[tafy80]

أكيد كلنا حصلنا مواقف طريفة في المطبخ بالذات لما الواحد بيكون مبتديء
يعني أكلة باظت حادثة ما كده يعني
يللا مستنيا ردودكم يا فتوكات

اذا اعجبك الموضوع و اردت نشره في المنتديات الاخرى فاستخدمي هذا الرابط:
إيه هو أطرف موقف حصلك في المطبخ؟
http://forums.fatakat.com/thread54979

[مدام سمر]

ههههههههههههههههه
بصى بقا هاكيلك من غير تريقة الموقف داة عمرى ما هانساة عشان جوزى دايما يفكرنى بية كنت بعمل كنافة والصنية ما كنتيش غسلها كويس وكان مكانها بصل فاطلعت كنافة محشية بصللللللللللللل تخيلوة كنافة بالبصل كانت رووووووعة اوعى بقا لحد النهارد جوزى فاااااااااكرها اهى اهى

[دعاء A]

دايم انسى الاكل على النار ويتحرق والاهم بيكون قرب الغداء في الايام العادية وساعات في رمضان ويقعدوا العيال ياكلو نفسيهم لغاية لما اعمل غيره هههههههههه بصراحة بكون في نص هدومي ههههههههه بس اعمل اية

[جنة القلب]

اطرف موقف حصلي كان امبارح كنت حاطه الصلصه على النار وجالي تليفون ورحت رديت على التيفون وأخدت راحتى في الكلام وفجأة لقيت رائحه الشياط وصله من المطبخ لعندي رميت التليفون وجريت لقيتها بقت صلصه سودا والحله اتحرقت
بس لحقت نفسي وعملت غيرها قبل ماما متصحى ههههههههههههه
وكمان كنت حاطه ماء عشان يغلي للمكرونه اخترت اكبر حله عندنا ومليتها ميه على الآخر والمغرب أذن وهي لسه مغليتش كويس انا بابا كان هيفطر فشغله ههههههههههه
رغم اني بطبخ كل يوم والحمد لله بيحبوا أكلي بس سعات الواحد بيحصله فعلاً مواقف طريفه

[ام ركان]

انا بقي اخدت الايزو في المواقف المنيلة بنيلة فى المطبخ

اول ما اتجوزت زوجى قالي اعمليلة اومليت انا بصراحة كنت في الطبخ ابيض ياورد بس كنت بشوف ماما وفتكر شوية حاجات كدا ومن ضمت الحاجات انها لما بتعمل الاومليت بتقلبه في القلاية من غير شوكة ولا معلقة بتطيره في الهوا كدا محترفة بقي
انا بقي جيت اقلبه كدة وبقدرة قادر الاقي البيض طار في الهوا وكانة بيلعب جمباز وهب لزق في سقف المطبخ وعشان اعرف انزله قبل مازوجى يدخل ويشوف ابدا معرفتش
جاى التانى يشوفنى خلصته ولا لا قلتله اه عملته قالى طب هو فين جعان اوى شاورت له علي السقف وطبعا مش عاوزة اقول رد الفعل

[gannat mam]

حلللللللللللوه ام راكان

هفتكر اى مصيبه من اللى بعملهم واشارك

[راجية رحمة اللة]

عمى كان جاب لى لحمه اعملها ليه هو واصحابه فوضعت اللحمه عشان تستوى على البوتجازوطلعت عند جدتى اعمل ليها حاجه وجاءت لى واحده صحبتى وقعدنا اتكلمنا ودخلت شوفت اللحمه ماكنتشى لسه استوت فزودتهاميه وسبتها وطلعت وفجاءه شميت ريحة شياط من عند جدتى تخيلوا شميت الريحه من المنور فجريت ولقيت..........اللحمه اتحرااااااااااااااااااااااااااااااااااقت.والدخان مالى الشقه.

