[عمرنا]

والله انتي عسل ياعمرنا انا ضحكت ضحك
كل القصص فعلا مضحكه
ده الهم الي بيقوله عليه هم يبكي وهم يضحك الواحد بيبقي بيبكي علي حاله وبيضحك علي التصرفات بتاعت العرسان واهليهم
ربنا يرزق كل البنات
ادعيلي بقي الا الجواز عندنا في النوبين صعب شويه

تتخيلى ان القصص دى حقيقيه فعلا ولسه فيه كتير اغرب منها
الموضوع دة عملته مش علشان اسرد حكايات العرسان اللى اتقدمولى قبل كدة فقط لكن المعنى والمغذى الاعمق
هو
من خلال العرسان الافاضل الرافضين والمرفوضين شفت نماذج من البشر ومن البيئات والشخصيات
اللى مغروووور واللى مش واثق من نفسه واللى عندة مشكله كبييييييرة واللى محروج واللى مش عارف يعبر عن نفسه والللى والللى والللى وكل واحد منهم بيدخل على انه اللى لا قبله ولا بعدة فى عالم الرجال
وبينسوا انهم بيتقدموا لواحدة متعلمه عندها نسبه جيدة من الثقافه وعقل يقظ مفكر وعين متفحصه
وزى ما هو بيفحص العروسه وعايز واحدة على الفرازة من كله وتكون صارخه الجمال وشعرها بيجيب الوان
وانا ايضا من حقى اتفحصه واختار على الفرازة من كله لكن مش من حيث الوسامه ولا الثراء
اختلاف معايير تقييم الامور
العريس عايز واحدة سوبر عروسه جميله -غنيه-تقبله على علاته -وهو مايتعبش نفسه علشان يصلح من عيوبه- وكمان يتامر عليها علشان يتعطف ويتنازل ويخطبها - الاغلبيه العظمى من اللى شفتهم كانوا كدة -اقليه كانوا بيدوروا على الشخصيه والاخلاق والاصل الطيب
اما من وجهه نظرى فكنت ابحث عن
رجل احلامى لانى عمرى ما حلمت بفتى احلامى
رجل متكامل الرجوله ---رجوله الشخصيه----
شخصيته واضحه المعالم -بعيدة عن الغموض-شهم -اعتمد عليه -مكافح -مجتهد--اما المستقبل فبيد الله سبحانه وتعالى
يجيد التصرف وسريع البديهه-كريم
يعنى انا كنت ابحث عن الجوهر الذى يدوم والذى ساتعامل معه فى حياتى الزوجيه
كان بيثير غيظى جدا ان الواحد منهم مش شايف نفسه وعمال ينتقد ويعايب ووووو
طيب انظر لنفسك وتعالى نتحاسب
كنت بازعل لما حد يرفضنى علشان شعرى مش اصفر
طيب مافكرش يشوف عقلى ايه
انا هاعيش معاه وادير شئون حياتى معه بعقلى الراجح وليس بشعرى الاصفر
البنت لازم تفكر وتتانى قبل ما تتخذ قرار الارتباط ولا ترضى بما لا يعجبها لمجرد انها تتزوج وخلاص
لازم البنت تعتز بنفسها وتعطى نفسها قدرها ولكن بعيد عن الغرور علشان اللى يتقدملها يقدرها ويحترمها

[ام ليلو]

مبروك عمرنا على التثبيت(متأخره شويه)
وموضوعك حلو ويستاهل
واسلوبك رائع وجذاب
تسلمى حبيبتى

[عمرنا]

شكرا يام ليلو
فين عرسانك امال

[IMAN SALAH]

