[بيدووجنة]

ازيكم يا بنات
ايه رأيكم يا بنات كل واحدة فينا تدخل وتحكيلنا موقف حلو طريف ضحكها حصل مع ابنها
والل عندها اكتر من طفل تحكي بردو وتضحكنا معاها

وانا هبتدي بنفسي معاكم.... احم احم

مرة لما كنا في مصر بيدو كان عنده سنتين ونص
لقيته جاي وبيديني حاجة في ايدي وبيقولي بكل براءة:
دي لكي يا ماما يا حبيبتي
خدتها منه بكل رقة وحنان وابتسامة عريضة:36_1_1[1]: وبقوله:
شكرا يا بيدو يا حبيبي
وببص اشوف ايه ده، لقيتها كريستال زي اللي في نجفة الصالون بتاعتنا!!!
فجأة....الابتسامة العريضة اتشالت وحل محلها تكشيرة أعرض وقلتله وأنا بجز على أسناني من الغيظ:
ودي جبتها منين يا حبيبي ؟
خدني من ايدي ببراءة الأطفال وطلعنا الصالة وشاورلي على النجفة بكل فخر وقالي:
من هنا!!!
استغربت أوي وقلتله:
ودي جبتها أزاي يا بيدو يا حبيبي
وياريتني ما سألت
لقيته قلع الشوز بتاعه بسرعه وحدفه عالنجفة ملحقتش أمنعه بمعنى أصح مكنتش متوقعة ولا مستوعبه
وتك تك تك نزل كريستال كتير
أنا اتخضيت وصرخت وشديت بيدو أبعده
لقيته بيقولي وهو فرحان ومبسوط:
متخافيش يا ماما ، بصي فيه كتير أزاي!!!
ووطى يجمع الكريستال الل اتكسر كأنه بيجمع تفاح من الشجرة!!!
:36_1_19[1]::36_1_19[1]::36_1_19[1]::36_1_19[1]:
قعدت اضحك ضحك بهستيريا من الموقف ده
ولحد دلوقت لسه فاكرة الموقف كأنه حصل امبارح
ولسه كمان بضحك عليه وبقول الأطفال دول عليهم حاجات تموت م الضحك
وبيعملوها بكل براءة ونقاء

ها يا بنات...
مين تاني هيحكيلنا حكاية حلوة ويضحكنا معاه؟
مستنية مشاركتكم وردودكم معانا
وربنا يخليلنا ولادنا ويبارك فيهم ويحميهم امين يارب العالمين

اذا اعجبك الموضوع و اردت نشره في المنتديات الاخرى فاستخدمي هذا الرابط:
يلا بينا كل واحدة فينا تحكي موقف طريف حصل مع طفلها
http://forums.fatakat.com/thread56710

[بيدووجنة]

ايه يا بنات ولا وحدة فيكم حصل معاها موقف حلو ولسه فاكراه؟؟؟!!!
دي حاجة غريبة جدا
طيب مش شرط أطفالك ممكن أطفال اختك صحبتك الجيران زي متحبي
عادي يعني
أدينا كلنا بندخل ونضحك بعض وبنفرفش
مستنياكم يا فتكوات يلا تعالوا بئا

[toty5858]

فكرة حلوة يا مرمر فعلا الاطفال ليهم مواقف مضحكه كتير

انا اكتر موقف ضحكني عليها كانت لسه عندها 9 شهور

وكانت اختي عندنا وجايبه معاها قطه صغيرة قوي كانت لسه مولوده

وقالت خليها يومين عندكم وانا هاجي اخدها لانها مدمنه قطط

وبعدين كانت رنا بتسحف في الوقت ده وانا قاعده في المطبخ ومش سامعه صوت رنا خرجت اتسحب ولقيت رنا قاعده علي الارض وماسكه القطه الي لا حوله ليها ولا قوة وعماله تنتف في ريشه والقطة مستسلمه ليها خالص زي ماتكون بتقول بيحبني ما بيحبنيش

جريت بسرعه واخدت القطه المسكينه من تحت ايد السفاح ههههههههههه

طبعا القطه بقت اول لما بتشوف رنا جايه عاليها كانت بتطلع علي ظهر الانتريه عشان كده رنا مش هاطولها يعيني عليها المسكينه

[toty5858]

انتي فين ياقمر وحشتيني لما تدخلي علي الياهو رنليلي

[بيدووجنة]