[Reham]

انا مرة اختي الصغيرة صحتني من النوم عشان هي جعانة
و قالتلي سخنلي ملوخية
قمت و مكنتش فايقة فحطيت الملوخية على النار و قعدت في الصالون
و بعد شوية شمينا ريحة شياط في الشقة
قمت لقيت الملوخية فايرة و واقعة و على البوتجاز و سودا
ساعتها ماما صحيت هزئتني و بابا ضربني

[tafy80]

هاهاي مواقفكم كلها حلوة وزي العسل زيكم يا فتوكات
وشكرا لمروركم كلكلم

[tafy80]

هحيلكم انا بقى
أنا اتجوزت من 4 سنين قبل رمضان بعشرين يوم وطبعا دول الواحد سافر فيهم شوية والباقي كان الاعتماد على الإعانات الخارجية بما إني لسه عروسة فالاختبار الحقيقي كان في رمضان وكان حته رمضان
مبدئيا كنا كل يوم نفطر بعد المغرب بنص ساعة بسبب بطئي الشدييييد وحوستي الشديدة في المطبخ
أما عن نوعية الطعام خدوا عندوكو
أول يوم عملت ملوخية وعشان أخلص بسرعة عليت النار على التوم أوي وانا بحمره فلونه اغمق وشبه اتحرق فبقى طعم الملوخية محروق ولما جوزي داقها -وانا كنت لسة فالشوربة- لقيته عمال يحط عليها سلطة كتييير وقلتله ايه الأخبار قاللي كويسة فلما دقتها قلتله عرفت ليه بتحط عليها سلطة دي محروقة أنا مش هاكلها دي طعمها وحش اوي -شوف البجاحة!!- قاللي يعني انا ساكت وباكلها اسكتي انت كمان و وداري عالخيبة

[ايناس عادل]

انا بقى لسه من فترة كنت عند والدتى وكانت مريضة وكنت باعمل الاكل انا واختى الاصغر منى وكان فيه ناس جايين على الاكل وقمنا عملنا رز فى الفرن وبطاطس فعلينا الفرن وانشغلت بالعراك بين الاولاد وفجأة افتكرت لقيتة اتحرق وقمت عملت غيره وقلت لاختى خديه على السكت للفراخ اللى فوق السطح ولما رحنا لوالدتى قالت خلصته الاكل قلنا طبعا قالت لاختى طيب اكلتى الفراخ اوعى تكونى نسيتيهم قالت لها ازاى ده اكلوا احلى اكل ناقصهم اللحمة بس 000

[mahou]

أنا بقى تجربتى كانت ف القطايف ....
حشتها و كان شكلها تحفه .... و عملت العسل بتاعها ...
و قليت القطايف و حطيتها بعد كده ف العسل ...
و بعد كده الاقى العسل نشف على القطايف و بت زى الطوب ....
و جوزى بيموت ف القطايف ... عشان ياكلها يحطها ف ميه !!!!
عشان تطرى و تنزل العسل من عليها اللى جمد و بقى لونه ابيض ...
ههههههههههههههه ...
كانت اول واخر مرة اعمل قطايف ............

[الحنين13]

بصى ياستى احنا كنا مرة معزومين انا وجوزى وكان فى العزومة كفتة باللمة بس وكانت طعمة قوى فجوزى طلبها منى وكانت اول مرة اعملها فالمفروض اللحمة بتكون نية بس انا عصجتها ولحد دلوقتى بيفكرنى بيها مرة تانية بعمل برضة كفتة نسيت احط البصل وجوزى زلنى يومها

[قطة جوزها]

صحبتى أول ما اتجوزت عملت كفتة عجيبة
عصجت اللحمة وبعدين حطتها فى الكبة فرمتها تانى وصبعتها وحطتها فى الفرن ويا عينى جوزها جتله أرفة من الكفتة ومباش يآكلها

[tafy80]

لا حول ولا قوة إلا بالله
أنا بقى مرة عملت كفته عجب ، بالويكة (بامية مجففة ومطحونة) بدل ما أحط عليها فريك مطحون حطيت ويكة (أصل البرطمانين كانو جنب بعض) لا وايه كنت عازمة حماتي واخوات جوزي )))):