[omreemo]

بهارات الكنتاكى

مقاديرها هى


المقادير
ملعقة طعام روز ماري (حصى البان)
ملعقة طعام أوريجانو او زعتر
ملعقة صغيرة زنجبيل بودرة
ملعقة صغيرة بردقوش
ملعقة صغيرة ونصف زعتر
3 ملاعق طعام سكر بني
3 ملاعق طعام بقدونس جاف ومهروس
ملعقة صغيرة فلفل اسود
ملعقة طعام بابريكا (فلفل أحمر حلو بودرة)
2 ملعقة طعام ثوم بودر
2 ملعقة طعام بصل بودر
2 ملعقة طعام مكعب خلاصة مرقة الدجاج مفتت أو 2 مكعب او كيسين مرقه فوريه
كيس بودرة شوربة طماطم (مثل من ماجي أو غيره)
الطريقه بقى اعرفها كويس انتى بتخلطى التوابل دى على بعض
وتاخدى جزء تتبلى به الفراخ بعد ما تسلقيها نص سلقه وتنقعى الفراخ بالخليط المتكون من علبه زبادى او نص كوب لبن رايب الاتنين نفس النتيجه
مع معلقه ونصف من خليط التوابل دا
وتتركيها مالايقل عن 3او4ساعات بالتتبيله دى
نجى للقلى فى طريقتين كلاهما حلو
هتجيبى بياض بيضتان مع معلقه من التوابل دى و3ملاعق دقيق اصفر بتاع دزة صفرا ومعلقتين كورن فليكس مجروش ومعلقه دقيق
الطريقه تربى بياض البيض وتحطى عليه دقيق الذرة والدقيق العادى والكورنفليكس
وبعدين تطلعى الفراخ من التتبيله وتوضع فى الخليط الى هيفكرك بخليط القرنبيط تحطى بالخليط دا وتقلى بالزيت الى فى الاول يكون نار عاليه وبعدين وطى خالص لحد ماتستوى وتحمر
دى طريقه
الطريقه التانيه تطلعى الفراخ من الخليط على دقيق ثم بيض ثم البقسماط المكون من دقيق ابيض ودقيق ذرة اصفر وكورنفليكس مضاف لهم معلقه من بهارات الكنتاكى الى عملناه فى الاول
وتقلى فى الزيت بنفس الطريقه زيت سخن وتوطى عليه لحد ماتتحمر
لا تنسى طبعا انك تقطعى الفرخه على 8اجزاء او 10

البقدونس المجففبالنسبه للبقدونس حزمتين بقدونس قرطفيهم واغسليهم وفى الشمس يومين تلاته وهبقى عندك احلى بقدونس مجفف مغسول ونضيف

بهارات الاكل الصينى
اولا حاجه لازم تدخل فيه هو الملح الصينى"اجينى موتو" دا بينضاف وقت تتيبل الاكل الصينى زى الجمبرى واللحم وغيرة من وصفات الاكل الصينى لكن احذرى بان الملح الصينى للاسف مسرطن فتجنبيه واحذرى استخدامه
نيجى بقى للتوابل
بصى برضه رغم ان هنضيف فى البهار الصينى الجنزبيل البودر الا انه لابد من توافر الجنزبيل الاخضر الفريش وهو دلوقتى بقى متوفر اوى غير زمان بقى موجود تقريبا فى اغلب المحلات وكمان والله شوفتهم واقفين بيه امام محطات المترو هو والشمر الافرنجى والكرفس الافرنجى
التوابل بقى عبارة عن
معلقه فلفل ابيض
معلقه جنزبيل بودر
نص معلقه قرفه ناعمه
نص معلقه توم بودرة
3حبات من الكبابه الصينى
نص معلقه شمر مطحون
تخلط كل المقادير ويتبل بيها الاكل
وبس كدا الف هنا

الفيجيتار
اول خطوة علشان ينجح معاكى ويطلع زى بتاع برة لازم تلتزمى بانك تطحنى البهارات الى هقولها مع البقسماط جدا علشان يبقى زى الفجيتار الاصلى
نصف معلقه ببريكا
نصف معلقه جنزبيل مطحون
ربع معلقه فلفل اسمر مطحون
نصف معلقه فلفل ابيض مطحون
معلقه بقدونس مجفف
ربع معلقه يانسون
حبتين كبابه صينى
نص معلقه كمون ناعم
نصف معلقه كزبرة ناعمه
نصف معلقه ريحان مجفف ومطحون
نصف معلقه زعتر ناشف ومطحون
نصف معلقه روزمارى مطحون
ممعلقه طماطم مجففه
معلقه كبيرة ملح
نصف معلقه توم بودر
نصف معلقه بصل بودر
بصوا بقى هتطحنوا كل المكونات على بعض لو عوزاه حار يبقى هتحطى معلقه كبيرة شطه حمر ا
المهم البهارات دى تطحن ناعم جدا جدا ومتحطيش الملح الا بعد ما تطحن مرة وبعدين ضيفى الملح واطحنى تانى
هتجيبى بقى نص كيلو بقسطام من اى فرن وهتحطى على كل نص كيلو بقسماط ناعم 3ملاعق دقيق
وضيفى التوابل على البقسطام وقلبى وابدئى تانى فى الكبه اطحنى البقسماط على التوابل على الدقيق كى ينعم الخليط ويتجانس ويتداخل الطعم
حطى البقسماط فى علبه او كيس واغلقيه واسحبى منه حبه حبه حسب استهلاكك
على فكرة لو عاوزة البقسماط مقرمش اكثر ضيفى معلقتين او تلاته كبار ذرة صفرا ونصف كوب كورن فليكس مجروش بس على فكرة الذرة والكورن فيلكس ماينفعوش عير فى تحمير الفراخ بس لكن مع البفتيك بيطلع ناشف ومادئد

الصوديوم

الصوديوم فى حد ذاته غير ضار الا اذا زادت نسبته فهو بيدخل على ضغط الدم وبيرفعه الا طبعا لو استخدم بحرص والصوديوم دا له فروع كتير منها واشهرها ملح الصوديوم ومنها كمان بيكربونات الصوديوم ودى الى بنسميها الكربوناتو دى برضوا لازم تستخدم بحرص لانها كمان بتضر بالامعاء لو استخدمت بكثرة لكن النسبه المعقوله لى لاتزيد عن نصف معلقه مثلا منها لايضر كمان بنزوات الصوديوم ودا بيستخدم للاسف فى البيسبى الدايت بالذات وهو للاسف مسرطن علشان كدا يمنع منعا باتا تناول البيسبى او السفن او اى مشروب غازى دايت لانه مسرطننيجى بقى للمونو صوديوم ودا بيستخدموه للاسف فى البطاطس الشبسى وهو مادة ملونه لونها احمر او اخضر او مائل للزرقه ايضا دى كلها الوان مشتقه من المونو صوديوم وهى بلا منازع او شك مسرطنه فهى تقوم بالشغل على خلايا المخ علشان كدا بينصح طبعا بعدم اكل الشبسى بالذات الملون منه الى بالكاتشب والطماطم والمستطردة والفراخ والكارى وغيره من الالوان الى بيثبتها المونوصوديمجربى كدا انتى اعملى الشبسى بالبيت وحطى عليه مثلا البابريكا علشان تعملى اللون الاحمر دا برضوا مش هتوصلى له لانه فى المصانع بيستخدموا المادة دى وقت قلى الشبسى