انا بقي مره جالي عريس غريب جدا ....قبل ما يجي الست الواسطه فضلت تسأل ماما انا طولي كام ووزني كام علشان لو تخينه مايجيش راحت ماما مزعقلها وقالتلها انا بنتي مش بضاعه المفروض انه جاي ياخد واحده بنت ناس مش يعملها فيديو كليب
فا راحت الست اتكسفت اوي واعتذرتلها
المهم جه البيه نافخ نفسه لدرجة اني خفت انه يفرقع ...اه علي فكره انا نسيت اقولكم انه كان متجوز قبل كده لمدة شهور والموضوع ماكملش
المهم انا دخلت والست الواسطه كانت اول مره تشوفني وفضلت تشكر فيا طول القاعده وهو مابيكلمنيش خالص بيبصلي بس ولما ماما او بابا حد فيهم يسأله علي حاجه يرد بألاطه الكلمه علي قد السؤال
بعد ربع ساعه من القعده الست طلبت من ماما اننا نقعد لوحدنا فا قعدنا في الانتريه
وبدا الباشا يحكي كل حاجه عن حياته وعن بطولاته لانه كان بيدرب كرة يد في النادي الي جانب شغله (هو الحقيقه كان ابن ناس) وفضل حوالي ساعه ونص يتكلم عن نفسه بلا توقف وانا زي العبيطه كل اللي بعمله اني ابتسم واهز راسي وماعلقش علي اي حاجه يقولها وفي اخر القاعده فضل يقولي انتي انسانه هايله ويسكت وانا ماردش وبعدى شويه انتي فعلا انسانه مميزه وانا هابلغ مدام .....(الواسطه) انك انسانه ممتازه
المهم قام فجأه علشان يمشي ومن غير مايسلم علي حد لاقيناه فتح الباب ووقف علي الاسانسير
انا فهمت فيما بعد انه كان عايز يديني فرصه اقول للواسطه راي فيه وانا طبعا مانطقتش
المهم تاني يوم فضلت اتحايل علي ماما تكلم الست وتبلغها الرفض وماما محرجه لغاية لما الست اتكلمت الساعه 12 بتبلغنا رفضه
انا اللي طلع عليا بضحك
شوف الهايف لما لاقاني ماتصلتش قال يلحق يتكلم ويبلغنا رفضه علشان يبقي هو اللي رفضني

[عمرنا]

شوف الهايف لما لاقاني ماتصلتش قال يلحق يتكلم ويبلغنا رفضه علشان يبقي هو اللي رفضني
مش باقولكم 000والله حاجه تضحك00
هيافته صورت له انه لايمكن يترفض
ولما شعر ان الموضوع مرفوض منكم قال اسبق انا وارفض
ماعلينا
والله قصه غريب لعريس اغرب

[عمرنا]

عريس النصف متر والتلاته ايام والنصف ساعه
طبعا عريس اخر غريب مثله مثل من سبقه
اتصلت جارتنا وقالت على مواصفات العريس اللى عندها وانها تعرفه جيدا لانه ابن جيرانهم فى البيت القديم وعشرة عمر(والغريب انى طول عمرى اشوف جارتنا دى فى الشقه يبقى امتى كانت فى البيت القديم وامتى بقى فيه عشرة عمر)
ما علينااااا
وطلبت تحديد موعد سريع علشان العريس باقى له تلاته ايام فقط ويسافر الكويت مقر عمله
اييييه يعنى ايه تلات ايام هو احنا بنهرج هاييجى يعمل ايه
قالت لماما اهو هاييجى وان كان فيه نصيب يقرا فاتحه ويسافر وبعدين يرجع بعدها بشهور يتزوج
من هنا لهنا وتحت الحاح من الجارة حددنا موعد تانى يوم
-جاء الاخ العريس ومعه جارتنا
-انا طولى معقول اما هو 00000قصيييير 00قلت فى عقلى 000ايه دة هاتجوز نص متر0000هى جارتنا ايه اللى حصلها ماهى شايفانى وعارفه طولى وحجمى 000هى بتشتغلنا والا بتشتغله والا ايه00000اكيد الاخ دة هايحتاج علاج نفسى بعد الموقف السخيف اللى حطته فيه جارتنا اللى مفترض انها واهله عشرة عمر0000مش فاهمه حاجه
اول ما دخلوا سمعت جارتنا بتقول لماما 00فلان قال ياطنط نروح نص ساعه نزور الجماعه اصل الوقت ضيق
الدم غلى فى عروقى وعرق الافتراء نقح عليا
هو انا فى فترينه 000هو رايح يشترى عيش 000نص ساعه ايه دى اللى هاييجى يشوف عروسه وياخد قرار وبالمرة بقى يتفق ويخلص ماهى سايبه بقى
طيب وفين النص ساعه بتاعتى
دخلت وسلمت وجلست وبدا الكلام والاخ عينه على الساعه اللى برة
طلع فعلا باقى له تلاته ايام فقط وانه جاء بعد الحاح من جارتنا
وهنا عرق الغيظ نقح عليا واتفرست
كان كلامه من النوع العادى ولا يدل على شخصيه معينه
انصرفوا
تانى يوم الصبح اتصلت جارتنا وهى تزف لنا خبر ان العريس موافق عليا بس هو كان على قائمه الانتظار وجاء له الحجز وسافر الفجر عائدا الى مقر عمله واتصل عايز يعرف راينا وان كان كدة يبعت اهله يتمموا الموضوع ويكتب الكتاب بتوكيل ويبعت لى اروح له
ايه دة كله ايه دة كله 000كل دة من نصف ساعه جلسها فى بيتنا امال بقى لو كانوا ساعتين تلاته والا كم مرة كان حصل ايه
طبعا رفضنا رفضا تاما وقاطعا وباتا وفظيعا
عرفتوا ليه اخترت له الاسم دة
تهريج من الجارة واستهانه بمشاعر الناس
واعتقد ان دة شعور العريس نفسه اللى بتقول عليه عشرة عمر
مازال الناس الواسطه بينسوا ان البنت واهلها لهم راى فى الموضوع مش فامه ليه مش قادرين يفهموا كدة

