[أم ملللللللللوك]

حبايب قلبي
ازيكم
أنا حبيت أنقلكم تجربتي مع الصبغة
أنا دورت كتير لاني من انوع المتردد جدا في اختياراتي لاي شيئ
ومتعودة ما أقررش غير لما أكون متأكدة واتوكل على الله

دورت كتير على النت وقريت كتير عن أحسن أنواع الصبغة وأحنها على فتلة الشعر (خصوصا أنا شعري خفيف جدا وبيتساقط) وبعد لف وتمحيص

أتوكلت على الله واشتريت صبغة غارنيه كولو ناتشورالز (أسود مزرق)
هتقولو ايه اللون ده هقولكم
أولا: جوزي بيحب لون شعري يكون أسود من غير ميش وخصل والكلام ده مش بيعجبه وطبعا كل واحدة فينا لازم ترضي زوجها وترضي نفسها وانا عن نفسي برضه معجبنيش اللوك اللي عملته من 3 سنوات وكان بني في خصل ذهبي وتلجي.
ثانيا: شعري ظهر فيه شعر ابيض (لزوم حالة الضغط العصبي اللي الواحد بيعيشها الايام دي) وحبيت اصبغه اسود.
ثالثا: مميزات خاصة جدا خلتي أعجب بصبغة غارنييه هقولكم عليها بعدين.

المهم اخترت اللون بعد ماشفته على بنت خالي وبصراحة لون جميل ولامع وجذاب
واخترت غارنييه تحديدا لاني لقيت فيها مميزات كتير انا محتجاها:
1. لقيت علبة الصبغة الصراحة ب19 جنيه يعني أقدر أشتريها .
2. لقيت بنات كتير اوي أكتر من 90% من اللي جربوها بيقولو عليها حنينة على الشعر وما بتضرش الشعر.
3. اللون الأسود المزرق دا موضة الصيف دي وعجبني بشدة.
4. الصبغة بزيت الزيتون يعني بترطب الشعر وبتخليه ناعم.

والمفاجأة بقى اني اشتريتها وعملتها امبارح بس لوحدي
في البيت ومعايا ربنا وكانت أول مرة أعمل صبغة لنفسي

والنتيجة
الشعر الأبيض بقى أسود حاااااااااااالك
حسيت انو لون الشعر الطبيعي الأول كان باهت وبعد الصبغة بقى بيلمع جدا (قولوماشاء الله)
حسيت انو الشعر بقى ناعم واللون فعلا في شوية ضي بيدي لون أزرق خفيف بس روعة
الشعر طري مش ناشف وبعد ما لفيت شعري طاقية ظهر اللون أكتر
انا بنصح بيها كل الفتوكات اللي مش عاوزين يهلكو شعرهم بصبغات تضر الشعر
انا سمعت وقريت عن باليت وغارنييه وويلا
بس انا امكانياتي وتركيزي اتجه لغارنييه والحمد لله نجحت الطبخة
اتمنى تجربوها وتقول رايم واللي جرب ما ييبخلش يقول تجربته
واللي هتجرب بناء على وصفتي وما نفعتش ما تدعيش عليا انا زيي زيك اتكلتعلى الله ولا روحت كوافير ولا يحزنون وعملتها لوحدي وماحدش قالي عليها.انا اخترتها من نفسي وبإرادتي الكاملة.
تحياتي ليكم
ملحوظة: أنا بحب هند صبري ويمكن دا من أحد الاسباب اللي خلتني اتجه لشراء الصبغة دي
والله الناس دي بتفهم ازاي تشد المشاهد فعلا لشراء المنتج
المهم اني اتأكدت انو مناسب ليا ومش مضر
ملحوظة أخرى: من كوافيرة نصيحة نصحتني بيها اللي بتعمل شعرها في الكوافير دايما بعد ما يخلصولها صبغ بيحطوها تحت السيشوار ودا غلط دا اللي بيبهدلل الشعر لانهم عاوزين يخلصوا الزبونة بسرعة علشان غيرها تييجي وبسرعة عاوزين الاوكسجين والصبغة الفاتحة تمسك في الشعراية
اللهم بلغت اللهم فاشهد
تحياتي

[hanaa rasmy]

جزاكى الله كل خير

[ganna1311]

الف مبروك على اللوك الجامد
وهجربها ان شاء الله
اه وعلى فكرة انا كمان عندى ملك عندها 3 سنين

[coffee]

مبروك عليكى نجاح التجربه يا قمر
و ربنا يسعدك ويهنيك
انا كمان نفسى اتجرا واصبغ شعرى فى البيت بس خايفه اعك الدنيا
ممكن تقولى لى خطوات عمل الصبغه فى البيت بس اللى انتى اتبعتيها كمبتدئه لانى زيك مبتدئه
و جزاكى الله خيرا

[أم ملللللللللوك]

إسلام
أرجو إن الوصفة تكون عجبتك.

