مصرية يا حبيبتي ربنا يثبتك ويزيدك ..
مبدئيا ما تقوليش عليهم محجبات الله يكرمك يحسن بتجيلي حالة استفزاز :36_5_11[1]:
بصي يا ستي عايزين نتناول المشكلة من كذا جانب:
1- مشكلة ان مفيش دلوقتي غير المحزق والملزق:
اللي عايز يتقي الله ويلبس اللي يستره مش هيغلب
بس ما نخليش الشيطان يقنعنا اننا عايزين وبنحاول بس مفيش
اه معاكي ان ممكن يكون صعب في وسط اللبس اللي موجود دلوقتي بس مش مستحيل
وفي كل حاجة
ولو انتي عندك مناسبة وعايزالها فستان سواريه لازم ضروري ولفيتي وما لقتيش هتطلعيه من تحت الارض حتى لو فصلتي وتسألي وتشوفي مين اللي بيفصل كويس
حق ربنا اكبر من كده
ما ينفعش التهاون بيه وما ينفعش نتحجج فيه بواقع مجتمع
عرضنا المشكلة .. طب ايه الحلول؟
1
تقدري كخطوة مبدئية تلبسي التونيكات بس مش الضيقة دي انتشرت جدا او مونتوه برضو منتشر جدا واي خياطة ولو نص نص تعرف تطلعهولك تحفة لأنه مفيهوش شغل .. وتلبسي تحتيهم جيبات
نقطة ان الجيبات مش عملية .. دلوقتي ما بقاش في اكتر من الجيبات الاسباني اللي واسعة جدا وتتحركي فيها براحتك ..
2
عندك يا ستي العبايات منتشرة برضو جدا دلوقتي .. طبعا في منها المحزق والملزق والذي يظهر اكتر ما يخفي .. بس ممكن تنقي لك ستايل عباية لا يصف ولا يشف وممكن تفصلي عليه حتى بعد كده بألوان غامقة (كحلي - زيتي - بني - ..) مش لازم اسود عشان يعني محدش من اهلك يعترض ولأنه مش شرط اسود يعني هو اكتر بس في البعد عن لفت النظر بس مش مشكلة
2- مشكلة الاسطوانة المشروخة (( ده انتي لسه صغيرة!!!)):
طبعا دي اسطوانة مشروخة عند كل الناس تقريبا
وياليت شعري! نفسي اعرف ايه مفهوم الصغر عند الناس؟
انتي يا حبيبتي مش بلغتي وبقيتي مكلفة؟
يعني عند ربنا انتي مش صغيرة .. انتي متحاسبة عن كل فعل وكل كلمة وكل حرف
الموت ..
بييجي مثلا للكبار بس؟
وبعدين ييجي عند الصغيرين ويقول: لا اصل دول صغيرين؟
الموت ما بيفرقش {ولكل أجلٍ كتاب}
بنشوف اطفال بيموتوا وشباب وعواجيز وكل حاجة
الموت مش موقوف على سن معين
يبقى ما نقولش احنا صغيرين لأن الموت لما بييجي مش هيبص للسن الاول ويستأذنك
والكلمة دي انا سمعتها كتير جدا وبسمعها لحد دلوقتي
الحوار المعتاد في الحالات الرخمة اللي زي دي:
-ايه يا بنتي اللي انتي عاملاه في نفسك ده!
# خير يا طنط عاملة ايه؟
- يعني يا بنتي اللي انتي لابساه ده وخانقة نفسك!
((ده انتي لسه صغيرة))
عيشي حياتك وشوفي الدنيا
#لا ما انا شايفاها يا طنط الحمد لله وعايشة حياتي مش ميتة وبعدين هو انا اشتكيت لحضرتك اني مخنوقة؟؟ .. انا اللي لابساه مش حضرتك .. شكرا على شعورك النبيل يا طنط :36_1_23[1]:
3- مشكلة الايشاربات القصيرة:
معاكي ان مشكلتها مشكلة .. بس انا اعرف اصحابي اللي بيلبسوا ايشاربات طويلة بيجيبوا قماش جاهز ويودوه للخياطة بس تسرفل لها اطرافه
وبيبقى طويل وكل حاجة
وممكن توفيرا لكل الحاجات دي في الاسدال او الملحفة ما شاء الله ساتر وبيغطي ونزل منه نوعيات شيك جدا كمان ممكن اقوللك عليها بالتفصيل ان شاء الله
4- مشكلة النقاب:
النقاب يا حبيبتي دلوقتي ما بقاش مشكلة اطلاقا
ولما تيجي مصر ان شاء الله هتشوفي بنفسك كمية المنتقبات اللهم بارك في ازدياد
اه طبعا هتشوفي مناظر مؤسفة في الشارع بس برضو الخير موجود الحمد لله ولسه في البنات المحترمة اللي بتحافظ على نفسها وبترفض انها تبقى سلعة تعرض جسمها للشباب يتفرج عليه كل من هب ودب
انا منتقبة بفضل الله وعمري ما تعرضت لموقف كده ولا كده ولا عمر حد في الكلية كلمني بفضل الله وصحباتي كتير ما شاء الله منتقبات عمر ما واحدة فينا اتعرضت لحاجة لمجرد انها منتقبة
بالعكس والله ما بلاقيش غير كل احترام من الناس
اي نعم في ساعات ناس مريضة تبص بصات مش كويسة .. بس زي ما قلنا دي ناس مريضة .. وليس على المريض حرج ودول قلة بفضل الله تعالى.
نقطة بقى تانية
انتي بتقولي انك في السعودية يعني اهلك واخدين على نظام النقاب وكده ..
هل هما معارضين انك تلبسيه؟
ولا انتي اللي خايفة من موضوع المضايقات؟
...
طبعا كالعادة طالما "واقع الأيام " ردت على موضوع فلازم تتوقعي انه عريضة مش رد ...
ومش هقعد زي كل مرة اقول معلش طولت عليكوا يحسن بقى منظري وحش اووووي :36_1_23[1]:
ارجو انك ما تلاقيش في كلامي حدة
انا حدتي على الموضوع مش عليكي يا جميل ..
بالعكس انا مبسوطة منك جدا انك في السن ده وبتفكري كده
وربنا يستر علينا وعلى كل البنات
اختك
((شوشو))
M
