[مؤمنة بالله ورسوله]

ارجو من كل أم ان تحكى لنا تجربتها مع ولادتها مدى صعبتها او مدى سهولتها وما حدث اثناء الولادة وفيما كانت تفكر ؟؟؟

[ام بسنت]

انا يااختى العزيره ولدت مرتين المره الاولى قيصرى لان مكنش فيه طلق بارد والحوض ضيق الدكتوره قالت لازم قصيرى عشان البنت لازم تنزل دلوقت المهم ولدتنى كنت مرعوبه جدا لما دخلت اوضه العمليات كنت برتعش جدا وقعدت اقرا قران واخدت البنج وطبعا مفقتش الا لما خلصوا خالص وتعبت جدا جدا فى الحركه فى الايام الاولى لحد اسبوع كده لحد ما بقيت اقدر امشى والحمد لله
المره التانيه كانت طبيعى بس تعبت فيها جدا لان كان بينزل عليا ميه قبل الولاده بشهر وكل يوم كنت بروح للدكتور واعمل اشعات لحد ماربنا سهل وكملت التاسع وجالى الطلق من الساعه 2 باليل وولدت الساعه 2 ونصف الظهر بس اتخيطت من تحت ودى اصعب ميه مره من القيصرى
لحد دلوقت بعانى منها وانا ولده من 7 شهوروحكايه كنت بفكر فى ايه فى الطبيعى الوجع مكنش بيخلينى افكر عماله اقول يارب والحمد لله

[مؤمنة بالله ورسوله]

شكرآ لمرورك أم بسنت وحمد الله على السلامة وربنا يطمنك على اولادك
انتى قولتى حاجة غريبة الى تولد المرة الاولى قيصرى ممكن تولد بعدها طبيعى؟؟؟

[أم لوجى و ملك]

أنا يا ستى اتعذبت جدا فى ولادتى
الولاده الاولى جالى الطلق قبل الولاده بيومين ورحت المستشفى وحجزونى يوم كامل وبعدين الدكتور قال ده طلق كاذب رجعت البيت وبعدين جالى الطلق الصح وفضل من الساعه10 بليل لحد الساعه 5 الصبح طلق فظيع ودخلت اوضة العمليات وولدت طبيعى بس اتفتحت 10غرز وفضلت مش عارفه اقعد لمدة اسبوعين شفت فيهم الويل وكمان كانت بنتى فظيعه ما بتبطلش عياط وارهقتنى جدا والله مكنتش بنام لحد ما بقى عمرها 10 شهور كانت متعبه جدا وكمان لما بقى عمرها شهرين تشققت حلمات صدرى بسبب الرضاعه وعملت جرح كبير وتسبب الجرح ببكتريا فى الدم كله كادت تودى بحياتى بس الحمد لله تحسنت حالتى واستمريت بفضل الله فى الرضاعه الطبيعيه
فى الولاده التانيه جانى الطلق 6 الصبح ولدت 4 العصر وولدت طبيعى وتعبت برضه جدا جدا عموما انا ولاداتى متعسره جدا جدا الحمد لله بنتى التانيه طلعت اهدى من اختها بكتييييير يا رب يجعل تربية الاولاد وصعوبتها فى ميزان حسناتنا ان شاء الله

[ريري]

اول بيبى عندى كان الولاده الاصعب ..لانى فى اول تلات شهور بنام على ظهرى وممنوع اتحرك وبعدين جالى من الشهر السابع (تسمم حمل) يعنى الضغط بيرتفع جدا وبيبقى فيه خوف على البيبى ليموت،والحمدلله ربنا كرمنى بدكتور جيد الى ان دخلت التاسع وولدت(وزن البيبى كان اتنين كيلو الا ربع)كنت لما اجى احميه اشيله بايد واحده ،اما مشاكل ما بعد الولاده فحدث ولا حرج .... الله يسامحك يا مؤمنه فكرتينى ليييييييييييييييه؟؟؟؟ ربنا يجعله فى ميزان حسناتى
كفايه كده مش عايزه افتكر الباقى...(البيبى التانى والتالت)

[مؤمنة بالله ورسوله]

حقيقى يا ام لوجى اتعزبتى كتير لكى الجنة ان شاء اللة وان شاء اللة تشفيهم فى احسن حال

[مورة]

انا بقي في المولد الاول كان الموضوع صعب لاني المفروض كنت هولد طبيعي وفعلا حصل علامات الولدة ورحت المستشفي الساعة 2 باليل والطلق شغال والدكتور معلقلي محاليل فيها طلق صناعي علشان الرحم يتفتح هو كان مفتوح بس 4 سم وهو المفروض يتفتح 10 وفين الساعة 11 الصبح وبعد المعانة طول الليل من الطلق الصناعي الولد ورم من كتر المحلول والدكتور قال لزوجي لازم نفتح كيثري لان الولد ورم والمياة حولية خلصت وفعلا محستش اللي بعد لما فقت من البنج بس طول ما كان فية الطلق الصناعي كنت بشتم في الدكتور وبعد الاولادة دخل وقالي كتر خيرك علي الشتمية وانا مكنش حاسة انا بقول اة والحمد للة والمرة التانية انا اللي قررت اولد كيثري من اللي شوفتة في الاول وكانت عادية قبل معاد الولدة باسبوع والحمد للة ربنا يخليهم لية ويحفظلي عليهم