ههههههههههههههههههه
ضحكتيني اوي يا توتا واللهي
يا عيني عليها القطة المسكينة
بس ضحكتيني بكلمة بتحبني مبتحبنيش ورنا بتنتفها
هنقول ايه قطة بتلعب بقطة هههههههه
فعلا الأطفال عليهم حاجات تضحك جدا ربنا يخليهم لنا يارب

[tafy80]

أنا بأة كانت بنتي عندها سنتين وانا خرجت أخرج كيس الزبالة في المنور عشان الزبال بيعدي ياخدو من هناك وكانت هي بتلعب في أوضتها فسبت باب الشقة مفتوح عالآخر و مش واخدة خوانة وفجأة لقيتها عند الباب وبتضحك أوي وطراخ راحت قافلاه
خبطت عالجيران وطلبت جوزي عشان يجي يفتحلي ويا حرام اتخض وجه من مدينة نصر للمعادي في 10 دقائق وكل ده وهي بتضحك فاكرانا بنلعب

[بيدووجنة]

ههههههههههههههههههههههههه
ايه يا tafy80المقلب ده
لا كله كوم وبنوتك وهيا بتضحك ببراءة زي الملايكة وبتقفل باب الشقة
ههههههههههههههه
ربنا يخليهالك وتشوفيها عروسة وبجد موقف مضحك جداههههههههه
وفرحتيني بمرورك الجميل وموقفك الطريف

[بيدووجنة]

انتوا فين يا بنات؟؟؟؟؟
ايه مفيش واحدة عندها مواقف حلوة تحكيهالنا
امال فين ولادك او ولاد اخواتك او ولاد قرايبكم او ولاد صحباتك او ولاد الجيران
يلا بئا كله يدخل ويشارك معانا
تعالوا نضحك بعض ونسلي بعض واحتمال كمان نفيد بعض عشان ممكن موقف طريف مضحك يكون فيه حاجة نتعلمها وناخد بالنا منه
ماهو زي ما بيقولوا شر البلية ما يضحك
مستنية مشاركاتكم معايايا فتكوات
:11_12_13[1]:

[بيدووجنة]

بيدو وجنة واحنا في مصر لما بعمل الأكل في المطبخ بسيبهم يلعبوا ف غرفتهم بلعبهم وساعات بيلعبوا بالعربيات بتاعتهم ف البلكونة.
ومرة من المرات دي لقيت البواب طالع وجايبلي دباديب كتير وبيقولي اللعب دي وقعت من البلكونة بتاعتكم !!!!!
استغربت اوي فدخلت الاودة لقيت بيدو وجنة بيرموا اللعب من البلكونة فزعقت كده وقلتلهم:
ايه دا بتعملوا ايه بترموا اللعب من البلكونة ليه؟؟؟؟؟؟؟
وكنت متعصبة عالآخر
لقيت بيدو بيقولي ببراءة:
مهو عايز يطير بره شوية
لقيت جنة بتقولي:
عادي يا ماما وانا رميت اصحابه كمان عشان يلعبوا معاه
ههههههههههههههه
قعدت اضحك ف سري ومش عايزة ابين احسن يضحكوا هما كمان ونقلبها ضحك وهزار
وهما بصراحة ما بيصدقوا
الأطفال دول عليهم حاجات تجننننننن

[بيدووجنة]

مرة كنت خارجة ومعايا بيدو وجنة
فشاورت لتاكسي وبعد ما ركبنا سواق التاكسي كان بيدخن سجاير:36_5_11[1]:

لقيت بيدو بيقوله عمو هتروح النار وبطنك هتوجعك

وانا طبعا اتكسفت وعماله عيب يا بيدو خلاص يا بيدو اسكت يا بيدو
وبيدو لا يمكن ابدا مصمم
عمو هيروح النار وبطنه توجعه
لقيت سواق التاكسي بصله اوي وبعدها قاله ليه يا حبيبي
فقاله عشان بتشرب سجاير
لقيت الراجل رمى السجاير من الشباك قاله بس كده اهو
كده لسه هروح النار وبطني توجعني ؟؟
فبيدو قاله لا خلاص
بس مقلوكمش عالاحراج الل كنت فيه بجد
الاطفال دول بيعملوا في اهاليهم حاجات
بتخلينا في مواقف بايخااااااااااااااااااااااا

[واقع الأيام]