طريقه بهارات الكارى
طبعا اغلب ستات البيوت بيستعلمن الكارى طب ياترى هو متكون من ايه اقولك ياستى
معلقه بباريكا
معلقه كزبرة
معلقه كمون
معلقه ونص كركم
نص معلقه شطه "لو بتحبى الكارى حار حطى معلقه"
نصف معلقه جنزبيل بودر
نص معلقه حبهان مطحون
دا ياستى الكارى هتخلطى كل المكونات مع بعض فى الكبه ويبقى عندك الذ كارى

[omreemo]

خلطة بهارات الفاهيتا

المقادير


3 ملاعق طعام نشا الذرة
2 ملعقة طعام فلفل أحمر بودرة(بابريكا) .
1ملعقة طعام ملح
1 ملعقة طعام سكر .
2 ½ ملعقة شاي مكعب مرقة دجاج ناعم .
1 ½ ملعقة شاي بودرة بصل .
½ ملعقة شاي ثوم بودرة .
½ ملعقة شاي فلفل أبيض .
¼ ملعقة شاي فلفل أحمر شطه .
½ ملعقة شاي كمون ناعم

طريقه البرجر وبهاراته
كيلو لحم ومعه قطعه ليه صغيرة
بيضه
كوب بقسماط
توابل بقى عبارة عن معلقه ببريكا لو حبتيه لون السوف ضيفى معلقه كبيرة
نص معلقه كزبرة ناشفه
نصف معلقه كمون
نصف مقلعه قرفه ناعمه
نص معلقه فلفل اسود
لو حبيتى تطعى كميه اكبر وتكون طعما شبهه البرجر بتاع الشارع حطى نصف كوب فول صويا"بس انا مش بحب طعمه فى البرجر "
اخلطى كل المكونات مع بعض واعملها كور صغيرة وبططيها بشكل اقراص صغيرة بشكل البرجر والف هنا ياقمر

خلطة بهارات الشاورما "اللحم فقط"

المقادير

1ملعقة طعام كمون ناعم .
1 ملعقة طعام كزبرة ناعمة .
1 ملعقة طعام بودرة ثوم .
½ ملعقة طعام بابريكا .
1 ملعقة شاي كركم .
½ ملعقة شاي مسمار او قرنفل ناعم .
½ ملعقة شاي فلفل أبيض .
1 ملعقة شاي زنجبيل ناعم .
1 ملعقة شاي فلفل أسود ناعم .
½ ملعقة شاي قرفة ناعمة .

سلطه الطحينه انا بجيب شويه كمون وشويه شطه وادقهم بالتوم واحط عليهم لمونه ومعلقتين كبار خلوانزل على الطحينه وافضل اقلب هتتقل اروح فاتحه الحنفيه سرسوب تحت الطبق الى فيه الطحينه واقلب اقلب اقلب لحد ماوصل للتقل الى انا عوزاه بس اغرفها بقى فى طبق واحط على وشها اوراق بقدونس للتزين او زتون او شرايح جزر اى شىء للتجميل وممكن كمان احط شويه بهارات على الوش يدو لون بدل البقدونس والزتون برضوا بتدى تست حلو اوى

علشان تضيعى ريحه الحلبه فى طريقتين
اما تحمصيها شويه فى الفرن خمسه دقايق بس
او اعمليها باللبن هتقلل احساسك بالريحه شويه
بس على فكرة الحلبه ممتازة فى حاله الوضع والرضاعه جدا ومفيدة جدا جدا ولذيذه حتى لو بتعمل ريحه
كمان ممكن تطحنى الحلبه شويه مع حبه البركه وتسفيها كدا برضوا مفيدة للرضاعه والمغص الى بعد الولادة

الحلبه ممتازة وكمان الكراويه والشمر وكمان العصاير لكن فى الاول احترسى من عصير المانجو والفراوله اول شهر او اتنين بعد الولادة علشان بتعمل عسر هضم للبيبى دا الدكتور قالو لى لما ولدت كمان كلى تفاح وموز علشان الحديد والبوتاسيوم وكلى فجل وجرجير لو خايفه من الغازات هاتى بذور فجل وبذور جرجير وسفيهم كدا او اطنيهم نص طحنه وقبل كل دول طبعا المغات ماتسيهوش

لو واحدة فيكوا اشترت البيتزا بتاعت ماى واى هتلاقى كيس جوا كدا تحطيه على الصلصه مكتوب عليه خلطه البهارات الايطاليه صح ولا لاء
هقولكم بقى الكيس دا مكوناته ايه
معلقه زعتر
معلقه روزمارى
معلقه توم مجفف
معلقه بصل مجفف
معلقه ريحان ناشف
معلقه زعتر ناشف
معلقه ملح
اخلطى كله كويس واطحنيه لفه فى الكبه كدا علشان يتجانس وممكن تحطيه على كل الاكل الايطالى ومع المسقعه الايطالى يجنن كمان ممكن تعملى بيه سلطه بتنجان مشوى ايطاليه وممكن كمان كوسه مشويه وتتبليها بالخلطه دى

[omreemo]

الى عاوزة بهارات المسالا الهندى

معلقه حلبه حصا مطحونه
معلقه قرف مطحونه
معلقه كمون مطحونه
4حبات قرنفل مطحونه
معلقه فلفل اسود
معلقه كزبرة
معلقه شطه
التتبيله دى بتبقى حلوة اوى مع الفراخ الهندى وكمان مع اللحمه المشويه على الطريقه الهندى
الحلبى بتدى لها طعم يحسسك بالطبقه الى خارج البسطرمه

لو عاوزة تعملى البسطرمه فى البيت اقولك ياقمر

هاتى من الجزار عرق لحمه يكون مشفى مافيهوش دهون
حاولى كمان تجيبيى عرق صغير مش كبير اوى
اغسليه وهاتى كيس ملح ورشيه على العرق وسبيه برة التلاجه من باليل للصبح "البسطرمه كلها طريقتها تعتمد على الهوا هو الى بيسويها"
دى اول خطوة تانى خطوه هاتى السكين وحاولى تفتحى اللحمه من المنتصف خرم رفيع يوصل من فوق لتحت علشان الفتحه دى هنحط فيها دوبارة نعلق منها البسطرمه فى الهوا
الخطوة الاخيرة
هتجيبى نص كيلو حلبه حصا ماتغسيلهوش غربليه بس ونقيه
هاتى ربع كيلو توم فصوص
معلقتين بباريكا
معلقتين توم بودر
معلقتين كبار ملح
الطريقه بقى افرمى التوم واطحنى الحلبا واخطى التوم والحلبى والببريكا والتوم البودر مع بعض
هاتى العرق وحطى الخليط دا على العرق كلهم لحد ماتختفى الللحمه خالص
هاتى حته قماشه بيضا نظيفه
لفى عرق اللحمه دا فيه
ولو عندك بلكونه علقيها فى البلكونه
او اى مكان هاوى وتلات اربع ايام كلى احلى بسطرمه بيتى جميله
علشان تحتفظى بيها قطعيها وغلفيها بالفريزر
طبعا عارفه هتتقطع رفيع خالص زى اللحمه الباردة
والف هنا