جنننننننننننننننة
ربنا يباركلك في ملك ويخليهالك دي أول حاجة طبعا
ثانيا يارب تكون التجربة عجبتك ولكا تجربي قوليلنا على النتيجة وربنا يديم عليكي نعمة الصحة.

كوفيييييييييييييييي
تحياتي ليكي يا قمر ونورتيني في موضوعي أنا كان الموضوع سهل بالنسبالي علشان هوا أصله لون ولحد ولا هعمل خصل ملونة ولا غيره علشان كده اتشجعت

كل اللي عملته اني وقفت قدام المرايا وفلقت شعري نصفين نصف فوق والاخر تحت

والنصف اللي تحت لميته ببنسة وخليته على جمب خالص
مسكت الجمب اللي فوق وابتديت أخد من عند ودني اليمين خصل الشعر خصلة خصلة وبقيت بفرشة الصبغة باخد من الطبق (وياريت يكون زجاج علشان لو بلاستيك او ميلامين الصبغة هتطلع فيه او تطلع في شعرك).
المهم بقيت باخد من الصبغة بالفرشة وبحط بها على خصل شعري كإني برسم على الخصلة وبعدين باخدها بايديا (طبعا لابسة جوانتي) وبسرحها بالمشط وبعد ما بسرح الخصلة باخدشوية صبغة تاني بالفرشة وبحط على الأطراف
وكل ما أعمل خصل أحطها على جمب بس كنت كل ما أخلص خصلة قبل ما أحطها على جمب بالبنسة بسرحها مع اللي اتصبغت قبلها وبعدين بلفهم سوا بالبنسة وهكذا لحد ما وصلت لودني الشمال وبعدين اتبقى شوية صبغة وحسيت انهم مش هيكفوا الجزء اللي تحت اني أعمله بضمير زي اللي فوق فاضطريت أخد باقي لصبغة بإيديا وأدهن بيها على شعري اللي تحت بس ركزت على الأطراف علشان هما اللي في الغالب هيكونو باينين والجزء اللي ورا الودن.

وبعدين اخدن بقطنة الودان جزء ن الصبغة كان متبقي على المشط والفرشة وحطيت على حواجبي من نفس اللون حاجة بسيطة بس لما حطيت على اول حاجب وخلصت التاني مسحت الاولاني على طول لانه مشبياخد وقت يعني وبعدين مسحت التاني.
وهكذا انتهت الطبخة.
أتمنى تكوني فهمتي عيا وتكوني يارب على استعداد انك تعملي التجربة وما تخافيش هيا مفيهاش اي مخاطرة لانو مفيهاش تشقير وخصل وكدا
دا بالنسبة ليا انما لو اخترتي لون وخصل والكلام ده يبقى لازم تروحي كوزافير ولو مش عاوزة يبقى أحسنلك تعتمدي على نفسك وتشوفي على النت بتتعمل ازاي الصبغة الالوان بالبيت.
وعلى فكرة انا مش هروح الكوافير تاني في اي عمايل شعر لاني اكتشفت فعلا انهم ولا بيزودوا ولا بينقصوا .
همهم المكسب السريع وبس.
تحياتي

[أم سلمى-88]

فعلا جربت صبغة غارنييه بس لون اشقر فاتح

فعلا اروع صبغة جربتها ماببتأثرش خالص في الشعر وتيبه منور ولامع وريحته تحفه تجنن ريحته


فعلا انصح الجميع بصبغة غارنييه

بس كان عندي سؤال ايه الفرق بين الصبغة اللي22جنيه

واللي ب45 جنيه غارنيه برضو

بقيت احتار اشتري اي واحدة منهم
ياريت اللي تعرف ماتبخلش علينا


مبرووووك حبيبتي على اللوك الجديد ربنايسعدك

[أم ملللللللللوك]

أهلا بيكي يا أم سلمى ومنورة الكويت بيكي وبأهلها
وحشتني اوي الكويت لاني كنت عايشة فيها تقريبا كل عمري لحد من 11 سنة بس
على العموم مبروك عليكي انتي كمان اللون الأشقر

[أم ملللللللللوك]

ايه هوا محدش عاجبه اللون
انا كده هزعل كل دي مشاهدات ولا حد عبرني ويرد غير الأمامير اللي فوق

[عفوك يا ربي]

الف مبروك اللوك الجديد ربنا يسعدك

[mo3azapa]

شجعتينى اجربها بس لما اولد