هههههه
الله اكبر
بسم الله ما شاء الله
عسل ولادك يا ام بيدو وجنة
ما شاء الله
بس عجبني الصراحة بيدو في موضوع السجاير
كمان دول اطفال ذنبهم ايه يتنفسوا هواء ملوث؟
ده اسمه تدخين سلبي
انا زمان لما كنت اركب تاكسي لوحدي
اول ما اركب اقول له السجاير من فضلك اطفيها

بس عساسيل ما شاء الله
وجنة البراءة كلها
رميت اصحابه معاه
ما شاء الله شايفة؟ مش عايزة تحرم اللعب من بعضها ازاي؟
حنينة البنت دي ما شاء الله

ربنا يخليهوملك ويحفظهم يارب

..

انا ليا مواقف مع الاطفال كتير جدا
بس دلوقتي مش فاكرة ولا حاجة
اول ما افتكر هدخل اكتب ان شاء الله
بس نفسي فعلا الناس تتفاعل مع الموضوع ده انا بموت في الاطفال وبراءتهم ومواقفهم

[واقع الأيام]

صحيح نسيت اقوللك
اوعي تسيبيهم يلعبوا في البلكونة لوحديهم تاني

[toto s]

هههههههههههههههههههههههههههههه
ربنا يخليلك بيدو وجنه يا ام بيدو
والله مواقف حلوه كتير
وموقف الباب بتاع تافي عجبني كتييييييير

[tafy80]

ماشي ماشي كلوكو كده فرحانين فيا معلش
هو الواحد بيضحك دلوقت بس وقتها الواحد كان في حالة يرثى لها وانا واقفة بالبيجامة عالسلم (بس الحمد لله كانت شتوي) وطبعا مرعوبه على البنت اللي قاعدة جوة لوحدها ياللا ربنا يخليهم لنا ويجننونا كمان وكمان

[بيدووجنة]

نورتتيني يا واقع الأيام بجد
ودي عيونك الحلوين يا قمر واللهي
وفعلا التدخين السلبي ده اوحش حاجة ممكن تئذي الأطفال والكبار كمان
وجنتي دي بئا لمضة لماضة وساعات بدل ما ناديها جنة بناديها زنة من كتر الزن الل ما بتزهئش منه. وساعات كتير بتقعد مع نفسها مع عرايسها ولعبها تتكلم وتمثل ههههههه البنات دول عسل اوي وفيهم حنية غريبة مع ان واللهي بيدو حبيبي حنين جدا جدا ربنا يخليهولي هو وجنة يارب ويبارك فيهم
وحكاية البلكونة دي حرررررررررمت اسيبهم يلعبوا ف البلكونة تاني لوحدهم بعد ما البواب مرة رن الانتركم وكنت ف المطبخ وقالي حاسبي يا مدام الولاد باصين مممن البلكونة
طلعت جري لقيتهم واقفين عالسور وبيبصوا اترعبت جدااا واللهي ودخلت جري. وانا بدخلهم لقيت ناس كتير واقفة تبص فوق ولسان حالهم بيقول حرام عليكي يا مهملة انتي ام انتي
طبعا مسمعتهمش بيقولوا كده بس كنت حاسه بيها
من يومها فعلا حمدت ربنا انه سترها وحرمت اسيبهم لوحدهم خالص والاول مكنتش مدية خوانة انهم يقفوا ويبصوا
لكن الظاهر ان مع الاطفال كل حاجة ممكنة ومفيش حاجة مستحيلة
وربنا يخليكي ليا يا قمر وميحرمنيش من مرورك الجميل
ومستنية حكاياتك الحلوة يا حبيبتي

[بيدووجنة]

toto s واللهي بتبسط اوي لما بلاقيكي موجودة بمشاركاتك وردوك الجميلة
ومستنية مشاركاتك معانا وتحكيلنا كمان مواقف حصلت معاكي او مع قرايب واصحابك او جيرانك
وربنا يخليكي يا قمر على زوقك ومرورك
وفعلا موقف تافي يموت م الضحك ههههههههه
مستنياكي يا قمر تاني تنوريني

