السلام عليكم ورحمة الله وبركاته
حبيبتي سادات
بصي انا من ساعة ما قريت موضوعك الصراحة وانا قاعدة افكر هقوللك ايه
عندي كلام كتير اوي عايزة اقولهولك ومتأكدة انك محتاجة تسمعيه
بس مشكلتي بقى اني ما بعرفش اقعد ارتب وكده ببوظ اكتر هههه
بالعكس الكلام لما بييجي مني بتلقائية بيكون افضل كتير
عشان كده انا هحاول اتكلم معاكي في النقط اللي انتي قلتي عليها ولو في زيادة هزود وعادي الموضوع مفتوح نتكلم للصبح لو لسه مترددة انا معاكي قولي كل تردداتك وكل مخاوفك وما تخافيش مش هزهق ان شاء الله لأني كنت في نفس موقفك ويمكن اكتر والحمد لله لقيت اللي اقول لها مخاوفي وانقل لها ترددي من ايه وقدرت ترد عليا وتشجعني وكانت سبب في اني لبست النقاب بفضل الله
بس احنا مختلفين عن بعض شوية في اسباب عدم لبس النقاب ..ممكن تكون حاجة قريبة من عصفورة الجنة كده يارب تلبسوه انتوا الاتنين يا حبايبي
بس انا المعارضة كانت عندي شديدة جدا وما كانش ينفع حتى اجيب سيرة النقاب لا من قريب ولا من بعيد كانت تقوم الدنيا ما تقعدش لو حاولت بس اني المّح او اجيب سيرة النقاب ولا المنتقبات حتى هههه
ومع ذلك بفضل الله لبسته .. ممكن احكيلك القصة ان شاء الله قد تكون سبب في تشجعيك وانك تثبتي .. بس مش وقته دلوقتي خلينا فيكي
انتي تحمد ربنا بجد وتسجدي له سجدة شكر انك مفيش معارضة من اهلك مثلا ولا من جوزك .. والله الحمد لله نعمة كبيرة
والنعمة الاكبر كمان انك مقتنعة بيه ده شيء ممتاز
ومجرد تفكيرك في النقاب والحاحك انك تلبسيه ده يدل على انك جواكي خير كتير ما شاء الله نحسبك كذلك ولا نزكي على الله احدا
بس انتي عارفة بقى الشيطان قاعد متربص لنا وربنا عز وجل قال لنا كده في كتابه وحذرنا منه .. الشيطان قال: {وعزتك لأغوينهم أجمعين إلا عبادك منهم المُخلَصين}
طبعا الشيطان متضايق من حاجة زي دي انك تفكري او تمشي فيها حتى
والشيطان ما بيدخلش لكل الناس من نفس المدخل
كل واحد بيدخل له من نقطة ضعفه ومن المناطق اللي بتأثر فيه .. والشيطان قاعد فاضي ما وراهوش شغلانة غير انه قاعد لنا متربص بينا عايز يبعدنا عن ربنا ويدخلنا النار معاه بأي طريقة لأن دي اخرته وهو عايزنا معاه
جوزك .. احمدي ربنا انه مش معارض وانه هو مش مؤيد او مش مرحب بس .. ايش عرفك؟ ممكن يحب النقاب على ايدك انتي بعد كده وتبقي سبب.