طريقة عمل مرقة الماجى

هى المرقه الى برة بتعتمد على الملح بتاع الصوديوموطبعا هو مسرطن وكمان اسمع انهم بيحطوا ارجل ومصران الفراخ والله كمان انا عندى قطط بعمل لهم فته بالمجاى ولا بيرضوا ياكلوها قلت بقى القطط مش راضيه تعك اعك انا واكلها ومنعتها تماما من البيت بصى انا افتكست مرقه دجاج كدا والله طلعت هايله هقولك عليه وجربيها وهتدعى لى ان شاء اللههاتى فرختين وياريت لو بلدى عتاقى من الى بيعملوا سمنه على الوش دولبس بومها اعملى حسابك انك هتاكلى فراخ لاننا مش هنستعمل غير وركين بس او نص فرخه منهم الباقى بقى تتغدوا بيهمهتجيبى الفراخ تنضفيهم وتغسليهم وتنقعيهم بخل ولمون علشان تطلع الشوربه بيضا كدا وحلوةهتسلقى الفراخ وتحطى فى السلق مستكه وحبهان ولورو وفصين كبابه صينى صفى الفراخ من الشوربه وهاتى بقى قرن فلفل ناشف ومعلقتين بقدونس ناشف ومنص معلقه فلفل اسمر وربع معلقه كزبرة ناعمه برضوا ورشه بسيطه توم وبصل مجففهاتى نص فرخه من الى سلقتيهم وفصصيهم من العضم خالص وحطيهم فى الكبه او الخلاط يتفرموا ناعم اوى وانزلى عليهم بالشوربه بالشوربه وهاتى التوابل الى قلت ليكى عليها وانزلى بيهم بالشوربه وياريت لو عندك معلقه زبدة بلدى برضوا حطيهم بالشوربه لو مافيش الفراخ كفايه مع دسامه الشوربهوحطى الخليط دا فى مربعات التلج بتاعت الفريزر وهتلاقى احلى ماجى منزلى ونظيف

الليمون او اللومى هو احسن نوع فعلا العمانى بس كله بيفى الغرض وبيدى الطعم على فكرة انتى تقدرى تعمليه بالبيتهاتى نص كيلو لمون بس ياريت حجم صغير اوى وكمان يكون ناشف ومتنقى حلو لافيه بقعه ولا عطبه وحطيه فى البلكونه فى مصفى او طبق وكل كام يوم قلبيه على فكرة هتسبيه فترة طويله يعنى بالخمس ست شهور هتلاقيه نشف الاول وكش وكرمش وكمان اصفر كانه عطب لحد ما هتلاقيه خف خالص وبقى لومى

بالنسبه للشبسى عندى كام حاجه كدا جربتها وطلعت مش بطالهالى بطعم الكارى جبت البطاطس قشرتها ونقعتها بميه وملح ومعلقه كارى ساعتين وصفيتها وقبل ما اقليها رشيت شويه بودر كارى عليها وقليتها بزيت سخنالى بالفلفل جبت الشبسيى برضه وقطته وحطيته بميه وملح وقبل القلى رشيته بمعلقه كبيرة بباريكا وقليته برضهالى بالخل نقعته بميه وملح ونص كوب خل ساعتين برضوادول نجحوا معاى وطلعوا طعم مخالف للشبسى العادى

الشبسى بتاع الشارع الطعم اصلا بيعتمد على مادة ملونه اسمها المينوصوديوم "الملح الصينى" المادة دى بتضاف للشبسيى وكمان الكارتيه زى اهلاوى ومصراوى وشيتوس وكل الحاجات دى
طبعا الشبسيى بالبت مش زيه بالضبط بس بيكون حلو برضوا وبيدى نكهه حلوة
هاتى بطاطسيتين كبار كدا او نص كيلو بطاطس
وقطعيهم شبسيى بالمكنه او مبشرة البصل
حطى مايه من الحنفيه عادى ومعلقتين ملح
دا ثابت فى اى نوع
لو بقى عوزاة بطعم الخل حطى ربع كوب خل وسبيهم ساعتين او ساعه ونص منقوع
لو عاوزه بطعم الفلفل هاتى ببريكا معلقه وصفى الشبسى من المايه المنقوع فيها وانثرى عليه الببريكا وقلبى وابدائى اقلى بزيت سخن زى اى شبسى
لو عاوزة طعم الكارى حطى كارى بدل الببريكا معلقه برضوا واقلى عادى

على فكرة كمان انا امبارح عملت كدا خلطه قلت زى بتاعت الشبسى الى بطعم البيتزاحطيط زعتر على حصا لبان على ريحان وبباريكا وفلفل شطه وبعد ماصفيتها من المايه خلطها بالتوابل دى وحمرتها طلعت جميله جدا

[omreemo]

الطعمية

بصى انا بعمل الطعميه ازاى وجربى هتدعى لى ان شاء الله
هاتى كوب فول مدشوش وانقعيه
هاتى بقى بصله صغيرة ونصف حزمه بقدونس على كزبرة خضرا"مبكترش الخضرا اوى علشان ماتسودش فى القليه"
فصين توم
لو فى بقى فول حيراتى حطى تلات اربع قرون بقشرهم ومتخافيش على ضمانتى
لو مافيش فول مافيش مشاكل
نص قرن فلفل بس متكتريش علشان الفلفل مايضيعش طعم الطعميه
اضربى بقى الطعميه فى الكبه وحطى عليها الاتى
نص معلقه شطه حمرا نص معلقه كمون نص معلقه شمر مطحون ناعم ومعلقه كزبرة ناعمه وربع معلقه بيكنج بودر "جربى هينفشها اوى"
دى هتحطيه جوا الخلطه غير الى هيتحط على وشها
وش الطعميه بقى
اعملى خليط من الشمر والكزبرة والشطه مجروشين مش مدقوق اوى ومعلقه سمسم واخلطيهم وحطيهم على الطعميه فى لحظه القلى
لو حبيتى بقى الطعميه محشيه زى بتاعت الاسكندانيه كدا او اخر ساعه هاتى بصله حمريها لحد ماتبقى بنى زى بتاعت الكشرى كدا
وحطى عليها معلقه شطه كبيرة ومعلقه كزبرة واحشى بيها الطعميه من جوا وهتدوقى احلى طعميه محشيه بالدنيا
لو بقى حبتيها سادة اعملى زى الاولى بس من غير الحشوة
جربيها مش هتندمى انا يوم الجمعه دا لازم الفول البيتى والطعميه

فى سببين لعدم نعومه الطعميه السبب الاول مانقعتيش الفول مدة كافيه افضل حاجه انقعيه من باليل للصبح ولو مستعجله عليه انقعيه بميه دافيه السبب التانى وانتى بتطحنى بالكبه زودى شويه مايه صغننه علشان تنعم معاكى بس متزوديش كتير علشان ماتشربش زيت وانتى بتقليهالعلمك انا مفرزة فول بالفريزر خصوصا للطعميه

