاه او تجيبهم يفطروا معاها وممكن تعزم اصحابها كنوع من الونس وانها بردوا تعرفوا انه زى ما استغنى عنها كده بسهولة هى كمان تشوف نفسها لكن انا شايفة ان الاجبار فى حد ذاته شىء قاسى وغير مقبول

[ام سراج]

يعني سبحان الله
نقول رمضان بالفم بس..لكن افعال مفيش
جوزها ناسي..كلام ربنا؟ ليه يعمل معاها كده؟ لوي دراع؟
عموماً اهم حاجه انها ماتطلعش من بيتها...زي ما قالت monee
هو براحته..مش ح تحجر عليه..وفي رب يحاسبه على عدم العدل بين مراته وامه
لأنه مسئول عن مراته قدام ربنا..ومش مسئول عن امه إلا في برها..واديه عداه العيب..بر مفيش بعد كده
لكن هي تفطر في بيتها..وممكن تجيب حد يفطر معاها.زاو تعتبر نفسها واحدنيه زي ناس كتير وتفطر وحدها..وتستعين بالصبر والصلاه عسى الله يغير ما بالنفوس

[أم أدهم ولولوو وسيف]

رمضان كريم وبمناسبة الشهر الكريم ابداي بالخير وانزلي لحماتك وافطري معاها واعملي انتي الفطار يوم عندك ويوم عندها يعني كلكم تفطروا مع بعض يوم عندك ويوم عندها وانتي بكدة بترضي جوزك وبتعاملي ربنا وبتكوني بارة بيها عشان ربنا يبارك ليكي في حياتك وبكرة انتي هتبقي مكانها انا زمان كنت بتضايق كدة من حماتي لاني بردو في بيت العيلة بس المعاملة الحلوة اللي هاتبداي انتي بيها هيكون ليها اثر كبير في نفس زوجك وثواب اكبر عند ربنا وكل سنة وانتي طيبة

[الزهره الحزينه]

وانا بضم صوتي لام سراج وبقولها ما تطلع من بيتها وتفطر في ومعلش تتحمل شويه مصيرو يراجع نفسو ويعرف انو مقصر في حقها

[m.moon]

بصى يامريهان انامقدرة موقف صحبتك جدا وخصوصا الحالة النفسية بتاعتها والله هى تحاول لو قدرت يبقى خير لو مقدرتش طبعا معذورة بس تسيب جوزها براحته متقولوش حاجة وهو من نفسه هيعدل وهيحس بيها من غير ما يبقى مضغوط وهى تفطر فى بيتها متخرجش بره وطمنينا هى عملت ايه

[bobo]

والله انا شيفة انها تعتبر حماتها امها حتى لو ضايقتها تتحملها وخصوصا لو كبيرة فالسن والله في ناس تحيرهم بالادب والدوق ايه تفطروحدها ولا تعزم ناس جوزها مش حيعديها لها ايه لما ناكل لقمة مع بعض وكل واحد يروح لصلاته لما ننصح اي حد ننصحه للخير مش العند والسخط والي ايده بالمية مش زي الي ايده فالنار ويارب تهدي الجميع ارجوكم خلوكم محضر خير في كل مجلس عسى يكون الصلاح من كلمة طيبة

[حنانو]

والله يا جماعة رمضان يحب اللمة وأنا ببرأيي تعمل خاطر لزوجها وتنزل تفطر معاها للأن ربنا حيطرحلل البركة ان شاء الله لأن يا أختي كما تدين تدان وأنتي فهم قصدي وبدون زعل.

ورمضان كرييييييييييييييييييييييييم.

[نوشا]

بصى انا عارفة انه لما بيكون فى مشاكل
بيبقى صعب جدا التعامل لان النفوس بتكون شايلة
بس رمضان شهر الخير
تدعى ربنا اولا انه يكرمها
وتحاول فعلا انها تنزل وتفطر
هيكون اد ايه يعنى نص ساعة
تقول فيها كلمة طيبة وابتسامة طيبة
ولا تعلم جايز الامور تتصلح
واذا لقت ان الدنيا برضه بايظة
خلاص تخليها ف شقتها وتفطر مع نفسها
بس وقتها جوزها هيعملها خاطر
لانه هيحس فعلا انها جت على نفسها
بس الواقع ف الاخر برضه بيفرض نفسه
وممكن يحاول هو يرضيها
لكن لو ثارت عليه دلوقتى او قالت هفطر لوحدى
مش هيشوف غير انها انانية ومش بتشوف غير نفسها
خصوصا انك مقلتيش الحماة دى عايشة لوحدها ولا معاها حد
وبصراحة لو عايشة لوحدها هلتمسله العذر جدا
خليها بس تدعى ربنا
وربنا يهدى سرها
وتطمنينا عليها

