[ام جيهان]

بسم الله الرحمن الرحيم

ليه ........ وليه ........... وليه

ليه لبنت لما بتحب بتعمل كل حاجه ترضى حبيبها

وليه الست لما بتحب جوزها بتفضله على اهلها

ليه مش بتقدر تحافظ على توازن مشاعرها بينهم

ليه مش بيكون فى قلبها مكان لحد غيره

ليه بتنسى كل حاجه حلوه عملوها اهلها ومش بتفتكر غير المشاكل اللى بتحصل بيهم وبين خطيبها

ليه مش بتقدر تفهم انهم بيحافظو عليها من بطريقتهم ولو كانت الطريقه دى غلط

وليه الزوج بيبعد مراته عن اهلها

وليه بيقربها من اهله

وليه لازم تسامح اهله على اى حاجه يعملوها فيها

وليه هو يشيل فى قلبه كل مشاكل الخطوبه

وليه الاهل يعملو مشاكل ايام الخطوبه وبنتهم اللى تكون الضحيه

وليه الزوج يخلص حقه والزوجه هى اللى تدفع الثمن

وليه الست اللى تتنازل دايما

وليه الراجل ميحبش بتنازل عن اى حاجه

ليه خاطره غالى عند الست

وليه هى خاطرها مش غالى عنده

ليه مع اى مشكله احنا اللى نحزن ونتضايق ونبكى

وليه هو ينام وينسى الانسانه الحزينه بسبب تصرف منه جرحها

ليه نعمل حاجه غصب عننا عشان نرضيه ونعيش نندم عليها باقى عمرنا لكا بعد فوات الاوان

حد يقدر يرد عليا

حد يقدر يجاوب على ليه وحده من دول

أسأله كتير بتخنقنى كل ما افكر فيها

حد يرد عليا ويريحنى

اذا اعجبك الموضوع و اردت نشره في المنتديات الاخرى فاستخدمي هذا الرابط:
ليه؟؟؟؟؟؟؟؟؟؟
http://forums.fatakat.com/thread53810

[كلي امل رغم الألم]

كل ما مافعلته وانا اقراء تساالاتك هو اني بكييييت بمرااااااااااااااااااااااااره اسئله صعبه مازلت ابحث عن جوااب لهااا
قلبتي المواجع ام جيهاان

[ام جيهان]

لمجرد قرائتك اسألتى بكيتى
فما حال قلبى الذى تعيش فيه هذه الأسأله

[ام سراج]

ح ارد يا ام جيهان بس يارب ردي يريحك
اولاً: البنت المفروض ماتبديش خطيبها على اهلها,,لنه لسه مش جوزها..اهلها دلوقت هم الاولى...لكن تكون دبلوماسيه معاه..وتحاول تتجنب المشاكل قدر الامكان
ثانياً المشاكل بتحصل في كل جواز او خطوبه...شكلها بقت من لوازم الجواز ومش ح تكمل من غيرها
ثالثاً:بعد البنت ماتجوزت..لازم يكون ولائها لجوزها...بس مش لازم تيجي على اهلها..يعني خير الامور الوسط...هوه جوزها شرعاً لازم تطيعه في اي شئ إلا في معصيه الخالق...واهلها رحمها مأموره ببرهم ...وعموماً هي الست باللسان الحلو وفي الوقت المناسب..تقدر تعمل البدع ...ودعي ربنا قبل اي محاوله للكلام مع الزوج وماتعنديش...مهما ضاقت بتفرج
الراجل بيقرب مراته من اهله لأن ده الطبيعي..اللي مش طبيعي انه يبعدها عنهم ولا ايه..اما هي تستحملهم ليه...فده إرضاءاً لربنا في ارضاءها لجوزها وطاعتها ليه ومعامله اهله كويس وحفاظ على بيتها..ماهي ممكن تعمل كل شويه مشاكل مش ح تكسب منها غير نكدها هي وعيالها...وممكن تخسر جوزها
اما موضوع الخواطر ده...فالرجاله مش عاطفيين يعني مش زينا يحايل ويدادي إلا فيما ندر ومش عيب انك تشتري خاطر جوزك وتحايليه...لكن من غير ماتسمحي ليه مايحترمكيش او يهدر كرامتك
اخيراً الراجل برده بيحايل لكن بطريقته هو...والست مع الوقت بتعرف تلم الموضوع وتعرف ازاي تاخد من جوزها اللي هي عايزاه..بالرضا
ربنا يصلح حال الجميع