الفول بقى انقعى نص كيلو فول من باليل للصبحارمى مايه النقع واغلى بقى فى الدماسه نصها مايه وحطى فيها الفول وخلى النار عاليه شويه لحد مايغلو واول مايغلو وطى النار وغطى الدماسه بطبق عليه مايهطبعا طبق المونيوم علشان ياخد منه الفول البخار لو المايه جوا نقصتلو لقيتى الفول مايته نقصت زودى من المايه السخنه الى فى الطبقفى نص السوا بقى جهزى ربع كوب فول مدشوش وربع كوب عدس اصفر ومعلقتين كبار طماطم متصلصه تقيله اوى ونص معلقه ببريكاحطى الفول والعدس والطماطم والببريكا وقلبى وسبيه يكمل سواهقبل ماتطفى عليه حطى عصير لمونتين كبار لو فضل عندك شهر عمر ما الوش هيسود ابد بعد اللمون دااقولك كمان خلطات فول بالحمص والسجق والبسطرمه والتوم وكدا ولا ايه

فول بالسطرمه

هاتى مقدار طبق فول كدا حلو وهاتى تمن بسطرمه او الكميه الى تقدرى توفريهاشوحى البسطرمه بعد ماتقطعيها على النار بقطعه زبدة او سمن وانزلى عليها بالفول ملحيهحطى الفول بطاجن وفتحى كدا مابين بعضه واكسرى بيضه وفتحى تانى واكسرى بيضه حطى بيض بعدد افراد اسرتك ورشى الوش ملح وفلفل وعلى الفرن ربع ساعه ودوقى الفول بالبسطرمه

فول بالخلطه

هاتى قرن فلفل حامى وفصين توم وكمون وملح ولمون
دقى التوم والفلفل وتبليهم
انزلى بالفول بالطاسه يسخن وانزلى بالدقه دى ونص معلقه شطه وشويه زيت
وبس كدا

فول بالسجق

اكلتى المفضله
هاتى نص كيلو سجق وطماطميتين حلوين وقرن فلفل حامى وقرن رومى وطبقين فول حلوين
هاتى كمان بصله وفص توم
حمرى البصله بس تدبل بشويه زيت صغننه وانزلى بالسجق بعد ماتقطعيه ترنشات
شوحى البصل مع السجق انزلى بفص التوم والفلفل الحامى والفلفل الرومى يتشوحوا وبعدين الطماطم المتقطعه حتت وافضلى قلبى ضيفى ملح وفلفل اسمر وربع معلقه بهارات مشكله وانزلى بالفول لو عاوزة اللون احمر اكتر انزلى بشويه طماطم متسبكه "صلصله مش بستخدمها علشان مواد حافظه"
وفى طاجن وعلى الفرن نص ساعه كدا يتحمر وعيش بقى محمص وبتنجان متخلل وابقى قابلينى لو قمتى قبل مايخلص الطاجن كله ههههههه

انا فرنى غالبا بكون عملاه على 135 دى اقل درجه عندى لانى بصراحه بحب السوى الهادى بيطلع متسبك احلى وطعمه واخد من بعضهلو انتى الفرن بتاعك عالى يبقى حطى وقت قليل يعنى ربع ساعه او حاجهبس جربى الفول دا وجمبه عيش محمص يبقى رائع والله انا وجوزى ممكن ناكل ست سبع ارغفه بيه تقوليش مفاجيعكمان بقى لو بتحبى الشطشطه ابقى شطشطيه شويه هيبقى احلى كمان الفول الى بالدقه دا هيطلع زى بتاع جاد بالضبط اصلى كان معقدنى فول جاد كنت عاوزة اعرف الطعم دا بيجى ازاى لحد ما مرة فضلت واقفه جمبه وهو بيحبش الفول وعرفت بقى الخلطه قلت انقلها لكم ياقمر

فول بالحمص

هاتى حمص بتاع حمص الشام انقعيه واسلقيه وسيبى حبه منهم ملو نص كوب كدا
اهرسى الحمص الباقى او خديه لفه بالكبه
خدى الفول كمان لفه بالكبه
هاتى طاسه انزلى بالطحينه وشويه زيت وانزلى بالحمص والفول
فصين توم نى
لمونه
كمون
شطه
كله فى قلب بعضه كدا يسخن ويتجانس فى قلب بعضه وحطيه بالطبق وعلى وشه شويه حمص حب مسلوق الى حوشناهم من الاول
وعلى الطبق جمبه بقى شويه طعميه من الى فاتوا دول واوعى وشك

[omreemo]

عاوزة تعملى دبس الرمانتعالى اقولكهاتى كيلو رمان وفصصيهماترميش القشر نشفيه هينفع لحالات المغص والدسونتاريا والدود الى بيجى لاولادناهاتى الرمان اضربيه بالخلاط وصفيه"ماترميش البذر "هاتى بقى كوب الاربع سكرنص كوب عصير لمونحطى الليمون على السكر على عصير الرمان وحطيهم على النار اول مايغلى وطى عليهلحد ماينقص ويتقل خالصيعنى لو كانوا تلات كوبايات عصير رمان هيبقوا واحدة بس دبسهاتى زجاجه وحطى بيها الدبس واستعمليه بقى فى التتبيلات المشويه وكمان فى السلطاتالبذر بقى نشفه بالبلكونه وحطيه بقى فى تتبيلات الفراخ المشويه واللحمه كمان المشويهوقولى لى رايك

اللحم البارد

اللحم البارد هتجيبى عرق تغسليته وترشى عليه معلقتين كبار ملح وربع كوب خل وادعكى العرق من بره بيه كويس ادعكى ادعكى كدا وسبيه ربع ساعه كداهاتى بقى العرق وغرسى فيه بالسكينه وحطى توم ورشه فلفل اسمر غرسى وحطى فص توم ورشه فلفل اسمر كررى لحد مايبقى العرق كله متغرس توم هاتى دوباره ولفيها بالطول والعرض على اللحمه كتفيى العرق يعنى وحطى معلقتين سمنه او زيت بطاسه وابدى حمرى العرق فيها وياريت فى الزيت او السمن تحطى حتت مستكه وكمان رشه حبهان ناعم ورشه فلفل اسمر هتلاقى العرق بينزل عصارته افضلى لفى فيه لحد ماكل الوجوهه تتحمر هاتى ورقه فويل وحطى جواها العرق وانزلى بالصوص الى نزل من العرق عليه ولفى العرق كويس وحطيه بالصنيه وحطى حواليه ربع كوب مايه وعلى الفرن بياخد حوالى ساعه الاربع على مايبقى تمامافتحى عليه الورقه وحطيه تحت الشوايه شويه يتحمروقطعيهفى طريقه تانيه برضوا لذيذ تنفع اوى للعزومات بالتقديم هتجيبى العرق وتقطعيه وهتجيبى الصوص الى وقع منه دا وتحطى نص معلقه نشا وتسويها على النار لحد ما الصوص يتقلى وقطعى اللحم البارد ورسيه بطبق يدخل الفرن وتقدميه بيه ورشى الصوص دا على الوش ودخليه الفرن يتحمر شويه بيبقى لذيذ اوى

