[قلب برىء]

انا اسفه قوى ان كنت بتقل عليكم بس مش عارفه اتكلم مع مين غيركم عايزه حد يساعدنى فى حل مشكلتى
مشكلتى انى اتعرفت على واحد من الشات لفت انتباهى زوقه فى الكلام وطريقه حواره بتكشف عن شخصيه منظمه جدا وتفكير عميق فى اغلب مواضيع الحياه المهم اتكلمنا مع بعض فتره وحبيته وهو كمان حبنى جدا اتعلقنا ببعض واتقابلنا وجه لوجه زاد حبى ليه وحبه ليه زاد حكالى عن عيلته وعن ظروفه وانا كمان حكيت له عن نفسى ........المشكله بقى اللى فى الموضوع انه سبق له الزواج وعنده بنت صغيره سنها خمس سنين عايشه مع والدتها وظروفه الماديه مش قد كده بس هو حاصل على مؤهل عالى وشهادات كتير وشهاده ماجستير يعنى مركزه العلمى كويس ووظيفته كمان كويسه جدا ودخله منها يضمن لنا حياه كويسه وكمان يبعت منه نفقه للبنت الصغيره المشكله انه لما جه اتقدم لاهلى طلبوا منه شبكه كبيره وطلبات كتير هو مقدرش عليها وكانوا بيعجزوا فيه ولما سالتهم انتوا ليه بتعملوا معاه كده قالوا لى علشان احنا منعرفوش هو من محافظه تانيه منعرفش عنه حاجه ولا عن عيلته دى وكمان كان متجوز وانتى لسه انسه وبينكم فرق فى السن 12 سنه وماما كمان قالت لى هو شكله مش عاجبنى انا عايزه ليكى واحد شكله احلى مع انه شكله كويس وشيك جدا فى لبسه وقالوا لى كمان ده باين عليه شاطر قوى بيعرف يتكلم فى كل حاجه واحنا ليه نوجع دماغنا بواحد منعرفوش ويمكن يكون طمعان فينا وكمان ممعهوش فلوس يجيب ليكى الشبكه والعفش اللى يليق زى باقى قرايبنا اللى فى سنك هما يعنى احسن منك فى ايه
بصراحه يا جماعه انا انصدمت من كلامهم ده هو لما جه عندنا البيت حكى ليهم كل ظروفه ووراهم بطاقته وقالهم على عنوانه بالظبط وعناوين اخواته وقرايبه وقال لهم انا معنديش حاجه اخجل منها اسالوا عليه زى ما انتم عايزين وانا دخلى من شغلى كويس اقدر اجيب عفش حلو بس الشبكه دى كبيره قوى عليه وانا بحب بنتكم وقالهم بالفظ انا مكنتش اتخيل انى ممكن الاقى بنت فى اخلاقها العاليه دى فى الشات
المهم انهم رفضوا وطلبوا منى انى اقطع علاقتى بيه لانهم مش هيوافقوا بيه بصراحه انا حاولت ابعد عنه وهو كمان حاول علشان ميعمليش مشاكل بس مقدرناش انا بحبه جدا وهو كمان هو يعنى كل زنبه فى الحياه ان ربنا اعطاه زكاء وحسن تصريف للامور اهلى شايفين ان ده عيب فيه وتانى عيب حكايه زواجه المهم انى فضلت اتكلم معاه وعلى علاقه بيه بعد رفض اهلى له لمده 6اشهر وطول المده دى وهو بيحاول يدور على حل لمشكله الفلوس لحد ما ربنا كرمه بعقد عمل فى السعوديه وظيفه مرموقه بمرتب مغرى وفرحنا جدا انا وهو وفكرنا ان بكده خلاص مشكلتنا هتتحل بعد ما تفقنا انه يتقدم تانى ويطلبنى ونعمل خطوبه وهو يسافر لمده سنه ويرجع يكمل الجواز ونسافر مع بعض السعوديه بس اللى حصل ان اهلى برده رفضوا لنفس الاسباب اللى قلتلكم عليها انا مش عارفه اعمل ايه انا مش قادره اتخيل نفسى مع زوج غيره وهو بيحبنى جدا واتحمل رفضهم مره واتنين وثلاثه كمان حتى انا بكلم امى وبقولها انتى ليه مش موافقه قالت لى شكله مش عاجبنى قلت لها انا اللى هعيش معاه وشكله عاجبنى وايه يعنى لما يكون لون بشرته قمحى هو لازم يكون ابيض وحلو زى الممثلين مهو انا كمان جمالى متوسط فين المشكله بقى وكمان هو مش طمعان فينا انا متكلمتش معاه فى النواحى الماديه الخاصه بينا هو جاى عاوز يتجوزنى انا بغض النظر عن كونى غنيه او لاء ومشكله الفلوس اتحلت بس هى مش راضيه تسمعنى انا مش عارفه اعمل ايه هو اتحمل منهم رفضهم المتكرر له وقالى حاولى معاهم انا مش عايزه افرضه عليهم بس نفسى يشوفوا الموضوع بزاويه تانيه ولا يمكن اكون انا الغلطانه مش عارفه ساعدونى من فضلكم واسفه انى طولت عليكم