[IMAN SALAH]

مرة جالي حتة عريس تحفه هو كان ظابط في الجيش المهم الست الواسطه فضلت تشكر فيه وفي اخلاقه وفي عيلته فا قلنا نشوف
جه البيه الظابط وانا اول ما خرجتله مافيش 5 دقايق ولاقيت نفسي عايزه اقوم مع انه كان مهذب وشكله كويس بس كان بيفكرني بحسين صدقي اوي بشعره اللي ملزقه علي جنب وجزمته بتلمع زي المرايه
المهم الراجل فضل يسبلي طول القاعده وانا هاموت من الكسوف لان بابا قاعد وهو نفسه محرج
وبعد مامشي انا بلغت ماما وبابا رفضي لكن هما اصروا اني اشوفه تاني وانا ابدا
تاني يوم لاقينا الست الواسطه بتتكلم وبتقول ان الراجل مبسوط جدا وعايز يجيب مامته واخواته علشان يشوفوني
وجه البيه وع مامته واخته وبالصدفه اخته كانت بتشتغل معايا في نفس المكان بس احنا مانعرفش بعض
بس لما شفت مامته حاسيتها مش طبيعيه شويه يعني بتتكلم زي ماتكون تايه كده
فا تاني يوم بلغنا الست ان احنا مش مرتاحين للناس علشان كذا
طبعا الست الواسطه فضلت تهزأ فينا وتسمعنا كلام زي الست بما معناه ان البنات مش لاقيه جوزا واحمدوا ربكم وحاجات كده ...المهم ماما ردت عليها والموضوع خلص علي كده
لاقيناه بقي تاني يوم بيتصل ومن حظي الاسود اني رديت عليه وهات بقي يا مدح فيا وغزل وانا خلاص حاموت
وتاري الست مابلغتهوش رفضنا فا البيه بيتصل علشان ياخد معاد علشان نشوف الشقه
انا قلتله احنا مسافرين اسبوع ....,علشان يمكن يحس ويمشي
برضه مافيش فايده
بعد مارجعنا فضل يطاردنا في التلفونات بشكل هستيري واحنا نشوف نمرته مانردش
وكل شويه يغير النمره علشان نرد واحنا مصرين
بس مره ردينا عليه بطريق الغلط وعينكم ماتشوف الا النور لزقه بغره
وبعد الحاح رحنا نشوف الشقه علشان نقوله بعد كده ان الشقه مش عاجبانا ومافيش نصيب ...وده اللي حصل فعلا الشقه كانت تقرف وفي حته شعبيه
فا تاني يوم اتصل ببابا وبابا بلغه ان مافيش نصيب علشان الشقه مش مناسبه وانه بيتمناله كل خير مع ناس غيرنا .......وتنفست الصعداء
مافيش يومين ولاقيناه بيتصل تاني
وعايز معاد علشان يجي
وجه مع اخته التانيه علشان يقولنا انه هايغير الشقه بس علي شرط اننا لازم نعمل خصوه رسميه الاول قبل مايعمل اي حاجه .....شوفتوا الهنا اللي انا فيه
بابا قاله اديني يومين وانا هارد عليك
وطبعا مارديناش ......تقتكروا يعني فهم ابدا
فضل يطاردنا برضه لغاية ما ماما طلبت من الست الواسطه انها تنهي القصه دي علشان احنا محرجين نقوله ان البنت مش طايقاك
وخلص الموضوع الحمد لله ومرت ايام وعدا حوالي سنه ونص او سنتين مش فاكره واتخطبت والحمد لله واذا بي فوجئت ان اخته جايالي الشغل علشان تسأل عليا اذا كنت اتخطبت ولا لاء علشان اخوها عايز يتقدملي تاني

