[عمرنا]

عزيزاتى ازيكم كلكم
عايزة اتجوز
لا مش انا .......... انا متزوجه والحمد لله
دة اسم مدونه اكيد سمعتوا عنها قبل كدة لانها كانت عامله ضجه جامدة من كم شهر وصاحبتها الصيدلانيه غادة عبد العال كانت بتتكلم فيها عن تجاربها فى العرسان اللى تقدموا لها
منهم من رفضها ومنهم من رفضته
قراتها وتمعنت فيها
تبدو للوهله الاولى مضحكه جدا وفعلا انا لم اتوقف عن الضحك وانا باتصفح المدونه والكتاب كمان لما اشتريته
لكن ........ افتكرت نفسى لان فيه حاجات كتير ومواقف من اللى قريتها حصل معى شبهها قبل كدة لما كان بيتقدمى لى عرسان قبل زوجى
لفت نظرى الاتى
1- الاسلوب الذى تستعرض به الكاتبه موضوعاتها
2-اعتزاز الكاتبه بنفسها وبكونها انثى ترغب فى الزواج ولكن بمن يقدرها ويتفهمه وانها ليست على استعداد ان تتزوج لمجرد الزواج وتضحى وتاخد واحد مش عاجبها
3- انواع العرسان اللى كتبت عنهم بيمثلوا انواع مختلفه من البشر ...المتعجرف -المتباهى -المغرور- النصاب -الكاذب-
4-الناس المتوسطين فى هذة الامور بيكون معلوماتهم مش دقيقه وفاكرين ان العروسه لما تسمع ان جايلها عريس ها توافق من غير ماتسال ولا تفكر ياعينى علشان تتجوز
انا بقى شفت من دة كتير كتير
وكنت بارفض ومش هاممنى
وكمان كنت باترفض عادى جدا ولما كنت باسمع اترفضت ليه احيانا كنت باموت من الضحك على التافه اللى رفضنى مثلا علشان نفسه فى واحدة شعرها اصفر وانا شعرى كستنائى (كان دلوقتى بقى فيه ابيض)
او مثلا رفضنى لانى اطول منه
او لانى ضحكت بعفويه لما جه يطلع الكارت من جيبه وقعد يدور عليه ومش لاقيه
الخ الخ الخ
طيب مافكرش كل واحد فبهم انى ممكن انا كمان اكون رافضاة بس لاسباب اعمق من كدة بكتير
يعنى مثلا انه تصرفاته خارجه عن اللياقه او ان الفاظه غير محترمهاو مثلا انه غير طموح او ان تابع لغيرة ولا يتخذ قرار سليم او انه مغرور ومنفوخ على الفاضى الخ من الاسباب اللى من وجهه نظرى اعمق بكتير من مجرد الطول ولون الشعر والضحك العفوى
اول عريس اتقدم لى كنت فى تالته جامعه ورفضنى حضرته علشان شعرى قصير وهو عاوز واحدة شعرها طويل
ولسه هاقولكم على الباقى بس شاركونى وقولوا على تجاربكم
رفضتى العريس ليه
العريس رفضك ليه
ايه اغرب عريس اتقدملك
ايه اسخف عريس اتقدملك
ياللا احكوا وفضفضوا

اذا اعجبك الموضوع و اردت نشره في المنتديات الاخرى فاستخدمي هذا الرابط:
عايزة اتجوز.............!!!!!!
http://forums.fatakat.com/thread64865

[ام سراج]

عمرنا...موضوعك حلو اوي
المشكلة انه عايز كلام كتير..وانا خلاص بافتح عين واغمض عين
ح انام النهارده...وبكرة ادخل لك فريش كده...واهريكي رغي...صبرك عليا
سلام يا قمر

[عمرنا]

عمرنا...موضوعك حلو اوي
المشكلة انه عايز كلام كتير..وانا خلاص بافتح عين واغمض عين
ح انام النهارده...وبكرة ادخل لك فريش كده...واهريكي رغي...صبرك عليا
سلام يا قمر

ماشى يام سراج مستنياكى بكرة

[مها5215]

انت عندك حق
بس انا بيحسوا منى الرفض
وده بيكون سبب الرفض
بس موضوع اكتر من رااااااااائع

[dr/yasmina]

بيكون الرفض من الاهل احيانا اما يسالوا عنه ولو الرفض مني ده بيكون سببه عدم الارتياح للشخص ده وبدعي ربنا انه يرزقنا بزوج صالح ويحفظنا يارب من كل شر

