[annos]

المواضيع التى طرحت كانت جميلة قوى بس التطبيق فى الواقع ساعات بيختلف
عرفينا صفات زوجك وكيف بتتعاملى معاة بكل صراحة؟؟؟
لان دة بمثابة تطبيق عملى غيرك هيستفيد منة يعنى مثلا لو زوجك عصبى كيف بتمتصى غضبة او لو بالة طويل او غيور اشرحى ازاى بتتعاملى معاة
انا هبدأبنفسى

صفات زوجى

• طيب وحنون كتير الى اقصى درجة
• عصبى جدا ولكن بذوق وأدب مستحيل تمسكى علية غلطة
• نظيف ومرتب الى درجة كبيرة جداا
• رومانسى قوى وعاطفى
• ذات شخصية قوية جداااااااااااااااااااااااا
• غيور قوى
• متعاون ويتحمل المسئولية

اما انا يا بنات فية كتير من صفاتة احب النظافة والترتيب دائما متفقين فى الاذواق والحمد للة
لما بيكون عصبى بحاول اناقشة بهدوء ومستحيل اقولة انة غلطان لان دة هيزود المشكلة وانا بيبقى كل همى اهدية بس
المناقشة بنا طويلة جدا دائما النتيجة انة يقنعنى برأية ازاى معرفش
بحب ادلعة كتير وادلل علية كتير
بدى حطة جوة عنية ومش عنية وبس لا فى كل حتة فية
وعلى قدر المستطاع اتفادى اى شى يخلية يغير حتى لا اجرح احساسة او يتسبب فى مشكلة بنا



ياريت تتفاعلوا معايا وكل واحدة توصف زوجها وكيف تتعامل معاة؟

[سوكة الددة البيضة]

الله يسامحك يا انوس انتى عارفة اول ما قرات العنوان بتاعك قلت يالهوى ايه السؤال ده؟ افتكرتك بتسالى عن السيكو سيكو............

انا وزوجى اتفقنا اول ما تزوجنا على حاجة لطيفة جدا وبتراضى كده من غير اجبار.
قسمنا الأمور المهمة الى نصفين النص الأول يشمل (البيت من مصروف - وتوفير - ونظافة - وامور الأولاد - والتعامل مع الميس والدادا بتاعة الحضانة - نوع الأكل - وقت الزيارات العائلية وغيرها والشرط دون التدخل الا للمعرفة فقط )

النص التانى يشمل (الأمور المادية الكبيرة مثل دخول مشروع تجارى - شراء قطعة ارض - اى امر يتعلق بالشغل )
وكل واحد فينا بيحكى للتانى من باب اخز الراى لكن القرار الأخير لكل واحد فينا فى اختصاصه .
بينى وبينك الطريقة دى مبتخلكيش تحتكى بعيوبه بشكل مباشر
ولا يتعصب عليا ولا العكس ولايخنقنى من بطئه ولا العكس

[emanfarid]

الفكرة حلوة اوي يا انوس وتلقائية وده المهم لانه فعلا الكلام مهما كان كويس وزي الكتاب ما بيقول غير الحياة الواقعية اللي بنعيشها والمواقف اللي بنتعرض ليها
تصدقي انا عمري ما سألت نفسي جوزى ايه مميزاته وايه عيوبة . انا اخدته كده علي بعضه بالحلو والوحش لاني بحبه. صحيح بعد كده بتكتشفي شوية عيوب بس ممكن تتعاملي معاها .
انا مشكلتي الاساسية مع جوزي نرفزتة يعني هو بيحبني وبيعاملني كويس واوقات كتير مش بيرضي يزعلني وبيعملي اللي انا عايزاه وبياخد رأييي في كل حاجة حتي في شغلة وبيسمع كلامي فيه مع اني مابشتغلش , بس هو بيبقي واثق ان رأيي صح . بس اما يتنرفز ما تعرفيهوش كأنه بقي واحد تاني و لو احنا لوحدينا بسيبه خالص لغايه ما يهدا وبعدين نتكلم واقنعه باللي انا عايزاه . لكن المشكلة الحقيقية لما بيتنرفز قدام الناس ويزعق ما ببقاش عارفة اعمل أيه , لو رديت عليه هايزيد و لو ما رديتش ها يسؤ فيها وان كمان كرامتي ها توجعني قدام اي حد . فبحاول ما ارودش بس بحس ان شكلي وحش قدام اللي موجود.

