[التلميذة]

أخواتى الحبيبات بس عندى سؤال ممكن اعرف ليه قشرة البوفتيك ساعات اما باعملو بتنفصل بالرغم انى باضغط على البقسماط واللحم كويس وباشق الجوانب بتاعة البوفتيك بس احيانا حتة اللحمة كدة تاخد فنفسها جوة الطاسة وتقوسلى ظهرها والقشرة تنفصل
وجزاكم الله خيرا حبوباتى

[ولاء محمود]

وأنا كمان لما تعرفى قوليلى وكمان الفراخ البروستد مش بتطلع قشرتها زى كنتاكى مع انى بعمل خلطة حلوة والله

[أم لوجى و ملك]

بصو يابجماعه السر فى الدقيق حطى الفراخ او البفتيك فى الدقيق قبل البيض والبقسماط وانت هتشوفى الفرق وابقوا ادعولى

[سوكة الددة البيضة]

كلام ام لوجى مظبوط جدا واضافة عليه حطى البفتيك بعد تتببله فى الدقيق والبيض والبقسماط فى التلاجة حوالى ربع ساعة قبل القلية علشان ميحرقش الزيت.

[أم الطيب]

بالنسبة للبفتيك بيكون اللحم سنه كبير وده عيب من الجزار، ولازم تدقيه كويس بشاكوش البفتيك وتشيلي خط الدهن الابيض الخارجي لانه هو اللي بيقوسها، وتتبليه بعصير بصل وخل وملح وفلفل اسود، وتحطيه في البيض وبعدين القسماط واضغطي عليه كويس والنار تكون عالية.

[التلميذة]

جزاكم الله خيرا يا قمرات يعنى اللى ما فى حد طب قال حنبعتلك طبقولو عزومة مراكبية
انا فعلا اما كنت باحطه فالتلاجة شوية كانت بيبقى كويس بس ما باحطش البفتيك فدقيق ابدا بس بيض وبقسماط

[التلميذة]

ام الطيب انت قصدك ان الراجل بيغشنى دة انا حانيله حاعمل الجزار بفتيكة كبيرة

[dodo000]

ام دودو ربة منزل عشان البوفتيك يمسك فية الخلطة حطية فىبيض ودقيق وزبادى وشوية ملح وفلفل وزنجبيل رشة صغيرة وبعدين تحطية فى البقسما ط وتضغطى علية بصوابعك عشان يمسك فية

[عبير بدري]

فعلا البوفتيك لازم تعملى فى دقيق الاول و بعدين البيض و البقسماط ولازم يدخل الثلاجةعلى الاقل نصف ساعة اما الفراخ ضعى مع البقسمات كورن فليكس مطحون

[ام عمر المصرية]

انا مع ام الطيب لازم اللحم يكون خالى تماما من الدهون لان وجود الدهون والشغت على سطح قطعة اللحم يخليها لما تحطيها فى الزيت تتقوس والقشرة تنشال من عليها

[فروووووووحة]

مشكووووووووووووووورة اخواتي على طريقة البوفتيك

[التلميذة]

[مدام ديدى]

انا مش لاقيه كلام تانى اقوله وكل الكلام صح لازم تكون اللحمه صغيره علشان متكشش وتسيب القشره وبرضه لازم دقيق وبعدين بيض وبعدين بقسماط ولالالالالابد تدخليه الثلاجه ربع ساعه علشان القشره تمسك فيه

[هميس]

[مرمريكا]

خلاص مفيش كلام غير كلامكو صح الصح

[om hager]

تلميذتي الحبيبة طبعا كل كلامكم ممتاز بس فيه غلطة جامدة جدا وقعتوا فيها ...
حرام عليكو اناجعانة جدا ... اجيب منين طبق بفتيك دلوقتي يافتكواااااااااااااااااات؟

[rehab]

علي رأيك والله يا أم هاجر
يالا جوعتنا
منكم للي كلت دراع جوزها

[أم الطيب]

اللي هتيجي منك مقابلة شم النسيم هعملها سندويتش.. يالله مش خسارة فيكم
وهو انا هلاقي احلى منكم فين.

[ام سعيد]

تسلمى يا عسل

[هاله رؤوف]

انتو كلكو زى العسل ودمكو خفيف اوى وتتحبو بجد