[NH MMM]

أنا الحمد لله دلوقتي متجوزة
بس تخيلوا واحد بجح قبل كده كان بيشترط علينا من قبل ما ييجي علشان يخطبني إني أقلع الخمار ولا حول ولا قوة إلا بالله ( أنا ساعتها كنت لابسة الخمار ، أما دلوقتي والحمد لله أنا لابسة إسدال ونقاب )
ربنا يهدي كل عاصي

[أميرة الرومانسيه]

موضوعك جميل اوى حبيبت
بصى هو الحمد لله كل الى كانو بيتقدموا انا الى رفضتهم
لانى سبحان الله كنت بصلى صلاة استخاره
قبل ماادخل على طول
واول مااعد مابحسش بارتياح ابداااا
اول واحد رفضته كنت فى اولى جامعه
كان شاب كويس جداااا بس لما اعدت معاه حسيت انى مش مرتاحه ابداااا
وبعد مااشيو قلت لماما انا رافضاه رفض تام بالرغم
من اعجاب اهلى بيه
سبحان الله بيبأه قبول
ودلوأت مخطوبه الحمد لله
ادعولى بأه يا قمرات ان ربنا يهدينا
عشان علاقتنا متوتره على الاخر

[عمرنا]

طبعا من اهم الاسباب فى الرفض
عدم القبول
وساعات بيكون متبادل يعنى من الطرفين
لكن فيه عرسان كتير بيتلككوا للبنت على الواحدة مع ان الواحد فيهم بيكون عندة عيوب خطيرة لكن هو مش شايف نفسه الناس هى اللى شايفاة
عريس منهم كان شايف نفسه الواد اللى هوة
داخل علينا نافش نفسه وفاكر انه الذى لا يرفض
بدا يتكلم ومن تانى جمله بالضبط كان الكل عايزينه يتكتم ما ينطقش لان الفاظه كانت بشعه والطامه الكبرى انه لم يراعى وجود سيدات محترمات فى الجلسه ولا حرمه البيت اللى دخله ولا حتى عامل اعتبار للاب اللى جالس هايقرقشه بسنانه من الغيظ منه ومن اللى جايبينه
وبعد خمس دقايق ولان الاصل غلاب
غلط وقال تعبير بشع فلم اتمالك نفسى الا وزغرت له زغرة فظيعه وقمت من الجلسه فورا
هذا بالاضافه الى انه كان قاعد يفرفت ويوقع الفرافيت على الارض وعلى ملابسه بشكل مقزز
طيب داخل علينا منفوخ على ايه ؟
المضحك ان حضرته بعت الرد انه معتذر ورافض ليه؟؟؟؟؟ تخيلوا !!!!!
لانى اطول منه وانى شيك جدا اكتر من اللازم!!!!!!!!
وانه مش عايز واحدة متانتكه (على حد تعبيرة)بالشكل دة
طبعا ماهو يادوب عليه واحدة بتفرفت على نفسها زيه
اما والدتى فقد ردت على الواسطه بسبب الرفض مننا انه شخص غير مهذب ولا يعرف الاصول امال فاذا كان بيقول كدة دلوقت امال لو تزوجها هايقول ايه
عرسان اخر زمن

[بيدووجنة]

عمرنا موضوع لزيز وجميل خالص
هتابع معاكي دلوقت وابقا احكيلكم بعدين

[batoooty]

عمرنا
موضوعك فكرته عسوله اوى
انا ياستى لسه فى 2 جامعه وماجاليش عرسان خالص البيت فمحصلش اى موقف
بس انا متابعه معاكم

[رانيه]

[كنوز الشرق]

فكرة الموضوع هايلة

[zoom2009]

وهارجعلكم تانى

[عمرنا]

فينكم مافيش عرسان بايخين والا ايه

[لؤلؤة البحر الأحمر]

انا لوحكيت حكاياتى عن رفضى للعرسان مش هتصدقوا

بجد وعلى فكرة انا متزوجة حاليا

لما جه عريسى اللى هو زوجى حاليا

والدى قاله بنتى لؤلؤة اكتر واحدة جالها عرسان فى بناتى

طبعا والدى قاله اسمى الحقيقى لؤلؤة ده الاسم الحركى

وكان اول عريس ليه وانا فى ثالثة اعدادى بصراحة كنت شايفة نفسى عيلة

اوى وكنت لسه بلعب بالعرايس

[لؤلؤة البحر الأحمر]