[ام جيهان]

واذا قدرتى تعملى كل حاجه وتحايلى جوزك فى كل حاجه الا بر اهلك

اذا كان اخوكى معاكى مثلا فى السعوديه وحلف بطلاق انه ميدخلش بيتك تعملى ايه

اذا كان نفسك تكلمى اخوكى كويس وخايفه لحسن جوزك يزعل وتكلميه زيه زى اى حد

واذا جوزك عودك على طاعته حتى فى حرمانك من اهلك وقطع صلة رحمك هتعملى ايه

هتقدرى ترجعيه عن قراره ده ازاى وبأى طريقه

[nona79]

يااااااااااااه الوضع صعب اوي

صعب وضع الست لما تكون مخيرة بين اهلها وزوجها

ربنا يعين هو القادر علي كل شئ

[ام هاجر 22]

انا على كدة جبل لانى بعت كل شىء
عشانه وبعد كدة هو اللى باعنى

[الحبوبة]

مش عارفة أقولك إيه بصراحة الست دايما هي اللي بتتجرح

[ام سراج]

طيب نتفق على نقطه...دينياً..لو هو عمل كده..انتي ليس عليكي اي اثم..ويتحمل هو الوزر كله
نيجي بأه لموقفه ده..بصراحه انا مؤمنه ان لكل فعل رد فعل..موقف جوزك العنيف ده-ورغم انه مش عاجبني ولا يعجب اي حد- لكن اكيد ليه سبب..ومش ح يتغير إلا بالصبر وكمان علاج السبب الاصلي اللي خلاه كده...
الصبر من عند ربنا..
اما السبب ايه؟..انتي بس اللي تعرفي..وانتي اللي تقدري تعرفي تعالجيه إزاي..
ربنا يعينك على ماابتلاك به..ويارب يعينك على حل مشكلتك

[habeeba]

ازيكو يابنات
انا عندي برده نفس المشكله..لكن مع اختي بس هو محلفش عليا بالطلاق ولا حاجه هو طفشها من البيت (طبعا بأسلوبه الوحش جدا معاها ) واحنا في غربه وانا مكنتش عارفه اعمل ايه..
مرت الأيام ورجع لقيته جايبلي اخوه والمفروض اني استحمله (مع انه مستحملتش اختي) اختي مقعدتش عندي اسبوعين وطفشت , لكن اخوه قعد سنه والحياه عاديه قاعد معانا مفيش اي مشاكل..ياترا تصرفي المفروض شكله هيبقى ايه؟ الإجابه ولا حاجه مكبره دماغي وعايشه لأولادي وبس...
والنتيجه إن أهلي زهلانين منه جدا وهو ولا بيعترف بخطأه وعايش حياته ورديه والمهم عنده نفسه ورضا امه وابوه عليه وان اخوه يكون مرتاح وبعد كده طظ في كل حاجه

[habeeba]

انتي كبري دماغك منه ..وأقسملك بالله ان الأيام هتعدي وهيحصل معاه نفس الموقف وربنا مش هيسيبك مكسوره ولا زعلانه بس ادعي وانتي بتصلي ان النفوس تهدا وان ربنا يدي كل واحد على قد ضميره ونيته..