عاوزة تعملى صويا صوص بالبيت

تعالى اقولكهاتى نص كوب عسل اسودنص كوب خل احمرنص معلقه جنزبيل كوب مايهربع معلقه فلفل اسمررشه ملححطى المقادير كلها فى حله لحد مايغلو ويبقى الكميه خست النص حطيه فى زجاجه واقفليها وحطيها بالتلاجه ويبقى عندك صويا صوص منزلى مضمون

عاوزة تنضفى الكرشه بتاعت الخروف او العجل بدون مجهود
هاتى ربع كوب كربوناتو واغلى شويه مايه وحطى الكربوناتوا بالماء وفيهم الكرشه
ساعه وهتشوفى بنفسك الفرق وازاى هتبيض من غير ما تفضلى تكحتى فيها

عاوزة تعملى مسطردة

تعالى اقولك علشان ه اصلا كلها بهارات
المقادير
معلقه كبيرة خردل واطحنيها
معلقه صغيرة جنزبيل
معلقه صغيرة فلفل ابيض
معلقه صغيرة من بهارات المشكل "لحم"
معلقه كبيرة كركم
4فصوص توم مهروسين ناعم
ممكن معلقه توم بودر بدلا منها
معلقه كبيرة كارى
معلقه صغيرة ملح
زجاجه خل كامله لتر
الطريقه
حطى الخل على النار وضيفى كل المكونات عدا الخردل المطحون
وافضلى قلبى لحد ما يبقى قوامه غليظ
اطفى النار واستنى وهو دافى كدا حطى الخردل بعد ماتقلبيه فى شويه خل صغننين
وقلبى وحطيه فى ازازة او برطمان وعلى التلاجه
وطبعا صحى لانه خالى من المواد الحافظه

[omreemo]

غالبا الاكل الايطالى خديه كدا قاعدة ياخد روز مارى وريحان وزعنرالهندى ياخد كارى وكركم وببباريكا وشطهالخليجى حبهان وجنزبيل وفرنفل وكزبرةدا قاعدة لعلمك لاى بهارات

عاوزة صلصه حارة ومبهرة تتحط جمب المشويات او المقليات زى الكنتاكى كدا

تعالى اقولك صوص هتاكل صوابعك وراة بس على فكرة دا مشطشط للى بيحب الحراق
مكوناته
بصله ناعمه
تومه ناعمه
قرنين فلفل شطه احمر حراقين
فلفله حراقه خضرا
طماطميتين ممكن تبشريهم او تفرميهم بالكبه المهم يكونوا مجروشين
معلقه كبير بهارات
معلقه صغيرة فلفل اسمر
معلقه كركم صغيرة
شويه زيت وشويه ملح
رشه حبهان
الطريقه
شوحى البصله وفص التوم
انزلى بالفلفل الحار
بعدين الفلفل الاخضر وقلبى
انزلى بالبهارت والفلفل الاسمر وقلبى لحد ماريحه البهار تطلع
انزلى بالطماطم وقلبى
حطى ربع كوب مايه
سيبى البصل لحد مايتهرى هو والطماطم خالص
لو حسيتى انها تقلت حطى شويه مايه صغننه
على فكرة الخلطه دى ممكن ترشيها على البتنجان المقلى بس اعصرى لمونه عليها هتخلى البتنجان واو خطير

كتير مننا يعرف او يسمع عن صوص الباربكيو

اقولكم بيتعمل ازاى
3ملاعق كبار زيت زتون
بصله كبيرة مفرومه
فص توم
ربع كوب خل
معلقتين كبارمن المسطردة الى قلت ليكوا عليها
معلقتين كبار من صويا الصوص برضوا الى قلت عليه
ربع كوبايه سكر بنى "لو مش متوفر هاتى السكر وحطى عليه معلقتين عسل اسود وقلبى هيدى نفس تست السكر البنى"
كوبايه من الطماطم المتصفيه ومتسبكه
نص معلقه فلفل اسمر ناعم
معلقه بباريكا صغيرة
الطريقه بقى
سخنى الزيت وشوحى فيه البصله وبعدين التوم لحد مايصفر
اطفى بالخل
وحطى باقى المقادير وقلبى ووطى النار اوى عليها لحد ماتتقل
اضربيها بالخلاط لحد ماتبقى ناعمه اوى
وحطيها فى علبه وعلى وشها شويه زيت زتون واقفلى العلبه وحطيها بالتلاجه
على فكرة ينفع تتبلى بيها البانيه مع رشه من بهارات الفراخ الى كتبتها قبل كدا
هتبقى رائعه واقليها بالبقسماط وعليه كورن فليكس مجروش والله هتبقى احلى من كنتاكى بانيه
على فكرة الباربيكو دى دايما بيقدموها فى كنتاكى مع الناجتس

بصوا هقولكم صلصه توم جميله

انا مركزة على الصلصات لانها تابعه للتوابل طبعا وبتبقى مشهيه جمب الاكل وبنشتريها من برة غاليه زى المسطردة رغم ان مكوناتها عندنا تقريبا ودى اضمن مافيهاش مواد حافظه
بصوا دى صلصه توم جميله تنفع مع الفراخ الكنتاكى اوى
هاتى اربعه او خمسه فصوف توم كبار
ربع كوب زيت زتون
عصير 3لمونات كبار
كوب زبادى صغير
رشه سكر
رشه ملح
ربع معلقه صغيرة فلفل ابيض
الطريقه
حطى المكونات كلها فى الخلاط ماعدا الزيت
اخلطى وافتحى الخلاط من فوق
انزلى بالزيت سرسوب خفيف كدا اوى علشان تتقل الصوص
لحدا ما يغلظ القوام
اقفلى وفضى بالطبق وعلى الوش رشى رشه بهارات صغيرة هتدى طعم جميل

هقول لكم الكاتشب صوص علشان منه هنعمل نوع تانى من الصوص برضه

هاتى كوب خلبصلهكيلو طماطمفلفلتين حمر رومى "لو عاوزة كاتشب حار يبقى حطى 3او4قرون الفلفل دا بلدى حراق"فص توم واحد بس يدى تستفصين قرنفل صحاح معلقه كبيرة عسل نحل "هتدى سماكه للكاتشب"معلقه كبيرة بابريكامعلقتين كبار سكرلو عاوزة الكاتشب احمر اوى حطى معلقه كبيرة صلصه لكن انا مبحطش علشان المواد الحافظهحطى كله فى حله على النار وبعد خمس دقايق بالضبط هتلاقى الطماطم نزعت القشرة بتاعتهاشيلى القشرة بسهوله وغطى الحله ووطى النار اوىعشرة دقئق بالضبط واطفى واستنى لما يهدى شيلى فصين القرنفل وعلى الخلاط اضربى هاتى مصفاه سلك رفيع وصفى الخليط ورجعى الطماطم المصفاه الى الحله تانىحطيها على النار لحد ما تتكاثف وتتقل واطفى وفضى فى علبه او زجاجه

[omreemo]