اذا اعجبك الموضوع و اردت نشره في المنتديات الاخرى فاستخدمي هذا الرابط:
ساعدونى علشان خاطر ربنا
http://forums.fatakat.com/thread62540

[مشتاقة لجنه ربى]

بصى اول حاجه اعملى صلاه استخارة
تانى حاجه لو انتى بتحبيه واثقه ان هو كمان بيحبك
وحاسه انه يستاحل انك تضحى علشانه خلاص
لازم تقنعى اهلك بيه بس مش تخسريهم
اتكلمى مع مامتك وباباكى براحه
وفيهم ان هو ده الانسان ال تقدر تكملى معاه حياتك
وانك بتحبيه وانك مش هاتتخلى عنه
حاولى تفهمى اهلك انك مش هاتقدرى تبعدى عنه
وانك عايزة وانه انسان محترم
وان الفلوس مش كل حاجه
الفلوس بتروح وتيجى
بس الانسان المحترم صعب تلاقيه تانى
تمسكى بيه وحاولى تقنعى اهلك بيه
وربنا يا حبيبتى معاكى
ولو خير ليكى ربنا يقربه منك اللهم امين يارب العالمين
اختك فى الله

[فتوكة الفتكة]

بصى طبعا اول حاجة الاستخارة
بعدين لازم تسالوا عليه كويس جدا جدا جدا
وكمان تسالوا اللى يعرفوه عن سبب ان علاقته الاولى انتهت
وبعدين يمكن اهلك بعد شوية يعرفوا انه فعلا كويس
ولو ان رايي ان الشات مش بيجيب حاجة كويسة الا نادر جدا
علشان كده بقولك لازم تسالوا عليه كويس جدا جدا
وربنا يوفقك فى حياتك كلها ان شاء الله

[ام نسيبة]