وكمان فى عرسان كنت برفضهم من غير ما اشوفهم

لانى كنت بصلى استخارة

وفى عريس رفضته علشان والدته وكمان العريس ده كان رفض بنات

كتير اوى قولت لنفسى بدل ما يرفضك
انتى ارفضيه وفعلا حصل

[لؤلؤة البحر الأحمر]

وفى عريس من ضمن اللى اتقدمولى كان عريس عبيط

بجد كان معجب ان هو مهندس وكل شوية يقولى ايه رأيك فى شغلانة المهندس

قالها كتير لدرجة انااخويا الكبير كان قاعد معايا

بصلى وضحك وكان نفسه يقوله عرفنا يا عم ان انت مهندس

والحمد لله اتجوزت مهندس بس طبعا مش العريس ده

[عمرنا]

[quote=لؤلؤة البحر الأحمر;887279]وفى عريس من ضمن اللى اتقدمولى كان عريس عبيط

بجد كان معجب ان هو مهندس وكل شوية يقولى ايه رأيك فى شغلانة المهندس

قالها كتير لدرجة انااخويا الكبير كان قاعد معايا

بصلى وضحك وكان نفسه يقوله عرفنا يا عم ان انت مهندس

والحمد لله اتجوزت مهندس بس طبعا مش العريس ده[/quot

فكرتينى
ولو ان دة من الناس التى لا تنسى
جاء الاخ العريس ومعه كتيبه من الاهل والناس الواسطه لدرجه ان الصالون بقى مش مكفى
سيبكم من كدة
جلس حضرته وبدا الكلام و حضرته لايتكلم
ساله بابا : سمعنا انك مهندس اتصالات وانا على ايامى ماكانش فيه القسم دة هوة متخصص فى ايه؟
العريس: اتصالات!!!!!!! ورفع اكتافه لفوق
بابا :ايوة منا واخد بالى يعنى مجال عمله ايه؟( خللى بالكم القصه دى من 13 سنه دلوقت كل الناس عارفه القسم دة من كليه الهندسه)
العريس:فى الاتصالات يعنى!!!!!!!!!!!!!!!!!! ورفع اكتافه وحواجبه لفوق
فهمتوا حاجه؟؟؟!!!!
سكت العريس ولم ينطق بكلمه واحدة بعدها الى نهايه الجلسه
لم ناخد منه جمله مفيدة واحدة
زى ما دخل زى ماطلع
فى نهايه الجلسه اخذتنى الواسطه على جنب وسالتنى عن رائئى فابتسمت وقلت لها اسالى الاخ اتصالات بتاعك
فقالت انا عرفت ردة انه موافق عليكى لانه ماعملش السيم (حركه متفق معها عليها يعملها لو كان رافض وهى انه -----يكح ----شفتوا الخيبه------طيب ما ينطق ويقول هو انا كنت هاكله)
قلت لها اولا انا محدش يكح معايا ثانيا قولي له الانسه كيمياء حيويه بتقولك نزل حواجبك واكتافك المرة الجايه لما تكون بتتكلم مع رجل محترم فى سن والدك والمفروض انك رايخ تخطب بنته مش رايح تفرسه بتصرفات طفوليه غريبه

[yostina]

موضوعك حلو كتير
بس انا دلوقتى مش فاضيه احكيلك
اكيد هرجع تانى واقولك كتييرمن اللى حصلى

[ام سراج]

انا جيت...وزي ما قلت لك...ح اهريكي رغي
الحمدلله كنت من المحظوظات (او من المنكوبات ) اللي كل يوم يجي لهم عريس
ومع ذلك اختي اللي اصغر مني اتجوزت قبلي..لا وايه..اول عريس اتقدم لها
سبحان الله ...هو رزق ومقدر وله ميعاد لا يعلمه الا الله
اول عريس...مش ح تصدقي...كنت في خامسه ابتدائي..لكن طويله حبتين...وقتها كنا في عمان..العريس كان جيراننا..ومامته كانت متصاحبه على ماما..دخلت وفوجئنا بيها بتقول انها عايزاني لأبنها..وماما تقول اني صغيرة...وهي ابداً..اصل وقتها كانوا البنات عندهم بيتجوزوا في السن ده..
وفي عرسان كتير في الفتره بتاعه ثانوي والجامع