[نزهة]

وانا بضم صوتي للاخوات للشافو انها تنزل لحماتها خصوصا واحنا على ابواب شهر فضيل وكريم الله يهدي النفوس ويفتح لصحبتك ابواب الخير وقلب حماتها والله مفي احسن من الصلح يا اختي وصدقيني هي حتكبر في عين جوزها لو تنازلت واكيد حيراجع نفسو ويعملها خاطراكيد وانا متاكدة لو هي مظلومة لا يمكن ربنا يتخلى عنها مهما حصليكفي انها تقدم الخير وتكون هي بتدت به وتصلي وتدعي ربنا ينصرهافنحن كمان حندعيلها ربنا يوفقها ويزيح عنها

[IMAN SALAH]

انا عندي راي ايه رايكم لو تعزم حماتها علي الفطار عندها وبكدة تبقي ضربت عصفورين بحجر ولو حماتها رفضت هايبقي هي اللي حق عندها وقدام جوزها هاتفهمه انها بتحاول توصل حبل الود ومافيش مانع لو مرة كده فطرت معاها ولو حاجه ضايقتها تحاول تكون هادية وماتردش عليها بس تقول لجوزها انا حاسة ان وجودي هايضايق مامتك واحنا في شهر كريم مافيش داعي اخليها تاخد سيئات فا انا هافطر فوق لوحدي ولو حابيت في يوم تفطر معايا براحتك ولو حابيت تفطر معاها برضه براحتك انا ماعنديش مشكلة
وبكده تكون ماعندتش معاه وبرضه مين عارف يمكن لو عزت حماتها علي الفطار ده يهدي النفوس بينهم شويه وربنا معاكي ويقويكي وينصرك لو انتي مظلومه

[مشتقالك اوى]

انا رائي معاكى يا ايمان رائيك حلو وسياسي هينفع

[toto s]

البنات حكو كل اللي لازم ينحكى
وربنا يكون في عونها ويصبرها

[مريهان1984]

شكرا لكل الفتوكات اللى شاركوا برايهم
انا على فكرة بلغتها بردودكم بس قالتلى حاجات غريبة
1- قالتلى ان اللى كان رايهم النزول مش حاسين النار الى جواها لان هى جربت بعد كل مشكلة تيجى عل نفسها وعشان خاطر جوزها وتنزل يحصل مشاكل تانى
2- هو مانع قاريبها يجوا لها عشان ثاروا علية مرة من المرات وهو مغضبها عشان خاطر والدته يعنى مش هتعرف تجيب حد يفطر معاها
3- حاولوا انها تاكل معاهم فوق عملت بردة مشاكل وقالت انها متنفعش تاكل فوق ونزلتها غصب عنها وبتهديد جوزها بردة وكلت تحت لمدة 10 ايام وبعد كدة حصلت مشاكل كتير والنا س اللى حلوها قالوا ان كل وحدة تبقى فى عيشة منفصلة
**انا مش عارفة والله اعملها ايه فانا لااملك غير ان ادعو لها بالصبر والهداية
وشكرا لتواصلكم معانا
نسيت اقولكم هل هى هتقدر تفطر لوحدها طول هذا الشهر الكريم ولا تطلب انها تروح بعض ايام تفطر مع اهلها

[مروة الدميري]

ربناريكون فى عون صحبتك يصبرها بس معلش يا جماعة احنا بنقول تنزل تفطر عند حماتها ماشى الكلام جميل وياريت تقدر تنفده بس المشكلة ان نزولها ح يزود المشاكل
انا رايى انك تطبخى فى بيتك وتنزلى الاكل ساعة الفطار وتفطرى و تطلعى شقتك على طول عشان ميكنش فيه اى مجال للاحتكاك وفى نفس الوقت تكونى رضيتى جوزك واحنا على اعتاب شهر كريم

[Noorseed2006]

انا شايفة انه ما ينفعش نقول رأينا فى حاجة مش عايشنها بنفسنا
يعنى ايه؟؟؟ يعنى يجوز ان الحماه دى طيبة (احتمال) .. ويجوز انها ست لا تطاق (وارد برده) بس خلاصة الكلام ان احنا حاليا عايشين زمن البنى ادم مابيتحملش يعيش مع اى حد .. حتى لو الحد ده امه مش حماته .. والكلام ده عن تجربة شخصية .. وربنا يهدى