[سوليداد]

هو واحد واتجوزته

[fairy princess]

موضوع جميل اوى....
اول عريس....كان بياخد معايا درس فى اعدادى...مراهق يعنى وصور بقى وقلوب
وحركات وبعت مامته تتعرف على مامتى....وماما طبعا قالتلها ايه لعب العيال ده
فى الثانوى... كان مدرس الكمبيوتر معجب ولهان ودايما يدور على حجة علشان يتكلم معايا...وعرف منى شغل بابا وراح فاتحه فى الموضوع وطبعا بابا قاله لسه صغيرة
اكتر عريس تعب معايا...كان صاحب اجنس عربيات بجوار مدرسة الثانوى وكل يوم الاقيه مستنينى قدام المدرسة ويفضل ماشى ورايا لحد البيت...مشى كتير اوى..ههههه
وبعت ناس يطلبوا ميعاد من بابا...وبرضه اترفض
عريس فى السريع...ده كان مستعجل...شافنى صدفة فى كلية الفنون التطبيقية بتاعه اختى...كنت رايحة معاها يوم علشان معرض عملاه فى الكلية
وهو كان معيد وجاتله بعثة لفرنسا...ومسافر بعد اسبوع وعايزنى اتجوز واسافر عالطول
وطبعا رفضت لانى مبحبش السربعة ...مع ان فيه كل المميزات
فى الكلية بقى...اول سنة اعدادى صيدلة كنا بنحضر السكاشن عند كلية علوم
وشافنى معيد هناك...وكل ما اطلع من محاضره يكلمنى ويقلى انا عايز اتعرف
اتاسفله وامشى واسيبه...قلت خلينى زوق....فى المواصلات الاقيه ركب معايا...
وفى يوم رن الجرس...بابا فتح لقى بوكيه ورد ومفيش حد...زى الافلام يعنى
ههههه....ومامته راحت لماما فى الشغل وطلبت ميعاد
وطبعا من عاميله دى انا كنت مش طايقاه...ورفضته
اول دكتور فى الكلية اتقدملى...كان دكتور علم النفس..كنا بناخد علم النفس فى اعدادى صيدلة...وكان كويس اوى بس حسيت انه كبير عليا...وانا عايزة حد من سنى...اعيش جنون الشباب معاه....فرفضته بلباقة
اول عريس ظابط....كنت فى مؤتمر اعداد القادة تبع الكلية...كنا فى معسكر فى حلوان....وهو كان نقيب مسؤل عن الامن فى المعسكر وبعتلى مشرفة تقلى انه معجب وعايز يجى البيت...من غير ما اشوفه حتى
فاديتلها العنوان...وبعد مارجعت البيت ...حدد ميعاد مع بابا وجه...بالظبط محمود عبد العزيز وهو صغير....وكان هادى اوى...وكله تمام
وحسيت ان هو ده.....
وبعدين طلب من بابا انه يتكلم معايا علشان اعرفه اكتر....قعد بقى يقول انا مش زى الشباب اللى معاكى فى الكلية...
انا اهم حاجة عندى البيت والزواج...ومرتبى انا عارف حدوده ...يعنى معناش مانجبش....وكلام كتير وقواعد....انا سمعت... سمعت...واول ماروحت قلت لبابا مش عايزاه
ليه يا بنتى ...ده ممتاز...قلتله ماعندوش طموح....
وبابا بلغه رفضى...واتصل كتير...وعايز يعرف السبب....لحد ما ياس
وبعدين...كتييييير بقى من الزملاء اللى عايزين يتقدموا قبل ما يخلصو...