[أم لوجى و ملك]

بصى يا انوس
انا زوجى
طيب وحنين وقلبه ابيض وبينسى الاساءه بسرعه وبيحبنى وما يقدرش يزعلنىوكل الحاجات الجميله والحمد لله مجتمعه فيه بس عصبى جدا جدا
وطبعا انا لازم وقت نرفزته مردش عليه ولو رديت المشكله طبعا بتكبر
عشان كده
1-بتجنب زوجى تماما وقت عصبيته
2-لازم ولابد من التشاور معا فى كل الامور وخاصة لو كان مقدم على شىء مهم كمشروع او خطوه مهمه فى الشغل وهو عارف ان رايى مهم لانى متانيه جدا وهو مندفع جدا جدا فرايى انا دائما بيكون صح
3- بنجامل بعض كتير يعنى ممكن اعمل حاجه انا مش عايزاها عشان خاطره زى مثلا عزومه او زياره تقيله على قلبى وفى المقابل هو بيقوم بنفس الشىء
4-خصوصيات البيت متخرجش بره جدرانه (متفقين على ده من اول زواجنا)
5-المناقشه ثم المناقشه فى الاشياء اللى بتضايقنا من بعض وكل طرف بيحاول يصلح من نفسه عشان التانى
6- لما بنتخانق والاقى الموضوع هيكبر بتراجع بسرعه منعا للمشاكل وهو كذلك يعنى كل واحد مره
7-المشاركه فى كل شىء تربية الاولاد مش على انا وبس هو بصراحه بيشاركنى فى تربية الاولاد وكمان فى مشاكلهم بيشاركنى فى مشاويرى حتى فى شراء ملابسى وانا كذلك بس فيه ناس بتستغرب من علاقتنا بس هو ده الحب

بس عاوزه تعرفى ايه تانى ده ملخص علاقتى مع زوجى

[annos]

[ولاء محمود]

بصى يا قمر
أنا زوج طيب وحنين وقلبه أبيض وغلبان أوى وممكن يساعدنى فى شغل البيت وبيحنى أعامله كأبنى وادلع فيه كتير
بيدلعنى كتير قوى
رومانسى اوى
عاطفى جدا
بيعمل حاجات طول الوقت عشان يبينلى حبه
بس عصبى شوية
ممكن نتناقش بس بيقنعنى بكلامه طول الوقت مش عارفة ازاى
مشكلته ان مامته بتحب النكد شوية فلما بتكلمه تقوله حاجة تضايقه تخليه باقى اليوم متضايق ومش ببقى عارفة هو ماله ومش بيحب يقولى عشان متضايقش
بس لما بعرف انه كلم مامته بعرف انها سبب الزعل
هو بيحب السفر معايا وبيحب يرضينى مش على حساب بيتنا
بس يا جميل هو ده زوجى ربنا يخليه

[لميس2]

بصي يا حبيبتي .. انا هقولك حاجه عن تجربه أنا دلوقتي مطلقه و سبب طلاقي اني معرفتش أفهم جوزي هو كان جميل جدا في كل حاجه بس أنا مكنتش شايفه انه كده كل تصرف منه كنت بترجمه غلط هنصح كل الفتوكات لازم تفهمي جوزك كويس

[ام احمد123]

عن تجربة شخصية كما طلبت
اهم ما يريح المراة مع زوجها ان تتعامل مع زوجها على انه الرجل بمعنى رجل الكلمة له و الراي النهائي له (مع وجود ديمقراطية و مناقشة بهدوء)و لكن لا تتعصب ابدا لعرض رايها لان الله امرها بان الراي و الكلمة و المشورة لزوجك و لا ننسى حديث رسولنا الكريم صلى الله عليه و سلم لو امرت امرت بالسجود لغير الله لامرت الزوجة ان تسجد لزوجها (مع الاعتذار ان اخطات في النص)

المهم صدقونى لن تشعر باي تحدي له اذا اطاعته و استأذنته في كل شئ ما يخص الاولاد او البيت او حتى في عملها تستشيره سيعطيه هيبته و احساسه بانها تقدره يجعلها تقدره

فحقه هذا الاستئذان عند الخروج عند دعوة احد عند انفاق المال ... الى اخره

و لا تأخذيها بديكتاتورية له و لكن الله امرك بذلك و سيجازيك على طاعتك له و حفظك لمشاعره
و اهم حاجة لا يتدخل اى احد في مشاكلك معه فلا تخلوا الدنيا من خلافات و ان يكون احترامك له فوق كل شئ امام الناس او بينك و بين نفسك فكلما احترمته قدرك و رفعك معه
ايه رايكم جربوا و مستنيا رايكم