عاوزة تعملى لحمه او فراخ مشويه وتبقى طعمها مميز

تعالى اقولكانا قلت على بهارات الشوى وعلى الصويا صوص وعلى الكاتشبعندنا كدا اسا س اى شوى وكله بيتى وطازة ونظيف واهم من كل دا انه من صنع ايدكيبقى نعمل بقى كمان الفراخ واللحم المشوى بالبيتهاتى ربع كوب كاتشب بيتى من بتاعنامعلقتين كبار صويا صوص بيتى من بتاعنامعلقتين كبار عسل نحلمعلقه كبيرة من بهارات الشوى الى قلت عليهلمونه ومعلقتين خلمعلقه مسطردة من الى عملينهاملح بقى حسب الرغبهاخلطى المقادير وتبلى اللحم والفراخ وممكن تحطى مع الفراخ كوب زبادى هتطلع هايلهوفى كيس الفرن حطى اللحم او الفراخ ودوقى احلى مشويات بالدنيا وماتنسيش سلطه الطحينه

الطحينه

دى رحمه الله كان احسن واحد يعملها بالدنيا وعمرى ما اكلت طحينه احلى من الى كان بيفرمها بابا بايدة رحمه الله عليك يا بابا وجعل مثواك الفردوس الاعلىالمقاديركوب سمسم ابيضنصف كوب زيت "طعمه كويس ذرة او شمس او صويا بس طعمه حلو"نصف كوب دقيقالطريقههنفرم السمسم فى كبه الخلاط كويسوبعدين هنحطه فى ودرق الخلاط العادىهنحط السمسم المطحون ونبداء نخلط ونفتح من فوق الخلاط ونضيف الزيت سرسوب علشان يتقل معانا وبالتناوب شويه زيت ومعلقه دقيق لحد مايخلص الخليط كله وهتلاقى احلى طحينه عندك وطازة ومن صنع ايدعلى فكرة كل ماتستخدميها ابقى قلبى علشان ماتتقلش من تحت وتخف من فوقتقدرى كمان تعملى منها مقدار كبير وتخزنيه بالتلاجهعلشان تعملى الطحينه حمرا او لونها غامق شويههاتى السمسم حطيه فى الفرن شويه صغيرة لكن ماتستخدميش السمسم المتحمص جاهز بعمل الطحينه هتلاقى لونها غمق معاكى اوى

طريقه المفتقه

بصى فى طريقتين طبعا الى هقولها دى الى هتناسبك اكتر علشان معندكوش بالسعوديه قرطاس اللوز "زى الحلبه المحوجه كدا"يبقى نقول على طريقه تشبهه شويه الطعم بتاع المفتقه الاصلىهاتى كيلو عسل اسودكوب حلبه حصا متحمصه ومطحونه ناعمكوب سمسم محمصكوب سودانى محمص ومجروش مش ناعم لا مجروش بسربع كوب دقيقكوب زيتالطريقه بقى ياقمرهتجيى العسل الاسود وتحطيه فى حله يسخن مجرد يسخن بلاش يغلىوانتى حاطه العسل على النار هاتى الدقيق واخلطيه على الزيت بالمضرب السلك علشان مايكلكعش وحطيه على النار كانك بتعملى بشاميل وقلبى لحد مايبقى الزيت متجانس مع الدقيق زودى السودانى والسمسم وقلبىيسخن العسل ضيفى الحلبا المطحونه وقلبى بسرعه جامد علشان تتجانس هتبداء تتقل حبه زودى الدقيق المخلوط بالزيت والسمسم والسودانى وقلبى جامد علشان هتتقل تغلى واغلقى النار وكدا خلاص خلصت المفتقه السريعه

عاوزة تعرفى اذا تبقي عندك مشروم تحفظيه في التلاجة ازاي

بصى هاتى بصله صغيرة وشوحيها بمعلقه زبدة وقطعى المشرم وحطيه عليه يدبل وشيليه بالتلاجه هيعيش مدة اطول ومش هتغير لونه وممكن كمان تعمليه بالاستيك فويل وتشيليه بالفريزر ينفع بقى فى البانيه رول وكمان صدور الرومى المحشيه وشوربه الكريمه والفراخ بالمشروم والبيكاتا بالمشروم فراخ او لحمه والفهيتا وحاجات كتيرة انا عن نفسى بحبه جدا شوربه كريمه وكمان بانيه رول

بهارات للكواااااااااااااااااااارع وما ادراكى ما الكوارع

بجيب الكارع طبعا مغسول وابيض ومتكسر بغسله برشه ملح وخل ولمونه واسيبه شويه على ما المايه تغلى تغلى اسقط الكارع فيها وياريت لو تعمليها بحله تيفال علشان الكوارع بتسود الحله اوى
يغلى اشيل الريم الى بيطلع واحط بقى حبهان ياريت لو ناعم او حتى فصوص كسريها او دقيها شويه بالهون كمان فصين مستكه وورقتين لورو واغطى الحله واسيبها على نار هاديه ومايه كافيه ساعه
افتح بقى ارش فلفل اسمر وفلفل ابيض واشوف خلصت ارش ملح واجى بقى على النار اكون مفصصه توم ودقاه ناعم احط معلقه سمنه بلدى واحمر التوم فيها واطش بيه الكوارع
واوعى بقى هتاكلى صوابعك وراها
فى كمان كوارع بالفرن

[omreemo]

عاوزة تخللى لمون وطبعا عاوزة التوبل بتاعته تعالى اقولك

فى طرق كتير لتخليل اللمون فيها السريع وفيها الى بتقعد بالسنه علشان تتاكل
هقولك اكتر من طريقه وانتى اختارى الى يناسبك
اللمون المغربى والبعض بيسموة المرقد
هاتى كيلو لمون
معلقه كبيرة كزبرة حب
مقدار حوالى خمس لومنات معصورة
ملح حوالى نصف كوب وحوالى كوب مايه
هاتى اللمون اغسليه واعملى بيه فتحات بالسكين جانبيه"شريحيه يعنى" كفايه فتحه واحدة او اتنين على الاكثر

احشى الفتحه دى بالملح
ورصى بالبرطمان
ضيفى الكزبرة واللمون المعصور وكملى ملو البرطمان بالماء وغطيته باى قماشه قديمه واغلقى البرطمان
دا بيتاكل بعد حوالى شهرين من التخليل علشان اللمون نيى
طريقه تانيه اللمون السريع
هاتى كيلو لمون واغسليه واسلقيه وانقعيه بالمياه 3ايام كل يوم تغيرى مايته مرتين تلاته لحد ماتروح المرارة
هاتى قرون فلفل احمر وحوالى نصف كوب وفص توم ولمونتين بقشرهم وقطعى كله واضربى بالخلاط لحد ما الملح يدوب والفلفل يتفرم
حطى اللمون بالبرطمان وفوقه الخلطه دى وعليه شويه عصفر وحبه البركه ورشه زيت واقفلى يومين او تلاته وكلى احلى لمون
اللمون المعصفر
هاتى كيلو لمون وكوب ملح وعصفر وحبه البركه
شقى اللمون اربع تربع بس مش للاخر خلى اللمون ماسه ببعضها
احشى اللمونه بخليط العصفر والملح وحبه البركه
لحد متاتخلص الكميه لو فضل بقى ملح وعصفر وحبه البركه قلبيهم بشويه مايه وصبى على اللمون بعد ماترصيه بالبرطمان
ماتخليش المايه مغطيه اللمون اوى علشان هو اصلا سواة بيعتمد على الملح والعفصر وحبه البركه الى جوا قلبه
دا هيقعد مدة لاتقل عن سته اشهر علشان يطلع حلو ومرراته مش موجودة وممكن يعيش معاكى سنه كامله من غير يفسد
الف هنا وشفا