[بيدووجنة]

tafy80 عندك حق واللهي ف المواقف دي الواحد بيكون في حالة يرثى لها وهاين عليه يعيط عليه يعيط واللهي
بس بعد كده لما الواحد بيفتكر بيضحك عليها وبينسى القلق
وربنا يخليهم لنا وعلى رأيك يجننونا كمان وكمان مع ان واللهي يا تافي احنا مش ناقصين
وربنا يخليكي يا قمراية على مرورك ومشاركتك معانا وهستنا مواقفك الجميلة
وعلى فكرة حتى لو فيه موقف كان مش طريف يعني حسينا فيه بالقل والخوف على ولادنا فيها ايه اما نكتبه بردو اهو بردو نستفيد من بعض زي حكاية البلكونة والباب بتاعك الل اتقفل عليكي ههههههههههههه
خلي بالك من نفسك وهستناكي يا قمر

[واقع الأيام]

ههههه
انتي شكلك طيبة اوي
وما شاء الله البواب ده قايم بالواجب معاكوا تمام
مرة يجيبلك لعبهم
ومرة يقوللك حاسبي دول باصين من الشباك
هو بيشتغل ايه بالضبط؟ ههههه
لا بس ربنا يكرمه والله
الرجل ما قصر

في حد برضو يسيب اطفال في البلكونة ويقول انه مش مدي خوانة انهم ممكن يبصوا؟
انتي بتتكلمي على اطفال
يعني حركة يعني اي حاجة ممكن تتخيليها يعملوها
بيستكشفوا

عسل والله
بس خدي بالك منهم عشان خاطري يحسن انا حبتهم اوي يارب يخليهم لك يارب وتفرحي بيهم

[ايناس عادل]

:36_1_39[1]:مرمر وحشانى اسفة للاختفاء النت كان بايظ والله 00وايه الجمال ده ما شاء الله موضوع هايل 00واللى حصل معاكى ومع الاخوات فعلا يضحك ويغيظ الاتنين مع بعض بس برضه بيحصل بمنتهى البراءة00هههههه 00انا بقى حصلى مع اولادى عاوز يوم كتابة بس مرة وابنى صغير وجوزى قالى اوعى اوعى تسيبيه لوحده فى البيت وتنزلى المهم عملتها ونزلت اجيب حاجة من تحت البيت على السريع
وقلت 5دقايق وقفلت الحمام والمطبخ وفتحت له الTVونزلت وجيت بسرعة وبفتح الباب والاقى ايه 000علشان انكشف قدام جوزى ابنى قفل الباب من جوه لان كان فيه ترباس واطى وقعد ورا الباب اقوله افتح يا حبيبى 00ابدا 00يا حبيبى حاول تفتح 00لايمكن00ونزلت اتصل بجوزى وعرفته اللى حصل فجاب واحد وسبقتهم واول ما رحت بحاول افتح الباب 0000:36_1_4[1]:00لاقيته فتح الباب من نفسه والمهم انه حطنى فى موقف 000:36_1_10[1]:باييييييخ00وحرمت يا بوجى

[بيدووجنة]

حبيبتي واقع الأيام ربنا يخليكي يا قمر
وانتي كمان طيبة أوي يا حبيبتي وبجد كل بنات فتكات هنا ماشاءالله عليهم
وعندك فعلا حق ف حكاية البلكونة دي
بس خلاااااااااص حرمت
الواحد بردو مكنش لسه عنده خبرة بس واحدة واحدة ادينا بنتعلم وبنعرف اكتر
اما بالنسبة بئا للبواب بتاعنا الله يفتكره بكل خير
كان اديا ورجليا
حاجات تقع يجيبها بطانية تقع في بلكونة الجيرران المسافرين يجيبها بعد ما يتسلق الاسوار ولا كأننا في سيرك
طلبات في اخر الدنيا يروح يجيب
اكتشفت ان الملح او السكر خلص جرررري يجيب ف ثواني
دا غير حاجات تانية كتير من زبط دش ونت وتليفون الخ الخ
يعني من الاخر كان سوبر بواب وكمان كان البيه البواب شيك كده وانيق
بس بئا دلوقت مفيش لا بواااااب ولا حاجة
بقيت لوحدي خالص مالص هوم الون
شفتي انا متأثرة ازاي بالبواب السوبر بتاعنا وقعدت ارغي ههههههههههه
ربنا يخليكي يا حبيبتي
وبيدو وجنة بيسلموا عليكي وبيبوسوكي كتيييييييير
وبجد منوراني بمرورك الجميل الحلو ومشاركاتك معانا
ومستنية منك حكايات بئا نضحك عليها او نخاف ونقلق وبعدها نضحك