[ام جيهان]

مشكورين يا بنات وربنا يخليكم ليا يارب

والله هى مشكله صعبه بس بحاول مع مرور الايام انى احلها وربنا يسهل

شكرا يا حبيبه وربنا يهديلك الامور يارب

انا اخويا عندك فى الكويت وهموت واشوفه ربنا يقابلنى فيه على خير يارب

اخنا دايما اللى بنكون كبش فدا فى الخطوبه وفى الجواز

[ام جيهان]

السبب يا ام سراج المشاكل العاديه بتاعة الخطوبه

واحنا الحمدلله اتجوزنا من 9 سنوات وهو لسه مش قادر ينساها

وبيقولى انا قلبى اسود ومش بقدر انسى

وانا فى نفس الوقت بحبه ومش بقدر اعمل حاجه تزعله بس فى نفس الوقت قولت له انت اتحمل الذمب انا مش قاطعه صلة رحمى انت اللى عاوز كده

بس هو بيخلينى اكلم اخويا ده فى التليفون وبكلم ماما وعادى يعنى بس ليا اخ هو مش بيحبه ومن اول ما عرفو بعض مش بيرتاحه لبعض ومش عارفه اعمل ايه عشان يحبو بعض

[toto s]

اظن انو ام سراج حكت كل اللي لازم ينحكى
والله يكون في عونك

[مروة w]

السلام عليكم :36_1_11[1]:
انا بقول حاجة اكلام ام سراج صح بس ممكن انتي تقدري بروحك اتحلي المشكلة الي انتي فيها انا بقولك كيف ديما اتحطي العدل فيما بينهما وتقدري تقسمي قلبك نصفين
نصف لزوجك والنصف الاخر لاهلك وانا اتمني انك اتحاول اتفكري في الموضوع
اكتير قبل متعملي اي حاجة واتمنالك الف خير
:36_3_15[1]:

[staaaaar]

عارفه ليه كل ده ؟؟؟؟؟
عشان ان شاء الله لينا كل الخير والسعادة عند ربنا
وده بكل الم تالمناه او هم او حزن
اللهم اغفر لنا وفرج كربنا وازل همنا

[حبيبة رسول الله]

الله يفرج علينا همومنا ومشاكلنا ويلم شمل عائلاتنا بالحب والسعادة والتفاهم
اهم شيء حياتك مع زوجك أولا امورها بخير وبعدها بالتفاهم وحدة وحدة ينسي الامور اللي حصلت من زمان مهما كان قلبه أسود وما بينساش بالحب حبيبتي رح تخليه يشوف أخوك غير سواء أخوك او اي احد من افراد اليلة كتير بتحصل هالامور بس المهم والاهم اننا نعالجها من غير عناد وتسكير رأس حتي ما ترجعش علينا بالمردود العكسي والله يعيننا
مع تحياتي

[أيـة]

انا عندي اجابـة
لـ : ليه مش بيكون فى قلبها مكان لحد غيره

* علشان بتكون خلاص تعودت عليـه
عاجبها وبتحبه وفي بالها ان مستحيـل تلاقي شخص
بنفـس تفكيره واسلوبه

شكرا علي الموضوع

الحلو

:36_3_15[1]:

[جهادالنفس]

السلام عليكم و رحمة الله و بركاته
ربنا يعينكو و يهديلكو الحال يا أم جيهان انتى و حبيبه . .و لكن قلب زوجيكما بيد الله فاكثرا من دعواتكما اثناء السجود بهدايتهما لكما . . و لا تنسى يا ام جيهان ان طبيعة الرجل تختلف غصب عنه عن طبيعة المرأه كما فطره الله عليها فطريقة تعبيره عن مشاعره و احتياجاته العاطفيه ايضا تختلف عن المرأه . . لذا تخطئ المرأه حينما تقارن بين ردود افعالها و ردود فعل زوجها

[الزوجة الاولى]

ربنا يهديلك الحال يا ام جيهان انا كان عندى نفس المشكله وجوزى مكنش بيكلم اهلى سنين بس الحمدلله الامور تراضت بس فى اخ الامش بيكلمه وربنا يهدى النفوس