وجالنا بقى طلبة اسمهم دبل كورس...يعنى مخلصين علوم او طب وعايزين يدرسو الصيدلة....بمصاريف خاصة يعنى
وكان هو فيهم..حبيبى وروح قلبى..زوجى...من اول نظرة فعلا حسيت بحاجة كده....مش عارفة اقولها..
واتعرفنا...ولاقينا نفسنا بنقرب من بعض بسرعة
وروحنا اتالفت بسرعة
وخطبنى فى سنة اولى....واتجوزنا اول ما خلصنا الكلية
واغرب عرسان....اللى بيجولى دلوقتى...الدبلة مابتبقاش باينة...وكل شوية يجيلى عريس فى الصيدلية...او ام او اب من زباين الصيدلية...يحبونى وعايزين يجوزونى ابنهم....هههههه
اقولهم انا متجوزة ومعايا طفلين..مايصدقوش
هههههههههه.....اللهم احسن خلقى كما احسنت خلقى
طولت عليكىىىىىىىىىىىىى

[youma]

السلام عليكم
انا عضوة جديدة فى المنتدى وديه اول مشاركه ليا
الموضوع جميل جدا وانا كنت عايز احكلكم عن عريس كان عايز يتقدمى
احنا كنا ثلاثه اصحاب فى نفس الشارع وكان هو واحد جارنا فى نفس الشارع برضه وكان على طول بيبص على الاتنين اصحابى وكنا محتارين هو بيحب مين فيهم وكان الارجح واحد ه منهم علشان مامتو صاحبه مامتها ومرت الايام واحنا مش حاطين الموضوع فى دمغنا وفى يوم وانا فى اول جامعه رحت مع واحده منهم المعهد بتاعها وكان هو فى نفس المعهد واول ما شافنا جه سلام علينا وديه اول مرة نكلمه فيها وقف
معنا شويه وبعدين لاقيته وقف على جنب واريا شويه وانا مش شايفها اصحابى هما اللى شايفنه ولاقتهم بيقولولى كلمى فلانه انا اترعبت هو عايز منى ايه لوبيحب واحد فيهم يكلمه يكلمنى انا ليه المهم رحت اكلمه فقالى انه بيحبى وعايز تقدمى
طبعا سكت شويه مش عارف التصرف وبعدين استوعبت الموقف لاقتنى بقولك انى مش بفكر فى الموضوع ده دلوقتى واحنا اخوات ومش هينفع اقف معاكاكتر من كده علشان الناس خدوا بالهم ومشيت هو يعنى اخد الكلمتين ومشى زعلان
وانا مش عارفه انا رفضتوا ليه من غير ما افكر
المهم مارت الايام من غير مايحاول يكلمنى او يفتح معايا الموضوع تانى
او يضايقنى وبعدين ان خلصت الكليه واتجوزت هو سافر السعوديه يكون نفسه وفعلا خلص شقته وكان نازل بعد العيد علشان يخطب ويجوز فآدى فريضه الحج وبعدها بيخلص ورقه علشان ينزل عمل حادثه وتوفى ودفن هناك ربنا يرحمه
انا حاكتلكم قصه ديه علشان اصعب حاجه انك تقولى لشخص فى وشه انك رافضه خصوصا لما يكون كويس وبيحبك الاسهل انه حد يقوله غيرك

[youma]

ده ياحماعه كان اصعب عريس اما اغرب عريس كان اخو صحابتى اضغر منى بسنتين وكمان كان واحد تانى جارنا اصغر منى بسنه اتقدم ليا واهلى رفضوا من غير مايقوللى
اما احلى عريس هو جوزى حبيتو قبل ماشوفوا من كتر ما سمعت عنه ولما شفته حاست انه محتاجنى ولما كلمنى وقالىانه ظروفه صعبه وانه مش هيقدر يقولى استنى اتمسكت بيه اكتر وفولت لنفسى انه هو ده اللى انا عايزه اكمل معاه عمرى
انا كنت عايزه اسالكم حد فيكم لعب دور الواسطه او الخاطبه ؟وهل نجح فيه ولا فشل؟

[عمرنا]