انا اعرف بنات هيموتوا ويلبسوا النقاب واجوازاتهم يطلقوهم لو فتحوا بس موضوع النقاب ده معاهم .. موضوع مرفوض تماما
بالنسبة للناس .. انتي مالك بكلامهم ؟ .. ما اللي يتكلم يتكلم يا ستي .. واللي عايز يقول حاجة يقول .. انتي عايزة تلبسي النقاب عشان ربنا مش عشان حد .. والناس كده كده بتتكلم اصلا في حاجة ولا مفيش .. وربنا -عز وجل- قال: {وإن تطع أكثر من في الأرض يضلوك عن سبيل الله إن يتبعون إلا الظن وإن هم إلا يخرصون}
وطالما النقاب ده لله يبقى ما يهمكيش حد .. واي كلام او اي حاجة هتتعرضي لها في سبيل طاعة اجرك عند ربنا مش هيضيع .. حد يا ستي يكره عداد حسنات بيعد؟
لو فكرتي كده واحتسبتي اجرك عند الله واخلصتي النية لله .. بجد هتتمني الناس تتكلم اكتر وهتبقي من جواكي سعيدة انك بتتعرضي لده في سبيل الله
شوفي اشرف الخلق سيدنا محمد صلى الله عليه وسلم اتعرض لإيه في سبيل الدعوة؟
واحنا مين!
بالنسبة للشغل .. الشغل ده رزق ، ورزقك مكتوب لا هيقل ولا هيزيد ومش هتاخدي اكتر من اللي مكتوب لك .. واصلا لو فكرتي ان صاحب الشغل ده نفسه عبد زيه زيك عند ربنا عند الخالق الرازق .. هو مش بإيده حاجة اصلا زيه زيك .. كله بإيد ربنا سبحانه وتعالى .. وايش ضمنك؟ ممكن تتفصلي من الشغل اصلا من غير ما تلبسيه ولا حاجة؟
ولو لبستيه يا ستي ومشيتي من الشغل بسببه .. ايش ضمنك ان الشغل ده كان شر عليكي فعلا وربنا خلصك منه عشان انتي اطعتيه وتقربتي منه؟
وبرضو هرجع واقوللك طالما لله يبقى ولا يهمك حد ولا يهمك حاجة ..
و ..
[من ترك شيئا لله عوضه الله خيرا منه].
الشيطان بيخوفك ويقوللك رد فلانة مش عارفة ايه ورد علانة هيبقى ايه وشوفي دي هتبص لك ازاي .. وهيبقى منظرك وسط الناس ايه؟ وهتبقي غريبة كده
ردي عليه ما تستلميش لوساوسه
قولي ايوا ابقى غريبة .. الرسول صلى الله عليه وسلم قال:
[بدأ الإسلام غريبا وسيعود غريبا كما بدأ، فطوبى للغرباء]
حد يطول يبقى من الغرباء؟
بالعكس خليكي فخورة ومعتزة بحجابك وبطاعتك
وصدقا لو انتي من جواكي فرحانة ومعتزة بيه وكنتي قوية قدام الناس محدش هيقدر يهش ولا ينش معاكي
وبالنسبة لموضوع هو فرض ولا سنة
النقاب عليه خلاف فقهي
والمفروض في الحالات دي ان الواحد بيقرأ ادلة اللي بيقولوا انه فرض
ويقرأ ادلة اللي بيقولوا انه سنة ويشوف هو ايه اللي هيقتنع بيه امام الله
وربنا شاهد .. مش هتكوني مقتنعة بحاجة من جواكي وبعدين تيجي تغيري وتقولي هو ده اللي اقتنعت بيه .. ربنا مطلع
{يعلم خائنة الأعين وما تخفي الصدور}
{قل إن تخفوا ما في صدوركم أو تبدوه يعلمه الله}
وفي بيت شعر جميل اوي بحبه في الموضوع ده
بيقول:
نقــابي إن كان فرضا فقد ارتديته .. وإن كان فضلا فلست في غنى عن فضله !
سبحانك ياربي
وانا معاكي يا قمر ومتابعة الموضوع واي حاجة قوليلي ونتكلم ان شاء الله
وارجو اني ما اكونش طولت عليكي وصدعتك
اه معلش نسيت حاجة
كان في قول لأحد السلف بما معناه
انه يستحب التروي في اي حاجة قبل ما تعمليها الا الخير والطاعة
عايزين نكون من المسارعين في الخيرات
تحياتي
اشهد ان لا اله الا الله وان محمد رسول الله 
اخر حروفي سلامي يابحر جده