[سوسو4]

انا بصراحة ما بحسسش بالولادة ولكن بعديها بالالم الفظيع لانها قيصرية

وهي كانت مرتين اول مرة توأم صبي وبنت وتاني مرة بنت يربنا يحفظهم

ويحفظ اولادكم جميعا0

[ام شوكت]

انا بتمنى وبدعي لكل حامل انها تكون ولادتها سهله زي ولادتي في اولادى الاربعه
الولاده الاولى رحت كشف عادي بتقولي الدكتوره دي حالة ولاده وكانت الساعه 11 صباحا وولدت بنتى الساعه 5 مساء الولادة الثانيه برضه كنت رايحه كشف عادي قلتلى الدكتوره ولاده دخلت غرفة الولاده الساعه 10 الصبح وولدت بنتى الساعه10:25 الصبح وكمان الولاده التالته الساعه12:30 الضهر ولدت الساعه 1 الضهروالرابعه من الساعه 9 في الليل ولدت الساعه9:15 قي الليل والحمد الله الطلق خفيف كتير واكتر وزن كان للبيبي 2:75 كجم والحمد لله بناتي طالعين زيي ولاداتهم سهله والحمد لله ربنا ييسرولادة كل حامل ويقومها بالسلامه امين يارب

[مؤمنة بالله ورسوله]

حبيبتى ريرى انت ولادتك الحمد الله عدت على خير لان فعلا ارتفاع الضغط خطير جدآ وواضح انك عانيتى كتير اظن مش هتكرريها!!!!ربنا يخليلك اولدك وتفرحى بيه
اما عن حبيبتى مورة فربنا يسامح الدكتو فعلا يستاهل الى عملتية معاة وفعلا القيصرى احسن بعد العزاب وربنا يخلهملك
اما سوسو4 فا احمدى الله ولادتك نوعآ ما سهلة الحمد لله الام بعد الولادة شىء لا بد منة ربنا يحفظهم
حبيبتى ام شوكت شكرا لمرورك العطر انت انسانة محبوبة من الله وبدليل سهولة ولادتك انتى وبناتك ربنا يحفظهم ويحفظ احفادك ويارب كل الحوامل تكون الولادة بهذة السهولة

[جيهان السيد]

ماشاء الله لاقوة الا بالله ربنا يحفظك يا ام شوكت اما انا فولاداتى الاربعه قيصرى اما عن الام الولاده القيصرى فحدث ولاحرج ربنا وحده الاعلم اد ايه الالم بعد العمليه لكن الحمد لله بتهون وربنا يجعلها تكفير ذنوب

[rehab]

أنا بقي جاتلي علامة الولادة بس بدون ألم لما قلت للدكتورة قالتلي لما يبقي في ألم تعالي المهم ماحستش بأي تعب ورحت الكشف العادي وكان ميعاد ولادتي عدي فقالتلي هاولد بطلق صناعي روحتلها تاني يوم وفضلت معلقة الطلق من الساعة 9البح لغايت 11 بالليل وطول اليوم تدخل دكتورة مساعدة وتدب صباعها تشوف فاضل أد أية يجي كل نص ساعة لما طهقوني في عز الطلق ما شغال لغايت ما جاءت الكتورة المتابعة ليا وعندها هوء أعصاب رهييييييييييييييب أنا هاموت م التعب والميا نزلت ودي قال تقول أكشف عليكي بس كان خلاص الراس هتنزل وولدت الحمد لله بس خاتلي كام غرزة ربنا ما يحكم علي حد ويتخيط من تحت أبدا

[ام الاء]

ولاده الاول كنت عاديه عشان ولادة قيصرى واحساسى كنت سعيده لان اسرتى كانت موجوده معى
اما ولاده التانيهنزل عاليه دم فطبعا ولادتها على طول ولكن مكنتش مبسوطه عشان ابى رحمه الله عليه كان مريض وكان فى المستشفى
والله يعلم ماذا سيحدث فى الولاده التالته ؟؟

[سوكة الددة البيضة]

انا الحمد لله ولدت مرتين طبيعى ولكن للاسف بخياطة كبيرة من تحت
الأول من 8 الصبح :12 بليل (ولد) وكان نفسى اعرف النوع بس الدكتور بتاعى مكنش بيرضى يقول لدرجة انى ظنيت ان فى حاجة فى البيبى.
التانى من 12 مساء :9 صباحا (بنت)وبرده مكنتش اعرف النوع

شوفو الهبل بقى كان نفسى اتعرف على الطلق من كتر ما مامتى كانت بتوصفو ليا علشان اخد بالى والحمد لله عرفته احسن معرفة

المشكلة الى ربنا ما يوريها لحد هى كانت الامساك الفظيع الى جالى فى المرتين والى كان بيتسبب فى فتح الجرح مرة اخرى قبل الشفاء .......وخدى عندك بقى عياط ليل نهار دا كله كوم والحلمات كوم تانى من تشققات والتهابات وخاصة لو الولادة فى الشتاء........ ربنا يخلى اولادنا علشان ينسونا الام الولادة .