عريس العطسه والنبى تجبرى بخاطرة
كنت خارجه من باب البيت فى الشتاء ذاهبه الى شغلى 000عطست عطسه قويه ووقفت اجيب منديل من الشنطه
لاقيت حد التفت على الصوت ومشى بسرعه
خرجت ومر يومى عادى
بالليل لاقيت جارتنا (بينها وبين ماما عداء قديم مستفحل) على الباب وعاوزة ماما 000امى حضرت نفسها وكان فاضل تجيب اسلحه علشان تقابل بيها الجارة الشرسه وهى متعجبه فالعلاقه بيننا وبينها مقطوعه من سنوات طويله
دخلت الجارة وقعدت تلف وتدور وبتتكلم فى انها عايزة ترجع المياة لمجاريه ونكون جيران حلوين تانى
امى بدات تزوم 000لانها تعرف ان هذا من رابع المستحيل بعد سنوات سنوات من القطيعه
دخلت جارتنا فى المفيد اخيرا 0000جايبلكم عريس000دة بيحبها اوى0000ماما كانت هاتهجم عليها تفترسها 000ولكن 0000مين دا بقى اللى بيحبها اوى 00قالت الجارة دة جارنا هنا فى الشارع اللى ورانا وشافها وحبها على طول وقال لى اتوسط علشان ييجى يتقدم ولاننا فى حالنا وعلاقاتنا بالجيران محدودة فلم نعرف من هو هذا الشخص
طيب شافها امتى 000قالت النهاردة الصبح وهى بتعطس على الباب تحت

[زهرة البنفسج فى قلب حنة]

بجد ياام سراج انا بشكرك على قصتك فى موضوع العرسان انا ضحكت جدا وخصوصا على الى بيسألك على مرتبك كام وسلامى ليكى ولكل اخواتى واحبائى فى الله

[زهرة البنفسج فى قلب حنة]

انا كملت قرأت بقيت الحكايات وكلهم حلوين جدااااا تسلموا كلكم

[عمرنا]

جاء العريس هو ووالدة
تذكرت انه هو نفسه الذى لمحته وانا باعطس
شفتوا اعجاب من اول عطسه
كانت الجلسه عاديه لكن الاستاذ كان باين عليه متبنج ومسبل لى على الاخر لدرجه انى شعرت بالاحراج اما والدة فكان واكل الجو هو اللى بيتكلم وهو اللى بيقول واخينا متفرغ للتسبيل
لكن الحقيقه كان عريس مهذب ومطيع لوالدة
المهم قلت لوالدى لم استطع ان اكون راى لانه لم اسمع له صوت
المهم جاءوا لزيارتنا مرة اخرى ومعهم والدته التى ابتسمت اوسع ابتسامه عندما راتنى وهات ياتفصيص وهات يابحلقه فيا
ما علينا
الحوا علينا ان نزورهم فى بيتهم لنتعرف على باقى الاخوات وازواجهن وبعدين نبقى نقول راينا
رحنا زرناهم وكانت القبيله كلها موجودة بربطه المعلم همس ولمز وهمهمات الخ 00وك شويه يقولوا لى 000والنبى تجبرى بخاطرة 00دة حبك اوى 0000يالهوى من مرتين حبنى اوى000وافقى واجبريه0000ليه مكسور والا حاجه0000واقترحت امه علينا ان نسكن معها فى الشقه لانها واسعه جدا 00000دة بعدك الا كدة 000انا لا يمكن اسكن مع الاهل بتاتا 000ولا فى الشقه ولا العمارة ولا نفس الشارع ولا الحى كله حتى000هو انا ناقصه وجع دماغ
اعنت رفضى القاطع للموضوع
الحقيقه كان شاب من النوع الذى انقرض يعنى يذكرنى بعماد حمدى وهو بيقول يا مساء الخير يانينه000شاب كلاسيكى جدا00من ايام الابيض والاسود000 كل حاجه فى يد الاب 00حتى النفس باذنه برضه00000هو طيب مافيش شك لكن اتخنقت منه جدا وخصوصا من كلمه 00والنبى اجبرى بخاطرة00يعنى اجبر بخاطرة وانا مين يجبر بخاطرى000
شهرين والاخ الابيض واسود دة رايح جاى وتليفونات ومراسيل مع الجارة بالرغم من اننا ابلغناة الرد واضح وقاطع وصريح بالرفض
لكن نقول ايه
دى ماكانتش عطسه دى

[عمرنا]