عاوزة المكدوس

تعالى اقولكهاتى حوالى كيلو بتنجان المهم يكون صغير علشان يبقى بذورة قليله او مش موجودة اصلاهاتى مقدار راس توم كبيرة ومفصصه ومفرومه بملح وفلفل احمركوب كبير من زيت الزتوننصف كوب عين جمل مفروم"جوز"هاتى البتنجان وشيلى راسه واغسليه وحطيه على النار يتسلق بشويه مايههاتى بقى الفلفل والتوم والملح وعين الجمل المفرومين واخلطيهمهاتى البتنجان بعد ما اتسلق صفى ميته كويس وافتحيهاحشيه بالخليط دا وحطيه ببرطمان او علبه محكمه الغلقاغمريه بعد ما تخلصى الحشو لكل البتنجان بزيت الزتوناقفلى البرطمان كويس وسيبى المكدوس مدة حوالى الشهر وافتحى عليه وقدميه مع الاكلات الى بتحبيها كمقبلات او مخلالات

هقولك طريقه بطاطس بوريه تجنن هتاكلى صوابعك وراها

هاتى بطاطسيتين مسلوقين ومهروسين
فرعين تلاته نعناع اخضر وافرميه
معلقه من اوراق الكزبرة الخضرا مفرومه
معلقه ببريكا
نص معلقه فلفل اسمر مطحونه
معلقه كبيرة زبدة
قرن فلفل اخضر حراق مفروم
اهرسى البطاطس وافرمى كل المكونات الاخرى ناعم اوى وضيفيها للبطاطس
وقلبى كويس لحد ماتبقى البطاطس ناعمه اوى
حطيها بطبق او قدميها بقمع الكريم شانتيه جمب الكنتاكى او الكفته المشويه وغمسى بيها الكنتاكى هتديكى طعم واو جميل جدا وهتفتح النفس

عاوزة تعملى صوص لساندوتش تكون طعمها حلو وفى نفس الوقت تخلصى من وجع القلب من كتر الزجاجات الى قدامك واحدة كاتشب وواحدة مايونيز وواحدة مسطردة
جاربى كدا اعملى كوكتيل من الصلصات دى كلها على بعض
وانتى بتعملى مثى سندوتشات كفته او بانيه او شاورما طبعا بتحطى بالسندوتش الصلصات دى طب ايه رايك اعملى كوكتيل بطبق كدا من كل الصوص الى عندك يعنى هاتى معلقتين كبار كاتشب ومعلقتين مايونيز ومعلقه مسطردة ومعلقه صوص حار وقلبى وحطى بالساندويتش هتلاقى عندك صلصه جميله ولذيذه ولعلمك ممكن تحطيها جمب البيتزا والشبسى يتغمسوا بيها لذيذه وفى نفس الوقت توفرى عناك العلب الى قدامك
دى افتكاسه مطبخيه مالهاش اى اساس خالص بس جربتها لقيت طعمها حلو

بصوا الصوص دا كمان لذيذ جمب الشبسى وكمان السمبوسك والفطاير عامتا طعمه حلو ومبهر وجميل

المقادير:


نص كوب خل تفاح -
2 م صويا صوص -
ربع كوب ماء -
1 م سكر
معلقه عسل اسود او ابيض
نص معلقه زنجبيل -
نص معلقه خردل بودر او معلقه كبيرة مسطردة
نص معلقه بصل بودرة - نص معلقه ثوم بودرة - نص معلقه قرفة
نص معلقه فلفل .
الطريقه بقى حطى الخل على النار يغلى وتكونى مقلبه كل المقادير على بعض بطبق وانزلى على الخل وقلبى بسرعه يغلى ويتقل سنه شيلى وحطيه بطبق والف هنا

[omreemo]

الهوت صوص

5فلفل حار-
ربع معلقه ثوم مطحون-
نصف كيلوطماطم
معلقه كبيرة كاتشب
ملح + كمون حسب الرغبة-
عصير 1 ليمون+ م ص خل ابيض-
قليل من زيت
حطى المقاير كلها على النار لحد ما الطماطم تنزل مايتها وشيلى بايدك قشرة الطماطم
تتهرى على النار هى والفلفل
اقفلى وسبيها تبرد
هاتى بقى الخلاط واضربيها كويس وصفيها بمصفه الشاى
هاتى الحله تانى وانزلى بالخليط وقلبى لحد ماتتقل وزودى تانى معلقه كاتشب كبيرة علشان تدى الطعم المسكروقلبى لحد ماتبقى التقل الى انتى عوزاة
اقفلى وشيليها بالزجاجه بالتلاجه

صلصه الجبن

دى جميله جدا ولذيذه وممكن تنفع عشا تغمسى بيها بقسماط او عيش محمص وكوب قرفه بالبن بعدها وتبقى اكله جميله وخفافى كمان ممكن تعملى بيها المكرونه بدل صلصه الطماطم او تغمسى بيها الكفته
هى لذيذه وتنفع لحاجات كتير
المقادير
نص كوب لبن
نص كوب جبنه شيدر
نص كوب مايونيز
معلقه لمون معصور
رشه جنزبيل او برشه بس من الجنزبيل الفريش الى عندك
الطريقه بقى
هنحط اللبن على النار يدفى وننزل عليه بالجبنه واللمون والجنزبيل مع بعض"ماتكتريش اللمون علشان اللبن مايفصلش منك ويتقطع مع الجبن"
لحد مايتجانس الخليط وتسيح الجبنه
ممكن تحطيها زى ماقلت على وش المكرونه المسلوقه
والف هنا

ايه بقى احلى توابل لشوربات وشوربه العدس وبالبصاره

العدس كمون بس وشطه لو حبيتى
البصارة نعناع ناشف وكزبرة ناشفه وكمون وشطه
الشوربه بتاعت اللحمه والفراخ بشيلى الريم وحطى فص مستكه اصلى تركى او يونانى وورق لورو او اتنين وفصين حبهان مجروشين او رشه حبهان مطحون وواحدة كبابه صينى مكسورة مش ناعمه وبس كدا
وانتى بتحمرى لسان العصفور او الشعريه حطى فص مستكه كمان وواحدة حبهان مكسورة ومجروشه مطحونه لا

المخلالات

كل مخلل له طريقه
يعنى الخيار حطى فلفل احمر وزيت وفص توم وكزبرة خضرا
وفى طريقه تانى تحطى كزبرة ناشفه
الجزر ملح بس وشويه فلفل حامى
اللفت بنجر بس
البطاطس والمنجا حطى معلقه كركم
البتنجان فلفل حامى واحمر وملح وكمون ولمون
القرنبيط والكرنب شطه وببريكا وملح وخل وفلفل حامى
ها ايه تانى

الكبدة الاسكندرانى

الكبدة الاسكندارنى هاتى كبدة وقطعيها رفيع وحطى عليها فصين توم وبهارات لحمه ولمونه معلقه خل وسبيها شويهعلى النار هاتى طاسه وشوحى بصله فص توم تانى فلفل رومى وقرن حامى وشوحىوشيلى بطبق الخليط دا وهاتى الكبدة مكانه وشوحى ياسلام لو بحتت ليه خروف يبقى تمامشوحى لما لونها يتغير انزلى بفلفل اسمر ورشه كمون ورشه كبابه صينى تشوح برضوا انزلى بخلطه الفلفل والبصل