اعرف واحدة فى نفس موقفك
بتحاول تقنع اهلها وهما رافضين من قبل ما يتقدم علشان كن متجوز وعندو بنتين ومطلق مراتو .........شوفى
طبعا هو مش خسران حاجة بالعكس الراجل اللى كان متجوز وطلق واتاحت ليه الفرصة انو يلاقى واحدة انسة ومحترمة كمان يبقى يوم المنى عندو كانه سيتزوج من جديد فانتى فرصة بالنسبة له ...وهو دا مربط الفرس اللى مخلى اهلك مش موافقين عليه انا متاكدة انو لو كان لسة مش متزوج كانو احتمال كبير جدا ياخدوا الموضوع بجدية ويسالوا عليه ويتم الموضوع لكن والدتك بتتلكك انو شكلوا مش حلو وفرضوا عليه شبكة كبيرة يعنى رفض بالذوق وكلامى هتعرفيه لو واحد مناسب من وجهة نظر اهلك اتقدم هتلاقى الشروط عادية وشاريين راجل لبنتهم كمان ....خلاصة الكلام...اوعى تتورطى معاه فى حاجة من وراء اهلك دول اكتر ناس بيخافوا عليكى ...ثانيا صلى استخارة وخدى بالاسباب وحاولى تقنعى اهلك ولو ربنا مش كاتب انو يكون زوجك لو اجتمع اهل الارض مش هيكون وربنا لا يقضى للانسان الا الخير وانك تكونى عندك ايمان بالله انو لو من نصيبك مش هيروح غير ليكى ولو مش من نصيبك استحالة .....ثالثا كون انو غريب عنكو ايه اللى خلاكى متاكدة انو هية دى صفاتو فعلا علشان زكى شوية يمكن بيحاول يستغل ذكاؤه ده معاكى وظاهر قدامك انو احسن واحد وطبعا عرفك عن طريق الشات يعنى عارف بنات كتير غيرك وهيعرف بعدك ....مسالة المشاعر دى احيانا كتير الواحدة لو ما استخدمتش عقلها شوية ممكن تكون عمياء لحد ما كل حاجة تبان قدامها وتحس انها اتخدعت ...واخيرا اقولك على وسيلة قوية جدا لو انتى فعلا خلاص احساسك صادق ناحيتو فاليك الحل
7
7
7
7
7
.........الحل يا بنتى العزيزة الكريمة هو الدعاااااااااااااااااااااءوما ادراكى ما الدعاء وخصوصا فى وقت السحر قبل صلاة الفجر بساعة تصلى وتقولى اللهم انى اشهد انك انت الواحد الاحد الفرد الصمد الذى لم يلد ولم يولد ولم يكن له كفوا احد وباسمك اللهم الاعظم وتقولى كل اللى فى نفسك وكدا تكونى خدتى بكل الاسباب واوعى ماترضيش بقضاء ربنا بعد كدا مع العلم ان كلامك معاه دلوقتى حرااااااااااااااااام هو اجنبى عنك وممكن يكون عرف انو طريقوا مسدود ويحاول يتسلى بيكى وفيه نا بتخطب وتقعد شوية تتسلى وتسيب البنت وفيه حاجة انا نسيت اقولك عليها الشاب صعب جدا جدا جدا انو ينسى انو عرفك عن طريق الشات ولو حصل بيكون اتنازل علشان خاطر لقى فرصة كبيرة فى اللى عرفها عن طريق الشات تخليه يتنازل عن مسالة انو عرفها عن طريق الشات ...يعنى ممكن كل شوية فى حياتهم يقولها انتى اصلا معرفة شات واسسسسسسسسسسسفة على الاطالة

[the queen of love]

فعلا ياحبيبة قلبي لازم تصلي استخاره الاول
ثانيا لو انتى واثقه فيه وبتحبيه اوى اتمسكي بيه لأنه ادام جالك اكتر من مره لحد البيت واتحمل رفض اهلك له يبقي شاب كويس وشاريكي
وان شاء الله لو ليكي نصيب فيه هاتبقى من نصيبه وربنا هايجمعكوا بالحلال قريب
بس اتحملي يمكن ده اختبار من ربنا عشان تتمسكي بحبيبك ده
وحاولى تكلمى معاهم مره واتنين وعشره وربنا يهديهم لك يارب

[رانيه]

عليكي بالاستخاره انشاء الله اللي في الخير يحصل توكلي على الله

[عصفورة فوشيا]

كويس والله انه طلع راجل واتمسك بيكى واتقدملك ,, المفروض هما يقدرو شجاعته ووضوحه وتمسكه بيكى

لو هو متمسك بيكى يبقى استنيه والجأى لربنا بالدعاء ,,و بصراحة ومن وجهة نظرى الشخصية اللى زيه كدة نادر الوجود اليومين دول ,, ربنا يجمعكم على خير ويسعدكم ويهنيكم


سلااااااااااااااااااااااااااام:sCh_twe ety:

[قلب برىء]

انا بجد متشكره جدا على انكم اهتميتوا بمشكلتى وانا اسفه انى اتاخرت عليكم لانى مكنتش بفتح النت خالص علشان اهلى طلبوا منى كده عموما انا هعمل بنصحيتكم دى واصلى استخاره وادعى ربنا واسيب كل حاجه لله وان شاء الله ربنا هيقدم الخير