[yoyo]

يا ريت حد منكم يقولي ازاي تتعمل البسيمة و القلقاس عشان جوزي مصري و انا من العراق و معرفش اعمله و هو بيحب القلقاس اوي

[رانيه]

صديقني ما بعرف ماما بتعمل القلقاس لذيذ جدا بس انا ما بعرف انشالله الاخوات يردوا عليكي

[yoyo]

شكرا الك يا رنوش

[تقوى 2007]

ادخلي قسم الطبخ ممكن تلاقي الطريقة

[ام بسنت]

النهارده جايبلكم طريقه عمل البسيمة:

المقادير::-p

1/2 1كوب كوب جوز هند

1/2 كوب دقيق

1/4 كوب زبيب

1/4 كوب زبدة سايحة

1/4 كوب سكر

1/2 ملعقه بيكنج باودر

1/2 كوب حليب

قشطة للتزيين حسب الرغبة

الشربات:

كوب سكر علي كوب ونص ماء وقطرتين ليمون

الطريقة::-p

1. يذوب السكر في الحليب .

2. ثم تضاف الزبده ثم جوز الهند والدقيق والبيكنج باودر والزبيب وتعجن جيدا

3. تدهن الصينيه بالدقيق او بالزبد والدقيق وتفرد العجينة في الصينية وممكن استخدام الشوكة في عمل تزيين لجوانب البسيمة.ان امكن

4.توضع في فرن متوسط الحراه الي ان تحمر من الوجه والاسفل ثم تخرج وتسقي بالشربات البارد

وتقطع حسب الرغبة وتقدم بالقشطة اذا احببتي.


وبالهنا والشفا
منقوله دى
انما القلقاس
تجيبى قلقاسه وتقسيريها وتقطعيها مكعبات وتغسليها كويس وتعملى التقليه يعنى تحطى شويه زيت وتشوحى بصله وفصين توم وتحطى صلصه وبعدين تحطى قلقاس وتحطى الشوربه الميه بتاع اللحمه اللى انتى سلقاها فيها ولما يغلى توطى عليه وتحطى الملح والفلفل والبهارت ولما يستوى تطفى عليه
وطريقه تانيه انك تسويه فى الفرن زى البدنجان كده وتقشريه وتحطى زبده وتحطى القلقاسه عليه وشويه ملح وتهرسيه حيبقى زى البطاطس المهروسه كده وتحطى الملح والفلفل بقه
وفيه طريقه تانيه بتلقيه زى البطاطس بالظبط تعملى تقشيريه وتقطعيه زى مابتقطعى البطاطس اللى حتقليها وتقلى عادى
بالهنا والشفا
يارب اكون افدتك

[ام بسنت]

الطريقه التانيه يعنى تشويها زى مابتعملى البدنجان بتاع بابا غنوجواى اسئله انا معاكى بس حقوم اصلى العشا
واعشى حمايا واجى

[yoyo]

شكرا كتير يا ام بسنت عذبتك معايا

[yoyo]

دي ليكي يا ام بسنت

[أم الطيب]

بصي يا قمورة ام بسنت الجميلة قالتلك طريقة البسيمة وانا هقولك طريقة القلقاس.
تفرمي ورق السلق الأخضر(2حزمة تتغسل ويترك ورقها يتهوى )مع الكسبرة الخضراء(1حزمة بعيدانها) في الكبة (الكيتشن ماشين) قوي جدا (أو بالمخرطة) وبعدين تعصريهم بإيدك مايكونش فيهم ميه خاااالص وتخلي الميه في طبق على جنب وتدقي نصف رأس ثوم وتحطيهم في ملعقتين كبار سمن يتشوحون شوية وبعدين تضيفيلهم الخضرة المفرومة (السلق والكسبرة) ويتقلبو على طول حوالي 15 : 20 دقيقة لغاية ما تلاقيهم نشفو وما بقوش طريين تصفي منهم السمن (تصبي السمن على الشوربة) وتركنيهم شوية يبردوا.
تقطعي القلقاس (1 كيلو) مكعبات صغيرة بعد تقشيرة ويتغسل بميه ساخنة جدا مع الدعك جيدا حتى تنتهي منهم المادة المخاطية، وتكون الشوربة بتغلي تضيفي للشوربة المغلية عصير ليمونة علشان المادة المخاطية والماء اللي استخلصتيه من الخضار المفروم وبعدين تسقطي القلقاس.
تدقي الخضار المتشوح في السمن في الهون علشان ينعم خااالص وبعدين تضيفيه للقلقاس اللي على النار، وخلي بالك انه ما بياخد وقت كتير يعني بعد ربع ساعة ابدأي شوفي سواه.
وألف هنا يا قمر.

[فتوكة الفراشات]

لا لا لا شكله لذيذ ويجنن انا لازم اجي ازورك وادوقه تسلم الايادي

[ام بسنت]

مشكوره يويو على الورد والشكر ياعسل اى خدمه انا تحت امرك متنسيش اننا فى المنتدى اخوات وواجب نساعد بعض على اد مانقدر

[فتوكة الفراشات]

طبعا انا قصدي علي القلقاس يا ام الطيب
بس اوعي تبعتيلي العنوان علي الموقع لحسن تندمي هتلاقي كل الاعضاء عندك عاوزين قلقاس ههه

[أم الطيب]

خلاص يا فتوكة يا قمر خليها في الخباسة من تحت لتحت ..مدي ايدك من تحت الترابيزة يللا.
وعلى فكرة دي وصفة أمي الحبييييييييييييييييييييييبة ربنا يجزيها عنا خير الجزاااااااااااااااااء، وعمري بجد ما شوفت حد بيعمله بالجمال ده انا باكله حااااااااااف من غير رز.

[أم مريم]

فيه طريقة تانيه للقلقاس حلوة قوى

قلقاس بالسلق و الليمون

تقشرى القلقاس و تقطعيه مكعبات و تسلقيه فى الشوربه اللى طبعاً عليها ملح و فلفل و حبهان و مستكة
ولما يستوى تحطى عليه عصيرليمون و سلق

طريقة السلق

ده نبات أخضر شبه السبانخ شويه هتقطعى الورق و تغسليه و تنشفيه كويس و بعدين تحمريه فى شوية زيت و ثوم لحد ما لونه يغمق و ينشف من ميته كلها
وبعدين تضربيه فى الخلاط مع شويه شوربه من اللى انتى سلقتى فيها السلق و ترجعى تحطيهم على السلق مع عصير الليمون و تسيبيه يغلى 5 دقايق بس

وممكن تعملى نفس الطريقة مع البطاطس و يا سلام لو كانت بالكرشه تجننننننننننن


و بالهنا و الشفا

[فتوكة الفراشات]

ربنا يخليهلكم يارب ويحفظها خلاص انا هجيلكم عند مامتك يا ام الطيب

[yoyo]

شكرا ليكم كلكم يا عسل (ام الطيب ) يلي كلك طيبة و يا( ام بسنت) يا قمر و (ام مريم) يا قشطة بالعسل و الله اتكسفت من ذوقكم .

و دي مني ليكم

[yoyo]

و دول كمان

[ALZAHRAA]

تسلمى يا ام الطيب ده فعلا الطريقه الصح انا عرفاها عن ماما وبعمله كده ويبقى رائع