[أم الطيب]

انا في ابني الكبير فضلت حامل لغاية لما دخلت 10 ايام كمان في العاشر والولد متشعلق فوق مش راضي ينزل في الحوض والدكتورة (ربنا يكرمها ويهديها لانها مش محجبة) صابرة عليا لغاية ما ضغطي بدأ يرتفع قالتلي تعالي بكرة هتولدي قيصري وقد كان ولدت تاني يوم الضهر.
ولادتي التانية كانت قيصري برده ودخلوني غرفة العمليات قبل ما دكتورة التخدير تيجي وقعدت في الاوضة مع ممرضتين حوالي ربع ساعة عدو علي كأنهم ساعتين واتفرج يا ستي على المقصات اللي بيحضروها والمشارط وتقوله لا ده مشرط مقاس مش عارف ايه هاتي مشرط مقاس.. وعمالين يعقمو نفسهم ويحطو القطن والشاش، لغاية لما اعصابي باظت وجسمي بدأيترعش والله، واخيرا جت دكتورة الولادة وبتقولي عاملة ايه قولتيلها زي الزفت (ده لما جبت اخري ما حسيتش بنفسي) راحت مزعقالهم وبنجونيييييييي.......
لما بفتكر اللحظات دي ببقى مبسوطة ونفسي بتهفني على الحمل تاني، لان كفاية لما تبصي في وش الكائن اللي كان جواك ده واللي كان مطلع عينك في الحمل وتقولي جه منين ده.سبحاااااااااااااااان الله.
ربنا ما يحرم حد من الاولاد

[ريري]

ربنا يرزقك بتلات توائم يا ام الطيب ..عشان تتبسطى اكتر واكتر

[المشتاقه الى الجنه]

ولدتى نفس ولادت موره بعد ما اخذت حقن علشان الطاق الصناعى وخلاص كنت تعبانه جدا فلاخر الكتوره قالتلى لازم كيثرى علشان البيبى كده فى خطوره عليه بس الحمد لله
وانا بنصح كل وحده حامل اواى ست عموما ما تكشف او تولد عن راجل ابدا ابدا مهما يكون فى دكترا كتير اساتذه فى مهنتهم بس بلاش لان هذا مش من الحياه والشرع حلل هذا لو عدتمت الطبيبه ولكن ان لم تعدم فلا يجوز
انا على فكره كده هطفش الزباين من عند ابويا اصلوا دكتور امراض نساء وولاده يلا معلش بقا يا بابا

[annos]

انا عندى بنتين الاولى كانت ولادتها طويلة 12 ساعة من الفجر للعصر بس كان الالم هادى لحد مادخلت غرفة العمليات حسيت ان روحى بتخرج من جسمى
اما التانية كانت على غفلة فجأة وفى ربع ساعة مجرد انى رحت المستشفى ولدت بس شفت العذاب اللى فى كل الولادات رغم ان الوقت كان قصير
المهم انى مستحيل افكر اجرب التجربة تانى من اللى شفتة

[مؤمنة بالله ورسوله]

حمدآ لله على سلامتكم جميعأ اظن لمل تشوفوا اطفالكم وابتسامتهم بينسوكو كل العذاب

[eltourky]

انا بقي الدكتوره قالتلي هولد طبيعي باين كده من المؤشرات
بس خلص التاسع ومفيش جديد
جت ف الاخر وقالتلي شكلك هتولدي قيصري لان الرحم صغير جداااااااااا
وراس البنت كبيره جداااااااا والميه قلت خالص والبنت مبقتش بتحرك
طب ماما ركبها الجنان وودني لدكتور وولدني قيصري
انا مش هقولك العذاب000000
اما ف التانيه فجالي الطلق ف اول ايام الشهر التاسع بس الدكتور
صمم يولدي قيصري علشان الفرق بين الولادتي قريب وخاف الجرح الاول بتفتح
طبعا وانتم عارفين الباقي0000رضاعه والمها الشديد وعياط العيال مع التعب عذ1ااااااااب
بس ان شاءالله مش هحرم زي انوووس
الاطفال برده متعه
بس معنتش هروح لدكتور لازم دكتوره