انا كملت قرأت بقيت الحكايات وكلهم حلوين جدااااا تسلموا كلكم

اهلا بك يازهرة فى الموضوع
ياريت تشاركينا بحكايات العرسان الرافضين والمرفوضين
فى انتظارك

[عمرنا]

العريس المثقف
من العرسان المستفزين والذى لم استطع التعاطف معه نهائيا كان هذا الاخ
انا احب جدا فى علاقاتى ان اكون واضحه لا ادعى شيئا ليس فيا
واحب ايضا من يكون واضحا خصوصا فى موضوع اللرتباط والزواج
هناك من يعتقد ان لابد ان يصنع لنفسه هاله من الغموض لكى يكون مثيرا للانتباة ويعمل نفسه لغز كبير علشان يغرى الناس انها تفكر فيه بالعافيه
وهناك من يصنع لنفسه كذبه كبيرة يعيش فيها ويصدقها ولا يهتم ان انكشفت حقيقته فيما بعد فالمهم عندة ان يكون ذو حجم اكبر من حجمه الحقيقى
نيجى للاخ المثقف
زميلتى فى العمل جاءتنى بخبر ان عندها عريس معتبر وكامل الاوصاف ومثقف وواعى ومطلع ووووووو
وانها كلمته عنى وطلب يشوفنى
المهم جاء البيت ودخل يارض اتهدى ماعليكى قدى
مظهرة العام عاااادى عاااااااااااادى
رافع راسه لفوق ولا حسين فهمى فى ياواد ياثقيل
ايه ماله خير يارب
سلمت عليه وشعرت انه كانما يتفضل بالسلام على (كانه مولانا ولى النعم بيسلم على الرعايا) اتغظت منه جدا جد وفتحت عينى له على الاخر وبدا يتكلم عن نفسه ويعرض امكانياته والتى اتضح تماما انها عاديه جدا جدا ولكنه يحكى كانه جاب الديب من ذيله
شويه يتكلم عن غسالته ال 18 بروجرام وشويه يتكلم عن فلوسه فى البنك و(حدد رصيدة كم )00شويه عن ملابسه وكيف يختار الالوان ( طبعا لم يكن هناك اى تناسق ) وكيف انه اذا كان فى جلسه رجال فالكل يتكلن لكن فى النهايه لازم كله سمع هس ويسمع له وان حكمته ورجاحه عقله تجعل الكل كبير وصغير يسمع له وياخد رايه 000اتفقعت مرارتى لانى احساسى به كان على العكس 000لان الشخص الحكيم يكون من الذكاء بحيث لايتكلم بهذا الاسلوب
ونحاول نتوقفه فى الكلام ولكن زى مايكون ماصدق انه يتكلم ولم يتوقف
حسيت انى عندى غثيان وبغض شديد له
تانى يوم كلمتنى زميلتى تسال عن انطباعى عن الشخص وقبل ما اتكلم وجتها بتقول لى ان الاخ العريس بيقول 00 دة اذا كان ابوها راجل مثقف ما انا كمان مثقف دة انا اقدر الفه على صباعى دة فى نصف ساعه
00000قلت لها
يعنى منفوخ على الفاضى وفاكر نفسه حاجه وهو نزل من نظرى بعد عشر دقائق من الجلسه تماما وقلنا معلش طبعه كدة
عمال يتنطط علينا بالغساله بتاعته ام 18 بروجرام واللبس اللى مش لايق على بعضه لحد ما اتخنقنا منه وقلنا معلش اهو نستحمله علشان ضيف فى بيتنا لحد ماياخد جلسته ويمشى
عمال يتكلم ويقول حكمتى وحكمتى وخبرتى وكل دة ومش مبطل رغى قلنا معلش يمكن مش لاقى فرصته الا هنا ونفسه يتكلم
لك ن يكون قليل الادب والذوق كله الا دة
دة مرفوووض بكل اللغات وبكل الطرق والاساليب
روحى بلغيه انه الاحسن يروح يتجوز ميكروفون علشان يتكلم فيه براحته
او بنت صغيرة مراهقه تفرح بالكلام دة وبعدين تبقى تشوف هاتعمل ايه لما تكتشف ان كل الكلام دة كان فشنك
الحقيقه كل ما اتذكر انى مريت بالموقف دة 00000باتغاظ