[رونا]

شوربة الجمبرى " الروبيان"




المكونات,,

نص كيلو جمبرى

جزر +كرفس

5 فصوص ثوم

زنجبيل طازه

فلفل حار

1مكعب خضار

معلقه صغيره معجون طماطم

فنجان صلصه تيرياكى "صويا سوس"

فنجان لومى

2 معلقه صغيره نشا مذابه فى ماء

بياض بيضه


"الطريقه"

أول حاجه طبعاً نكون منضفين الجمبرى وسلقينو حاجه بسيطه علشان الريحه مع ورق غار ومعلقة خل

ولو كان كبير نقطع كل واحده نصين

نفرم الثوم والزنجبيل والفلفل مع بعض

نحمرهم فى كمية زيت زيتون قليله

وبعد كده نضع الجمبرى نقلب قليلاً ثم نضع الجزر والكرفس

وبعد كده نضع فنجان الصويا سوس واللومى ومكعب الخضار ومعجون الطماطم

نقلب قليلاً ثم نضع كمية ماء مناسبه " حوالى 4 كوب ماء ويفضل أن تكون مغليه وسخنه"

ونضع القليل من الملح والفلفل الأسود وملعقتين النشا المذابه فى الماء


بعد الغليان وبعد التأكد من أن المكونات تجاانست

نضرب بياض البيضه جيداً

هذه الخطوه مهمه: نضع بياض البيض بالتدريج على الشوربه مع التقليب بأستمرار بشوكة الطعام فى الشوربه

حتى نحصل على قطع صغيره جدا لبياض البيض فوق سطح الشوربه

وفى الحال نطفئ النار

تقدم وتؤكل مع خبز محمص " يم يم يم لذيذه جداً "جربوها مش هتندمو

أنا من أول ما إتعلمتها أدمنتها

[hana]

[المشتاقه الى الجنه]

عندى جمبرى فى الفريزر ممكن اعملها بكره مشكوره يا جميــــــــــــــــــــــــــــــيل

[رونا]

hana شكراً على مرورك الجميل

ويارب تكون عجبتك

المشتاقه إلى الجنه خلاص يا عسل جربيها وقوليلى

أنا أول ما سمعت عنها إستغربت وقلت إيييييه شوربة جمبرى

بس بعد ما جربتها صدقينى طعمها فعلاً حلو

[ام ابراهيم]

كيفك رونا تسلمي يارب
بس تسلميلي شو يعني لومى
يمكن تكون غير اسم بسوريا
ممكن الشرح
يعطيكي الف عافية

[رونا]

أم إبراهيم هنا عندى
يا مرحبا يا مرحبا
مش مصدقه نفسى يا ناااس

بصى ياستى "اللومى" هو الليمون إللى بنشتريه جاهز من السوبر ماركت فى زجاجه
إللى بنحطو على السطله والحمص و والذره الحلوه وحاجات كتير

وفى منه نوعين فى ليمون أخضر وفى ليمون أصفر ويفضل للشوربه الأصفر

وممكن لو لم يتوف،،رنستبدل فنجان اللومى بنصف ليمونه كبيره معصوره

أشكرك على مرورك الكريم

[ام ابراهيم]

الله يخليك رونا صحيح انك مزوقة كتيررررررررررررررر تسلمي يارب

[نادو]

تسلم ايدك

[مدام ديدى]

الله يارونا حلوه اوى اناعندى كيس جمبرى هعمله بالطرقه دى جزاكى الله خير باااااااااى

[رونا]

نادو

اشكر لك مرورك

مدام ديدى

جربيها وإن شاء الله تعجبك على ضمانتى

[Om Hassan]

تسلم الايادى يا رونا

[رونا]

إ

نتى تسلمى على مرورك الجميل يا Om Hassan

[أم لوجى و ملك]

شكرا يا قمر على الوصفه

[رونا]

شكراً يا جميل على مرورك الأحلى

[moonyallam]

حلو اوى تسلم ايدك بس لو عندك طريقة شوربة السى فود ممكن تكتبيها

[رونا]

moonyallam

إنتى ممكن تعملى شوربة مأكولات بحريه بنفسه الطريقه دى بردو

يعنى ضيفى " كلمارى..وسمك فيليه..حبار..قواقع..سرطان بحر"

ولكن لو عايزه طريقه تانى حاضر.. دى كنت بعملها قبل ما أعرف دى

هقولها كده إرتجالي على السريع

أول حاجه بنجهز أساس الشوربه من السمك وياريت يكون طازه لازم

وممكن تجيبى " قاروص أو بورى " وتنضفيه كويس وتقطعيه شرايح

نجيب 3 فصوص ثوم ومعاهم حبه مستكه ونحمرهم بسيط فى معلقة زيت زيتون

بعد كده بنحط لتر من الماء ومعاه بصله متوسطه ونقطعها ونحطها فى الميه وحبهان كمان

ولما تغلى الميه نحط ملح وفلفل اسود وكام عود كرفس مقطع متوسط ونحط معاهم شرائح السمك

يدوبك نخليهم يغلو 10 دقايق

ونكون مجهزين الجمبرى وباقى ثمار البحر المفضل لديكى

وتكونى سلقاهم فى ميه لوحدهم 5 دقائق مع معلقة خل صغيره علشان تسحبى ريحة الزفاره

وتحطيهم مع باقى مكونات الشوربه إللى عملناها

ونسيبهم يغلو شويه إلى أن تستوى المكونات

بعد كد بنطلع ثمار البحر من الشوربه.. وبناخد الشوربه نضربها فى الخلاط ونصفيها

ونحطها على النار تانى مع حبة بطاطس مقطعه مكعبات صغيره وممكن جزرايه كمان

ونتركهم يغلو شويه ونضع ثمار البحر من تانى على الشوربه نتركهم يتمازجو قليلاً

ونقدمها بعد كده ساخنه ومعاها ليمون وخبز محمص" توست"

ملحوظه .. طريقة تسوية القواقع .. بنجيب معلقة زيت ونحطها على النار وعليها بصله صغيره مفرومه ناعم نسيب البصله تدبل شويه وبعد كده بنحط القواقع ومعاها معلقتين خل ونقعد نقلب فيهم لمدة عشر دقائق تقريباً إلى أن تتفتح القواقع


ولو واحده متفتحتش إرميها فوراً


دى طريقه حلوه أوى وسهله

وزى ما قلت لك الطريقه إللى كتباها فى الموضوع تنفع كمان

شوفى أيهما أفضل ليكى

ولما تعمليها قوليلى

ولما تشوفى ردى طمنينى إنك شفتيه

شكراً لمروك الجميل

[bes_bes]

هعملها لخطيبي و هقولك رايه لما يكلها بس متاكده ان انا مش هتصل بالاسعاف
ربنا يخليكي يا جميل و تسلمي و شكلها فعلا لذيذه

[رونا]

لا يا bes bes

لو إتصلتى بالإسعاف يبقى العيب منك مش منى ههههههههه

بطلو ترمو أكلكو المحروق على الناس وتقولو هما السبب ههههههههههه


لا يا جميل جربيها وعلى ضمانتى حاجه جديده وتغيير وصحيه كمان

بعد ما تاكلوها ولا كأنكم أكلتو حاجه

[sasoooooooooooooo]

بم بم تحفه بجد
انا بموووووووت بالجمبرى
تسلم ايدك يا قمر

[ام عمر المصرية]

مشكورة وتسلم ايديك