شوربة الكريمة

شوربه الكريمه بالمشروم هتجيبى بصله تشوحيها بمعلقه زبدة او سمنه وتنزلى بالمشروم المقطع حتتهتجيبى معلقه كبير دقيق وتنزلى على المشروم والبصله وتقلبى رشه ملح وفلفل وكبابه صينى تكون محضرة كوب لبن تنزلى براحه وتقلبى بسرعه ولو تقلت زودى تانى لبن وحطى مكعب المرقه الى هتشوفيه بالاول دا وتقلبىعاوزة بقى المشروم مايبانش خودى الخليط دا لفه بسيطه بالخلاط انا عن نفسى بحبه باين كدابس ياستى وخلصت شوربه الكريمه بالمشروعلى فكرة ممكن تحطى نسلات فراخ كمان معاه هتبقى حلو برضوا

[omreemo]

طريقه اللنشون

هاتى نص كيلو لحمه تكون فيها حتت دهنه
هاتى معلقه شطه وينسون وفلفل اسمر وكمون ورشه كبابه صينى ومعلقه ببريكا
حطى البهارات المطحونه على اللحمه وادعيهم ببعض وملحيهم وافرميهم بالكبه تانى لحد ماتبقى ناعمه جدا واللحمه مهريه
هاتى ورقه فويل ولفى اللحمه فيها كويس بشكل اسطوانى
وحطيها بالفرنفى صنيه صغيرة جوا صنيه تانى اكبر منها فيها مايه سخنه
ساعه كدا على فرن واطى
شيلى صنيه المايه وخلى الفويل لوحدة خمس دقايق بس يكمل سواه
بالفرن والف هنا
بس على فكرة مش هيطلع زى بتاع برة ميه بالميه لكن قريب منه وانضف من بتاع بره
المهم انك تطحنيه ناعم

طريقة تانية

هتجيبى 3 حبات جبنة مثلثات اى نوع و اتنين مكعب مرقه دجاج فقط
3 فصوص ثوم
3 حبهان مطحون
3 بيضات
3 ملاعق كبيرة دقيق
نص كوب زيت
رشه فلفل أسود


نضرب المقادير فى الخلاط ثم نضعهم فى كوبين من الاستالس المدهون بالزيت فى حمام مائى يعنى هاتى حله بغطاء وخلى الكوبيات جواها وغطى الحلة نتركه ساعه الا ربع يغلى خدى بالك من منسوب الميه بعد الفوران لحسن اللانشون يتبل ميه

ملحوظه: ممكن تبدعى وتحطى فى زيتون أو قطع فراخ مسلوقه أو قطع مشروم
وبالهنا والشفا
شوفى الطريقه دى كدا هى الى تقصديها ولا ايه ياقمر

الفراخ الهندى بالحلبا والتمر هندى

هاتى فرخه
معلقه حلبه حصا مطحونه
كوب منقوع تمر هندى مركز
رشه فلفل اسمر وكمون وببريكا وكارى وكزبرة ناشفه
لمونه
بصله ناعمه بميتها
اخلطى التوابل مع التمر الهندى والبصله والحلبا
تبلى الفراخ كويس بالخلطه وانقيعها مدة ماتقلش عن ساعتين ولو من باليل للصبح يبقى تمام
ممكن تقطعى الفرخه او سليمه الى يريحك
حطيها بكيس الفرن واشويها او فى وق فويل
وممكن تاخديها لو متقطعه وتتبليها بالدقيق من الخارج وتقليها بالزيت الغزير فى الاول يكون الزيت سخن وبعدين وطى عليه علشان الفراخ تتحمر كويس
بس انا بحبها مشويه اكتر

فراخ بالتمر هندى وجوز الهند

المقاديرفراخ بانيهبصلهنص كوب منقوع التمر الهندىرشه فلفل وكزبرة وكارى وفلفل احمر شطهملحتبلى الفراخ البانيه بالمكونات دى كلهاوحطيها بالتلاجههاتى بقى جوز هند مبشور حطى الفراخ بجوز الهند واقيها بالزيتجربيها تجنن الفراخ المقليه بجوز الهند رائعه وجديدة بس بعد ماتغلفيها بجوز الهند سبيها بالفريزر عشة دقايق علشان يمسك فيها جوز الهند ويقعش وانتى بتحمريها

محشى بصل بالتمر هندى

هاتى بصلتين تلاته كبار كدا وحلوين
اسلقيهم بحالهم فى مايه بملح وفلفل
قشرى البصل من فوق وتوخلى تحت موجود والقشرة بس
فرغى البصل مع الاختفاظ بشكل البصله
وضبى حوشه البصل عبارة عن بصله وشبت وبقدونس وكزبرة وقرف فلفل مفروم ومعلقتين زيت وبهارات وكمون وقرفه وملح وفلفل وكزبرة ناشفه ورز مصرى عادى
احشى البصل ولفى الورقه ورسيها جمب بعض
لحد مايخلص البصل
هاتى بقى كوب منقوع تمر هندى ومعلقتين طماطم متسبكه وملح وفلفل ومكعب مرقه من الى عملينها بالبيت
اسقى البصل بالخلطه وسويه زى طريقه المحشى العادى

رز بالتمر الهندى واللحمه

هاتى كوب تمر هندى منقوع
3كوب رز
نص كيلو لحمه متقطعه مكعبات صغيرة مسلوقه نص سلقه ومعاها الشوربه
بصلتين مفرومين
فلفلتين مفرومين
معلقه جنزبيل فريش او بودر لكن الفريش اطعم
تومه
لمونتين ناشفين ليمون يعنى
معلقتين كبار طماطم متسبكه
ملح فلفل كمون كزبرة بهارات مشكله وربع معلقه كركم
سمنه او زيت
الطريقه بقى شوحى البصله وانزلى بالفلفل وبعدين اللحمه وشوحى كويس
انزلى بالطماطم والبهارات كلها وضيفى التمر هندى والرز
يغلى ووطى عليه ويقدم
ممكن ترشى الوش بالمكسرات

لحمه مشويه بالتمر هندى

هاتى كيلو لحمه ولو ضانى يبقى ماشى شغاله برضوانص كوب تمر هندى منقوع ومركزبصله بهارات شوى من الى مكتوبه بالاولطماطمايهمعلقه كاتشبملح وفلفل وكزبرة وبباريكامعلقتين زيتهاتى الخلاط وحطى البصله مع التمر هندى والبهارات والطماطم والملح وباقى التوابل واخلطىهاتى طبق وحطى اللحمه بعد ماتقطعيها قطع مناسبه للشوىحطى الخليط عليها ومعلقتين الزيت وقلبىسبيها بالتلاجه لتانى يوم واشويها بعد ما تصفى التتبيلهلو معندكيش شوايه حطيها بالفرن مع الخلطه فى طاجن وغطيها بفويل علشان تستوى من غير ما تتحرقولما تخلص شيلى الورق الويل وولعى عليها الشوايه والف هنا